লোকসভা নিৰ্বাচনলৈ মাজত মাত্ৰ কেইটামান দিন বাকি থকা অৱস্থাতে ত্ৰিপুৰাত শাসনাধিষ্ঠ বিজেপি চৰকাৰৰ মিত্ৰদল আই পি এফ টিত মোক্ষম আঘাত হানি দলত্যাগ কৰে সাধাৰণ সম্পাদক তথা যুৱ নেতা শুক্লা চৰণ নোৱাটিয়াই। জানিব পৰা মতে নোৱাটিয়াই কংগ্ৰেছ দলত যোগদান কৰিব।
সোমবাৰৰ দিনটোত আই পি এফ টি ত্যাগ কৰা শুক্লা হ’ল দ্বিতীয়জন শীৰ্ষ পৰ্যায়ৰ নেতা। শুক্লাৰ পূৰ্বে সোমবাৰে আই পি এফ টি ত্যাগ কৰিছিল দলটোৰ উপ সভাপতি তথা জ্যেষ্ঠ নেতা অনন্ত দেববাৰ্মাই। দলত্যাগ কৰিয়েই দেববাৰ্মাই আগন্তুক নিৰ্বাচনত কংগ্ৰেছ দলক সমৰ্থন আগবঢ়াব বুলি মন্তব্য কৰিছে।
ত্ৰিপুৰা স্মল ইণ্ডাষ্ট্ৰিয়েল কৰ্প’ৰেশ্যন চেয়াৰমেনৰ দায়িত্বত থকা শুক্লাই আই পি এফ টিৰ হৈ পশ্চিম ত্ৰিপুৰা লোকসভা সমষ্টিৰ পৰা মনোনয়ন দাখিল কৰিছিল। কিন্তু মনোনয়ন পত্ৰ পুনৰীক্ষণৰ সময়ত তেওঁৰ মনোনয়ন বাতিল হয়।
চেয়াৰমেনৰ দায়িত্বৰ পৰা অব্যাহতি নোলোৱা বাবেই তেওঁৰ মনোনয়ন বাতিল হোৱা বুলি এক সূত্ৰৰ পৰা জানিব পৰা গৈছে।
দল এৰিয়েই আই পি এফ টিৰ বিৰুদ্ধে সৰৱ হৈ পৰে যুৱ নেতা শুক্লা। তেওঁ কয় যে দলে পৃথক তিপ্ৰালেণ্ড ৰাজ্য গঠনৰ উদ্দেশ্য তথা নিৰ্বাচনৰ সময়ত মূল ইচ্ছ্যু হিচাপে লৈ শাসনত আহিল কিন্তু এতিয়া সেই প্ৰসংগটোৰ পৰা ফালৰি কাটি আহিছে।
ইফালে পৃথক তিপ্ৰালেণ্ডৰ প্ৰসংগটো মানি নোলোৱা কংগ্ৰেছৰ সন্মুখত তেওঁৰ স্থিতি একেই থাকিব নে বুলি সোধা এক প্ৰশ্নৰ উত্তৰত সদ্য পদত্যাগী আই পি এফ টিৰ নেতাজনে অতি কৌশলী স্থিতি অৱলম্বন কৰা দেখা যায়। তেওঁ কয় যে বৰ্তমান চিন্তাৰ বিষয় হৈছে নাগৰিকত্ব সংশোধনী বিধেয়ক। বিজেপিক শাসনৰ পৰা ওফৰাই এই বিধেয়কখন নোহোৱা কৰাটোৱেই এতিয়া লক্ষ্য।
বিজেপি দলে সোমবাৰে প্ৰকাশ কৰা নিৰ্বাচনী ইস্তাহাৰত তেওঁলোক ক্ষমতালৈ আহিলে নাগৰিকত্ব সংশোধনী বিধেয়ক গৃহীত কৰা হ’ব বুলি স্পষ্টভাৱে উল্লেখ কৰাৰ পিছতে উত্তৰ-পূবৰ অন্য ৰাজ্যৰ লগতে ত্ৰিপুৰাতো তীব্ৰ প্ৰতিক্ৰিয়াৰ সৃষ্টি হৈছে।
সোমবাৰে ত্ৰিপুৰা প্ৰদেশ কংগ্ৰেছৰ সভাপতি প্ৰদ্যুৎ কিশোৰ মাণিক্য দেৱৱৰ্মাৰ উপস্থিতিত শুক্লাই আই পি এফ টিৰ বিৰুদ্ধে ক্ষোভ উজাৰি সংবাদ মাধ্যমৰ আগত দল ত্যাগ কৰাৰ কথা ঘোষণা কৰে আৰু অতি শীঘ্ৰে কংগ্ৰেছ দলত যোগদান কৰিব বুলি জনায়।
উল্লেখ্য যে যোৱা ২ এপ্ৰিলত আই পি এফ টিৰ জ্যেষ্ঠ নেতা তথা উপ সভাপতি কৃতিমোহন ত্ৰিপুৰাৰ নেতৃত্বত দলটোৰ বহু সদস্যই আই পি এফ টিৰ পৰা ওলাই আহিছিল।
