‘’নাগৰিকত্ব সংশোধনী বিধেয়কৰ বিৰুদ্ধে ৰাজ্যত অব্যাহত থকা গণতান্ত্ৰিক আন্দোলনক কেন্দ্ৰীয় চৰকাৰে গুৰুত্ব নিদিয়াৰ বাবেই যুৱ প্ৰজন্মই বাচি লৈছে সশস্ত্ৰ সংগ্ৰামৰ পথ। ৮০-৯০’ ৰ দশকত সৃষ্টি হোৱা পৰিবেশ পুনৰ গঢ়ি উঠিছে অসমত। যাৰ বাবে আলফা স্বাধীনৰ প্ৰতি আকৰ্ষিত হৈছে যুৱ প্ৰজন্ম।’’ নগাঁৱত এক ব্যক্তিগত কামত উপস্থিত হৈ আলফা নেতা অনুপ চেতিয়াই সংবাদ মাধ্যমৰ আগত এইদৰে মন্তব্য কৰে।
তেওঁ কয় যে অসমৰ ৰাইজৰ দাবীত কেন্দ্ৰই গুৰুত্ব নিদিয়াৰ বাবে আলফা স্বাধীনে জনসমৰ্থন ঘূৰাই পাবলৈ সক্ষম হৈছে। অকল নৱপ্ৰজন্মই যে আলফাৰ প্ৰতি আকৰ্ষিত হৈছে তেনে নহয়, অসমৰ ৰাইজে উপলব্ধি কৰিছে এইখিনি সময়ত আলফাৰ দৰে সংগঠনৰ প্ৰয়োজন আছে। সাম্প্ৰতিক অসমীয়া ৰাইজে এই কথাই বাৰে বাৰে উচ্চাৰিত কৰিছে আৰু আমিও শুনিবলৈ পাইছো।
আনহাতে, আলফা নেতাগৰাকীয়ে ভাৰত চৰকাৰে অসমৰ ক্ষেত্ৰত গ্ৰহণ কৰা অৱস্থান আৰু অসমৰ খিলঞ্জীয়া মানুহৰ দাবীসমূহৰ প্ৰতি সন্মান তথা মৰ্যাদা নিদিয়াৰ বাবেই নৱপ্ৰজন্মই নহয় আলফাই অসমৰ ৰাইজৰ জন সমৰ্থন লাভ কৰিবলৈ সক্ষম হৈছে বুলিও মতপোষণ কৰে।
মুন্না বৰুৱাৰ প্ৰসংগতো সংবাদ মাধ্যমৰ আগত অনুপ চেতিয়াই কয় যে সুস্থ শৰীৰে এটা শিবিৰত মুন্না বৰুৱা উপস্থিত হৈছে বুলি আমাক জনাইছে আলফা স্বাধীনৰ মুখ্য সেনাধ্যক্ষ পৰেশ বৰুৱাই। যোৱা ১৬ নৱেম্বৰত মুন্না বৰুৱাৰ সন্দৰ্ভত আমাৰ লগত তেখেতৰ আলোচনা হৈছিল।
ইতিমধ্যে মুন্না বৰুৱাৰ মাতৃয়ে মুন্না বৰুৱাক উভতি আহিবলৈ আহ্বান জনোৱা সন্দৰ্ভতো আলফা নেতা চেতিয়াই কয় যে কোনো পিতৃ-মাতৃয়েই সন্তান হাবিত থকাটো নিবিচাৰে। মুন্না বৰুৱা উভতি অহা অথবা আলফা স্বাধীনত যোগদান কৰাটো মুন্না বৰুৱাৰ ব্যক্তিগত সিদ্ধান্ত। প্ৰাপ্তবয়স্ক মুন্না বৰুৱাৰ ব্যক্তিগত সিদ্ধান্ত লোৱাৰ অধিকাৰ আছে।
মুন্না বৰুৱাৰ পিতৃক বিষয়টো সহজভাৱে ল’বলৈ অনুপ চেতিয়াই অনুৰোধ জনোৱা বুলিও উল্লেখ কৰি সংবাদ মাধ্যমক কয় যে মুন্না বৰুৱাৰ পিতৃ বিমল বৰুৱাই আমাক সুদীৰ্ঘ দিন পৰিয়ালটো ৰাষ্ট্রযন্ত্ৰৰ ওচৰত বিভিন্ন প্ৰকাৰে ক্ষতিগ্ৰস্ত হৈছো, নিৰ্যাতনৰ বলি হৈছো আৰু কিমান নিৰ্যাতনৰ বলি হ’ম বুলিও প্ৰশ্ন উত্থাপন কৰিছে।
ইপিনে সংবাদ মাধ্যমৰ লগতে বিভিন্ন প্ৰচাৰ মাধ্যমত ৰেৱতী ফুকনৰ আলফাত যোগদানৰ কথা মিছা বুলিও মন্তব্য কৰি জ্যেষ্ঠ আলফা নেতা অনুপ চেতিয়াই কয় যে তেখেত নিৰুদ্দিষ্ট হোৱাৰ পাছত আমি পৰেশ বৰুৱাৰ লগত আলোচনা কৰিছিলো আৰু তেওঁ আমাক এই সম্পৰ্কে কৈছিল যে এইবোৰ সকলো মিছা কথা। ৰেৱতী ফুকন অসুস্থ মানুহ, তেওঁক কিয় আনিম, তেওঁক আমি অনা নাই, কোনো এটা পক্ষই আমাক দুৰ্নাম কৰিবলৈ অপপ্ৰচাৰ কৰিছে। আনহাতে, আলফা (স্বাধীন)ৰ সেনাধ্যক্ষগৰাকীৰ ৰেৱতী ফুকন সন্দৰ্ভত কৰা মন্তব্যৰ সত্যাসত্য আছে বুলি বিশ্বাস কৰে অনুপ চেতিয়াই।
আলফা নেতাগৰাকীয়ে নাগৰিকত্ব সংশোধনী বিধেয়ক বাতিল নহ’লে অসম পুনৰ উত্তপ্ত হৈ পৰিব বুলিও মন্তব্য কৰাৰ লগতে এই কথা যুটীয়া সংসদীয় সমিতিকো (জেপিচি) জনাইছিল বুলি উল্লেখ কৰি সংবাদ মাধ্যমৰ আগত কয় জেপিচি যেতিয়া আহিছিল তেতিয়াই তেওঁলোকৰ (অধ্যক্ষ আগৰৱালা-সদস্য এম পি) সন্মুখতেই কৈছিলো, যদি আপোনালোকে নাগৰিকত্ব বিধেয়ক পাছ কৰে তেতিয়াহ’লে কিন্তু বহু ল’ৰা আলফালৈ গুচি যাব আৰু অসম পুনৰ উত্তপ্ত হৈ পৰিব।
এইটো বাস্তৱ সত্য যে সংশোধনী বিধেয়কৰ বাবেই অসমৰ ৰাইজে পুনৰবাৰ আলফা স্বাধীনৰ প্ৰতি সমৰ্থন আগবঢ়াবলৈ বাধ্য হৈছে।
