ভাৰতীয় বায়ুসেনাৰ গৌৰৱ, থলুৱাভাৱে নিৰ্মিত ‘তেজছ’ যুদ্ধ বিমান পুনৰ আন এক দুৰ্ঘটনাৰ কবলত পৰে। প্ৰশিক্ষণৰ অন্তত ঘাটিলৈ উভতি যোৱাৰ পথত অৱতৰণৰ সময়ত বিপৰ্যয়ৰ সন্মুখীন হয়।
চকাই ৰাণৱে স্পৰ্শ কৰাৰ মুহূৰ্ততে বুজা গ’ল যে বিমানখনৰ ব্ৰেকটোৱে কাম কৰা নাই। পৰিস্থিতি মাৰাত্মক দেখি পাইলটে সময় নষ্ট নকৰাকৈ জৰুৰীকালীন প্ৰস্থান (ইমাৰ্জেঞ্চি এক্সিট) ব্যৱহাৰ কৰি বিমানৰ পৰা জপিয়াই ওলাই আহিল। কোনো লোকৰ মৃত্যু হোৱা নাই যদিও কেইবা কোটি টকাৰ এই যুঁজাৰু বিমানখন ৰাণৱেৰ পৰা ছিটিকি যোৱাৰ ফলত সাংঘাতিক ক্ষতিগ্ৰস্ত হয়।
সংবাদ সংস্থাৰ তথ্য অনুসৰি চলিত মাহৰ ৭ তাৰিখে সংঘটিত হৈছে এই ঘটনা। অৱশ্যে প্ৰথম অৱস্থাত বায়ুসেনাই বিষয়টোৰ গোপনীয়তা বজাই ৰাখিছিল। জনা যায় যে যেতিয়া বিমানখন নিয়মীয়া অনুশীলনৰ অন্তত এয়াৰবেছলৈ উভতি আহিছিল তেতিয়া যান্ত্ৰিক সমস্যাৰ সৃষ্টি হৈছিল। ব্ৰেক ফেইল হোৱাৰ বাবে বিমানখনৰ গতি নিয়ন্ত্ৰণ কৰিব পৰা নাছিল।
যোৱা কেইবছৰমানৰ ভিতৰত তেজছৰ বাবে এয়া তৃতীয়টো দুৰ্ঘটনা। ইয়াৰ পূৰ্বে ৰাজস্থানৰ জয়ছালমেৰ আৰু ডুবাইত অনুষ্ঠিত হোৱা এয়াৰ শ্ব’তো দুৰ্ঘটনাগ্ৰস্ত হৈছিল এই মডেলৰ যুঁজাৰু বিমান।
ধাৰাবাহিকভাৱে সংঘটিত দুৰ্ঘটনাৰ ফলত উদ্বিগ্ন হৈ পৰিছে প্ৰতিৰক্ষা মন্ত্ৰালয়। সুৰক্ষাৰ স্বাৰ্থত বায়ুসেনাই সদ্যহতে প্ৰায় ৩০খন একক আসনৰ তেজছ যুদ্ধ বিমান গ্ৰাউণ্ডেড বা বহাই ৰখাৰ সিদ্ধান্ত লৈছে। এটা বিশেষজ্ঞ দলে প্ৰতিখন বিমান বিতংভাৱে পৰীক্ষা কৰিব। বিশেষকৈ ব্ৰেকিং চিষ্টেম আৰু ইঞ্জিনত কোনো ধৰণৰ আভ্যন্তৰীণ বিসংগতি আছে নেকি সেয়া পৰীক্ষা কৰা হ’ব। খবৰ পোৱা গৈছে যে এই বিমানবোৰে গ্ৰীণ চিগনেল নোপোৱালৈকে পুনৰ আকাশত উৰিব নোৱাৰিব।
কেন্দ্রই হিন্দুস্তান এৰ’নটিক্স লিমিটেড (এইচ এ এল)ক হাজাৰ হাজাৰ কোটি টকাৰ বিনিময়ত তেজছ প্রস্তুত কৰাৰ ঠিকা দিছিল৷ কিন্তু কোম্পানীটোৱে সময়মতে বিমানখন যোগান ধৰিব নোৱাৰাৰ অভিযোগ উত্থাপন হৈছে। বিশেষকৈ জি ই এৰ’স্পেচৰ পৰা ইঞ্জিন যোগান নোপোৱাৰ বাবে উৎপাদনত বাধাৰ সৃষ্টি হৈছে। এনে পৰিস্থিতিত তেজছৰ বাৰে বাৰে সংঘটিত দুৰ্ঘটনাই বায়ুসেনাৰ আধুনিকীকৰণ প্ৰক্ৰিয়াত ডাঙৰ প্ৰশ্নৰ অৱতাৰণা কৰিছে।
