নাগৰিকত্ব সংশোধনী আইনৰ বিৰুদ্ধে ধাৰাবাহিকভাৱে হৈ থকা আন্দোলনৰ ফলত বেয়াকৈ প্ৰভাৱ পৰিছে শোনিতপুৰ জিলাৰ পৰ্যটন উদ্যোগটোত।
অবিভক্ত শোনিতপুৰ জিলাখন দেশী-বিদেশী পৰ্যটকৰ বাবে সদায়ে আকৰ্ষণৰ কেন্দ্ৰ বিন্দু। কিয়নো তাত কাজিৰঙা ৰাষ্ট্ৰীয় উদ্যান, নামেৰী ৰাষ্ট্ৰীয় উদ্যান, সোনাই-ৰূপাই বণ্যপ্ৰাণী অভয়াৰণ্যৰ লগতে আছে ঐতিহাসিক তেজপুৰ চহৰ।
কিন্তু অসমত শেহতীয়াকৈ সৃষ্টি হোৱা পৰিস্থিতিৰ বাবে উক্ত স্থান সমূহত এইবাৰ পৰ্যটকৰ উপস্থিতি মুঠেই নাই বুলি জানিব পৰা গৈছে।
এই সন্দৰ্ভত জিলা পৰ্যটন বিষয়া বাসৱ বৰাই নৰ্থ-ইষ্ট নাওক কয়, ‘তেজপুৰ, পৰ্যটক সকলৰ বাবে সদায়েই আকৰ্ষণৰ ঠাই। কিন্তু যোৱা তিনিমাহত মাত্ৰ ১৫৪ গৰাকী পৰ্যটকহে ইয়ালৈ আহিছে’।
‘১৫৪ গৰাকী পৰ্যটকৰ ভিতৰত মাত্ৰ ৫ গৰাকী বিদেশী। অঞ্চলটোত হৈ থকা কা বিৰোধী আন্দোলনৰ বাবেই পৰ্যটক সকল শংকিত, যাৰ বাবে এনেধৰণৰ অৱস্থাৰ সৃষ্টি হৈছে’।
তেওঁ লগতে কয় যে পাহাৰীয় ৰাজ্য অৰুণাচলৰ গাতে লাগি থকা নামেৰী ৰাষ্ট্ৰীয় উদ্যানলৈ এই সময়ত ৰাজ্যৰ বিভিন্ন প্ৰান্তৰ পৰা নিতৌ শ-শ লোক আহিছিল।
‘কিন্তু এইবাৰ, নামেৰী-ভালুকপুং অঞ্চলত বিপৰীত ছবি। এই পৰ্যন্ত, শোনিতপুৰ জিলাই লাভ কৰা তথ্য অনুসৰি অঞ্চলটো পৰিভ্ৰমণৰ বাবে ১৫৪ গৰাকী দেশী আৰু পাঁচগৰাকী বিদেশী পৰ্যটক আহিছে’। এই কথা বৰাই জনায়।
তেওঁ লগতে কয়, ‘যোৱা বছৰ ২,০৮২ গৰাকী সহিতে সৰ্বমুঠ ৩৩,২৫৯ গৰাকী পৰ্যটকে কাজিৰঙা দৰ্শন কৰিছিল। কিন্তু চলিত বছৰৰ যোৱা তিনি মাহত মাত্ৰ ১৫,২১৮ গৰাকী পৰ্যটকেহে ৰাষ্ট্ৰীয় উদ্যানখন পৰিভ্ৰমণ কৰিছে’।
একেই দশা হৈছে বিভিন্ন পৰিভ্ৰমী চৰাইৰ কলৰৱেৰে মুখৰিত হৈ থকা তথা বিভিন্ন জীৱ-জন্তুৰ বিচৰণ ভূমি সোনাই-ৰূপাই বণ্যপ্ৰাণী অভয়াৰণ্যৰো।
কাজিৰঙা ৰাষ্ট্ৰীয় উদ্যানৰ সঞ্চালক কৰ্মশ্ৰী পি শিৱকুমাৰে কয়, ‘আন্দোলনৰ বাবে বন্ধ কাৰ্যসূচীৰ আহ্বান তথা বিভিন্ন হ্বিংসাত্মক কাৰ্যকলাপৰ বাবে বিভিন্নজনে বুকিং বাতিল কৰিছিল, যাৰ বাবে আমিও অসুবিধাত পৰিছিলো’।
তেওঁ লগতে কয়, ‘কিন্তু এতিয়া পৰিস্থিতি স্বাভাৱিক হ’বলৈ ধৰিছে, আৰু আমি আশাবাদী যে পৰ্যটকৰ উপস্থিতি বাঢ়িব’।
