ৰাতিপুৱা টোপনিৰ পৰা উঠিয়েই এগিলাচ পানীৰ সৈতে এটা গেছৰ বড়ি খোৱাটো বৰ্তমান বহু লোকৰ এক অপৰিহাৰ্য অভ্যাসত পৰিণত হৈছে। দিনটোৰ যিকোনো সময়ত যি ইচ্ছা তাকেই ভক্ষণ কৰাৰ পাছতো অম্বল বা বুকু জ্বলাৰ পৰা সকাহ পাবলৈ লোৱা এই পদ্ধতিয়ে সাময়িকভাৱে স্বস্তি দিলেও, ই মানৱ শৰীৰলৈ কঢ়িয়াই আনিব পাৰে চৰম বিপৰ্যয়। শেহতীয়াকৈ আমেৰিকাৰ হাৰ্ভাৰ্ড বিশ্ববিদ্যালয়ৰ এক গৱেষণাত প্ৰকাশ পাইছে যে কোনো বিশেষজ্ঞৰ পৰামৰ্শ অবিহনে দীৰ্ঘদিন ধৰি এণ্টি-এচিড বা গেছৰ দৰব সেৱন কৰি থাকিলে ই হৃদযন্ত্ৰ আৰু বৃক্কৰ (কিডনী) ওপৰত মাৰাত্মক প্ৰভাৱ পেলাব পাৰে। বিশেষকৈ প্ৰ’টন পাম্প ইনহিবিটৰ বা ‘পি পি আই‘ (PPI) গোত্ৰৰ দৰবসমূহে শৰীৰৰ স্বাভাৱিক পাচন প্ৰক্ৰিয়াত ব্যাঘাত জন্মাই পুষ্টিৰ শোষণ হ্ৰাস কৰে, যাৰ ফলত মানুহ অপুষ্টিত ভোগাৰ সম্ভাৱনা বৃদ্ধি পায়।
চিকিৎসা বিজ্ঞানৰ ভাষাত বহুলভাৱে ব্যৱহৃত ওমিপ্ৰাজল, পেণ্টোপ্ৰাজল বা ইছ‘মিপ্ৰাজল জাতীয় দৰবসমূহে পাকস্থলীৰ স্বাভাৱিক এচিডৰ মাত্ৰা হ্ৰাস কৰি পেলায়। উল্লেখ্য যে, পাকস্থলীত উৎপন্ন হোৱা এই এচিডে কেৱল খাদ্য হজম কৰাতে সহায় নকৰে, বৰঞ্চ খাদ্যৰ সৈতে শৰীৰলৈ প্ৰৱেশ কৰা ক্ষতিকাৰক বেক্টেৰিয়াসমূহকো ধ্বংস কৰে। যেতিয়া এজন ব্যক্তিয়ে নিয়মীয়াকৈ এই দৰবসমূহ ব্যৱহাৰ কৰে, তেতিয়া শৰীৰৰ স্বাভাৱিক হজম শক্তি কমি যোৱাৰ লগতে অন্ত্ৰত ক্ষতিকাৰক বেক্টেৰিয়াৰ সংক্ৰমণ বৃদ্ধি পায়। ইয়াৰ উপৰি এনে ঔষধৰ অতিমাত্ৰা ব্যৱহাৰে হাড়ৰ ঘনত্ব হ্ৰাস কৰে, যাৰ ফলত গাঁঠিৰ বিষ আৰু অষ্টিঅ’পৰ’ছিছৰ দৰে হাড়ৰ দুৰ্বলতাজনিত ৰোগৰ আশংকা বহু পৰিমাণে বৃদ্ধি পায়।
গৱেষকসকলৰ মতে এচিড ৰিফ্লাক্স বা আলচাৰৰ সমস্যাৰ বাবে সাধাৰণতে ৬ৰ পৰা ৮ সপ্তাহহে পি পি আই জাতীয় দৰব সেৱন কৰাৰ নিয়ম। কিন্তু অধিকাংশ লোকে চিকিৎসকৰ পৰামৰ্শ নোলোৱাকৈয়ে বছৰৰ পাছত বছৰ ধৰি এই দৰবসমূহ সেৱন কৰি যায়, যিটো স্বাস্থ্যৰ বাবে অত্যন্ত বিপদজনক। বিশেষজ্ঞসকলে মত পোষণ কৰিছে যে হঠাতে হোৱা এচিডৰ সমস্যাৰ বাবে পিল বা টেবলেটতকৈ জুলীয়া এণ্টি-এচিড অধিক ফলপ্ৰসূ আৰু তুলনামূলকভাৱে কম ক্ষতিকাৰক। যদিহে কোনো ব্যক্তিৰ এই দৰব খোৱাটো অভ্যাসত পৰিণত হৈছে, তেন্তে তেওঁলোকে হঠাতে দৰবটো বন্ধ নকৰি লাহে লাহে ইয়াৰ মাত্ৰা কমাব লাগে। উদাহৰণস্বৰূপে, প্ৰতিদিনে খোৱাৰ পৰিৱৰ্তে এদিন অন্তৰে অন্তৰে খাই ক্ৰমান্বয়ে ইয়াৰ পৰা আঁতৰি অহাটোৱে বুদ্ধিমানৰ কাম।
অৱশ্যে হৃদৰোগী বা অন্য কোনো গুৰুতৰ শাৰীৰিক সমস্যাৰ বাবে যিসকল ব্যক্তিয়ে বিশেষ চিকিৎসাৰ অধীনত আছে, তেওঁলোকে নিজাববীয়াকৈ কোনো সিদ্ধান্ত নোলোৱাই শ্ৰেয়। তেনে লোকে বিশেষজ্ঞ চিকিৎসকৰ সঠিক পৰামৰ্শ গ্ৰহণ কৰিহে ঔষধৰ মাত্ৰা সলনি বা বন্ধ কৰা উচিত। সুস্থ জীৱনশৈলী আৰু সঠিক খাদ্যাভ্যাসৰ জৰিয়তে গেছৰ সমস্যা নিয়ন্ত্ৰণ কৰিবলৈ চেষ্টা কৰাটোৱেই হৈছে ভৱিষ্যতৰ জটিল ৰোগৰ পৰা পৰিত্ৰাণ পোৱাৰ একমাত্ৰ উপায়।
