আন্তৰ্জাতিক নাৰী দিৱসৰ প্ৰাকক্ষণত আমি নাৰীৰ অগ্ৰগতি আৰু সাফল্যক উদযাপন কৰোঁ যদিও বৰ্তমান সময়ত এক নতুন আৰু ভয়াৱহ প্ৰত্যাহ্বানৰ দিশলৈ চকু দিবলগীয়া হৈছে। শেহতীয়াকৈ কৰা এক গুৰুত্বপূৰ্ণ গৱেষণাত দেখা গৈছে যে সাধাৰণ নাৰী বিদ্বেষ কেনেদৰে ক্ৰমান্বয়ে হিংসাত্মক চৰমপন্থাৰ দিশে আগবাঢ়িছে। এই অধ্যয়নৰ বাবে গৱেষকসকলে ২৩০০ জন প্ৰাপ্তবয়স্ক আৰু ১১০০ জন ১৩ৰ পৰা ১৭ বছৰ বয়সৰ কিশোৰ-কিশোৰীৰ ওপৰত এক জৰীপ চলাইছিল। এই গৱেষণাই প্ৰকাশ কৰা তথ্য অনুসৰি নাৰী বিদ্বেষ কেৱল এটা সামাজিক সমস্যা নহয়, বৰঞ্চ ই চৰমপন্থাৰ এক মূল চালিকা শক্তি হৈ পৰিব পাৰে। জাতি, ধৰ্ম বা জাতীয়তাবাদৰ দৰে বিষয়সমূহক প্ৰায়ে চৰমপন্থাৰ সৈতে যুক্ত কৰা হয় যদিও লিংগভিত্তিক ৰাজনীতিও এতিয়া সমানেই কেন্দ্ৰীয় হৈ পৰিছে।
বিশ্বজুৰি একাংশ লোকৰ মাজত এনে ধাৰণা শক্তিশালী হৈ পৰিছে যে নাৰীবাদ অতিমাত্ৰা আগবাঢ়িছে আৰু ইয়াৰ ফলত পুৰুষসকল বৈষম্যৰ বলি হৈছে। অনলাইন জগতত থকা বিভিন্ন প্ৰভাৱশালী গোষ্ঠী বা মেন’স্ফিয়াৰৰ জৰিয়তে লিংগ সমতাক পুৰুষৰ বাবে এক ভাবুকি হিচাপে প্ৰচাৰ কৰা হৈছে। গৱেষণা অনুসৰি ১৭ শতাংশ অষ্ট্ৰেলিয়ান নাগৰিকে নাৰীবাদক প্ৰতিৰোধ কৰিবলৈ হিংসাৰ প্ৰয়োগ কৰাটো যুক্তিযুক্ত বুলি গণ্য কৰে। ১৩ ৰ পৰা ১৭ বছৰীয়া কিশোৰৰ ক্ষেত্ৰত এই পৰিসংখ্যা অধিক উদ্বেগজনক। এই বয়সৰ প্ৰায় ২৫ৰ পৰা ৩০ শতাংশ কিশোৰ ল’ৰাই বিভিন্ন ধৰণৰ হিংসাত্মক চৰমপন্থাক সমৰ্থন কৰা দেখা গৈছে। ইয়াৰ উপৰিও ৩৬ শতাংশ কিশোৰে নাৰী বিদ্বেষী মনোভাৱ প্ৰকাশ কৰিছে।
আটাইতকৈ ভয়ানক তথ্যটো হ’ল ১৩ ৰ পৰা ১৭ বছৰ বয়সৰ প্ৰায় ৪০ শতাংশ কিশোৰ ল’ৰাই বিশ্বাস কৰে যে নাৰীয়ে ঘৰুৱা হিংসা বা যৌন নিৰ্যাতনৰ বিষয়ে মিছা অভিযোগ কৰে। ২৮ শতাংশ কিশোৰ ল’ৰাই নাৰীবাদক প্ৰতিৰোধ কৰিবলৈ হিংসাৰ পোষকতা কৰিছে, যিটো কিশোৰীসকলৰ ক্ষেত্ৰত ২১ শতাংশ। সামাজিকভাৱে বিচ্ছিন্নতা আৰু পুৰুষত্বক লৈ থকা অনিশ্চয়তাই এই কিশোৰসকলক অনলাইনৰ এনে ক্ষতিকাৰক ধাৰণাৰ প্ৰতি আকৰ্ষিত কৰিছে। তেওঁলোকে নাৰীক নিজৰ সমস্যাৰ বাবে দায়ী বুলি গণ্য কৰিবলৈ আৰম্ভ কৰিছে।
এই অধ্যয়নত নাৰীৰ বিৰুদ্ধে হিংসাৰ ক্ষেত্ৰত দুটা দিশ স্পষ্ট হৈ পৰিছে। একাংশই ঘৰুৱা ক্ষেত্ৰত নাৰীক নিয়ন্ত্ৰণ কৰিবলৈ হিংসাৰ প্ৰয়োগ উচিত বুলি ভাবে, আন একাংশই ৰাজহুৱা ক্ষেত্ৰত নাৰীৰ অধিকাৰ খৰ্ব কৰাৰ পক্ষত মত দিছে। এই ধৰণৰ চিন্তাধাৰাই হিংসাত্মক চৰমপন্থাক উৎসাহিত কৰিব পাৰে, যিটো ভৱিষ্যতে ৰাষ্ট্ৰীয় নিৰাপত্তাৰ বাবেও চিন্তাৰ কাৰণ হ’ব পাৰে। অৱশ্যে এই পথত পৰিৱৰ্তন সম্ভৱ বুলি গৱেষকসকলে মত প্ৰকাশ কৰিছে। বিদ্যালয়সমূহত সামাজিক আৰু আৱেগিক শিক্ষাৰ প্ৰসাৰ, ইতিবাচক লিংগ দৃষ্টিভংগীৰ বিকাশ আৰু সঠিক শিক্ষাদানৰ জৰিয়তে এই হিংসাত্মক মনোভাৱক বাধা দিব পাৰি। নাৰীৰ সন্মান, সমতা আৰু নিৰাপত্তা নিশ্চিত কৰাটো বৰ্তমান সময়ৰ এক জৰুৰী প্ৰয়োজন হৈ পৰিছে।
