‘’আমি চৰকাৰক আহ্বান জনাও, কোভিড-১৯ ৰ ক্ষেত্ৰত চৰকাৰ অধিক সচেতন হোৱা প্ৰয়োজন। চৰকাৰে লোৱা ভূমিকাত আমি শংকিত। প্ৰতিদিনে তিনি লাখ লোকক ভেকচিন দিয়া হ’ব বুলি ঘোষণা কৰা চৰকাৰ খনে কালি এক হাজাৰ লোককো ভেকচিন দিব নোৱাৰিলে।‘’
ৰাজ্য চৰকাৰখনৰ বিৰুদ্ধে এইদৰে অভিযোগ আনিছে অসম প্ৰদেশ কংগ্ৰেছে।
প্ৰদেশ কংগ্ৰেছ মঙলবাৰে জাৰি কৰা এক বিবৃতিত কয়, ‘’সর্বত্রে ভেকচিনৰ খেলিমেলি পোহৰলৈ আহি আছে। প্রথম পালি ভেকচিন লোৱা লোকক পুনৰ প্রথম পালি ভেকচিন প্ৰদান কৰি জনসমাজত এক সংশয়ৰ বাতাবৰণ আনি দিছে, কিন্তু স্বাস্থ্য বিভাগ মৌন। ইয়াৰ উপৰিও কোভিড-১৯ত সন্ত্রষ্ট হৈ মানুহে ভেকচিন ল’বলৈ কেন্দ্ৰসমূহত ভিৰ কৰিছে, কিন্তু ভেকচিন দিব নোৱাৰি প্ৰশাসনৰ হতুৱাই আৰক্ষীৰ দ্বাৰা ভেকচিনৰ আশাত অহা লোকক খেদি পঠাইছে, খবৰ অনুসৰি শিলচৰ, লামডিং আদি ঠাইত আৰক্ষীয়ে লাঠি চাৰ্জ কৰিছে।‘’
জীৱনৰ তাড়ণাত, আত্মীয় স্বজনক হেৰুৱাই জীৱন ৰক্ষা পোৱাৰ আশাত ভেকচিন ল’বলৈ অহা লোকৰ ওপৰত কৰা এনে কাৰ্য অমানৱীয় বুলি উল্লেখ কৰি এনে মানব অধিকাৰ ভংগ কৰা কাৰ্যক কংগ্ৰেছ দলে গৰিহণা দিয়ে।
নীতি আয়োগৰ প্ৰতিবেদনত অসমৰ স্বাস্থ্য খণ্ডৰ নিম্ন মানদণ্ডৰ তথ্য উন্মোচন হোৱাৰ পাছতো চৰকাৰে এই খণ্ডত উন্নয়নৰ কি পদক্ষেপ ল’লে সেয়া কার্য ক্ষেত্ৰত প্ৰকাশ কৰি জনতাক আস্বস্ত কৰাৰ দাবী তুলিছে প্ৰদেশ কংগ্ৰেছে।
বিবৃতিটোৰ জৰিয়তে প্ৰদেশ কংগ্ৰেছে কোভিডৰ তৃতীয় ঢৌৰ কথা প্ৰচাৰ হৈ থকা সময়ত অসমত এতিয়াও কিয় ভেকচিন দিয়াৰ ক্ষেত্ৰত দ্ৰুত পদক্ষেপ লোৱা হোৱা নাই তাক চৰকাৰে স্পষ্ট কৰাৰ লগতে জনতাক দিয়া প্ৰতিশ্ৰুতি ৰক্ষা কৰিবলৈও আহ্বান জনাইছে।
কংগ্ৰেছৰ অভিযোগ যে কোভিড-১৯ৰ ভয়াবহ সংক্ৰমণ অব্যাহত থকা অৱস্থাত অসম চৰকাৰে যেন বিজ্ঞপ্তি আৰু সংবাদ মাধ্যমত মন্তব্য দিয়ে নিজৰ দায়িত্ব সামৰাৰ অভ্যাস কৰিছে।
দিনে দিনে কোভিড-১৯ত মানুহৰ মৃত্যু হৈ থকাৰ সময়তে সোমবাৰে গুৱাহাটী চিকিৎসা মহাবিদ্যালয় হাস্পতালত ১২ জন কোভিড-১৯ আক্ৰান্ত লোকৰ কৰুণ মৃত্যুৰ কথা উল্লেখ কৰি বিবৃতিটোত কোৱা হয় যে সততে হস্পিতালত চাডেন ভিজিট দিয়া মুখ্যমন্ত্ৰী আৰু স্বাস্থ্যমন্ত্ৰীয়ে এতিয়ালৈকে কোভিড-১৯ৰ ক্ষেত্ৰত স্বাস্থ্য খণ্ডক সক্ৰিয় কৰিব নোৱাৰাটো অতি পৰিতাপৰ আৰু লজ্জাজনক বিষয় হৈ পৰিছে।
‘’যোৱা নিশা ১.৩০ বজাত খোদ স্বাস্থ্যমন্ত্ৰীয়ে দেখিছে GMCH ত কিদৰে দুৰ্ভগীয়া ৰোগী মৃত্যু মুখত পৰে। ৰাজ্যৰ ৰাজধানী চহৰত অবস্থিত, চিকিৎসাৰ সকলো সুবিধা উপলব্ধ বুলি খোদ মুখ্যমন্ত্ৰী, স্বাস্থ্য মন্ত্ৰীয়ে সংবাদ মাধ্যমৰ আগত কৈ থকা GMCH তে যদি এইদৰে ২৪ ঘণ্টাৰ ভিতৰত ১২ জন লোকৰ মৃত্যু হয়, তেনেহলে ৰাজ্যৰ স্বাস্থ্য খণ্ডৰ অবস্থা এতিয়াও কিমান নিম্নমানৰ হৈ আছে সেয়া সকলোৱে জানিব,‘’-ৰাজ্য চৰকাৰৰ বিৰুদ্ধে এইদৰে অভিযোগ কৰে কংগ্ৰেছে।
স্বাস্থ্য মন্ত্ৰী আৰু দীৰ্ঘদিন স্বাস্থ্যমন্ত্ৰী হিচাপে কাৰ্যনিৰ্বাহ কৰি অহা বৰ্তমানৰ মূখ্যমন্ত্ৰীক সচা অৰ্থত স্বাস্থ্য খণ্ডত উন্নয়ন আনি মানুহক নিশ্চয়তা প্ৰদান কৰিবলৈ আহ্বান জনাই বিবৃতিটোত কোৱা হৈছে ‘’অন্যথা সংবাদ মাধ্যমত প্ৰচাৰ কৰা উন্নয়নক সাধাৰণ জনতাই সাধাৰণ বিজ্ঞাপন বুলি কবলৈ বাধ্য হব।‘’
কংগ্ৰেছ দলে লগতে GMCH ত এদিনতে ১২ জন লোকৰ মৃত্যুত গভীৰ উদ্বেগ প্ৰকাশ কৰি এক উচ্চস্তৰীয় তদন্ত বিচাৰিছে।
প্ৰদেশ কংগ্ৰেছৰ দাবী ‘’দেশৰ পাঁচ খন উন্নত ৰাজ্যৰ তালিকাত আমাৰ ৰাজ্যৰ নাম তালিকাভুক্ত কৰিব বিচৰা মুখ্যমন্ত্ৰীয়ে প্ৰথমে স্বাস্থ্য খণ্ডৰ সঁচা উন্নয়ন সাধন কৰক আৰু নিজে দিয়া প্ৰতিশ্ৰুতি ৰক্ষা কৰক।‘’
