উপ নিৰ্বাচনক লৈ ৰাজীৱ ভৱনত উচ্চ স্তৰীয় বৈঠক কংগ্ৰেছৰ
অসমৰ বহুকেইটা সমষ্টিৰ আগন্তুক উপ নিৰ্বাচনক লৈ ৰাজীৱ ভৱনত দেওবাৰে এক উচ্চ স্তৰীয় বৈঠকত বহে প্ৰদেশ কংগ্ৰেছৰ নেতাসকল।
বৈঠকত কংগ্ৰেছৰ জ্যেষ্ঠ নেতা তৰুণ গগৈ, সাংসদ প্ৰদুৎ বৰদলৈ, প্ৰাক্তন সাংসদ সুস্মিতা দেব, আব্দুল খালেকৰ লগতে বহুতো নেতা উপস্হিত আছিল।
আগন্তুক চাৰি বিধানসভা সমষ্টিৰ উপনিৰ্বাচনৰ লগতে গুৱাহাটী পৌৰ নিগম আৰু টাউন কমিটীৰ নিৰ্বাচনক লৈ বৈঠকত মিলিত হয় কংগ্ৰেছৰ নেতাসকল।
আজিৰ বৈঠকৰ অন্তত গগৈয়ে কয়, ‘আগন্তুক টাউন কমিটিৰ নিৰ্বাচনক লৈ আজিৰ বৈঠক অনুষ্ঠিত হৈছিল।’ ৰাতাবাৰী, ৰঙাপাৰা, সোণাৰী আৰু জনিয়া উপনিৰ্বাচনত কংগ্ৰেছে আটাইকেইটাতে প্ৰতিদ্বন্দ্বিতা কৰিব বুলি তেওঁ জনায়।
‘স্মাৰ্ট চিটীৰ নামত কেৱল টকাৰ অপব্যয় কৰিছে চৰকাৰে’ গুৱাহাটী ৰাজীৱ ভৱনত দেওবাৰে বৈঠকৰ পাছত সাংবাদিকৰ আগত এই মন্তব্য তৰুণ গগৈৰ।
ইয়াৰোপৰি তেওঁ কয়, ‘বিজেপিয়ে মহানগৰৰ কৃত্ৰিম বানপানী ৰোধ কৰাত অসমৰ্থ হৈছে।‘
লগতে এই চৰকাৰৰ দিনতে মহানগৰীত অত্যাধিক খোৱাপানীৰ সমস্যাই দেখা দিছে বুলি তেওঁ অভিযোগ কৰে।
আনহাতে এজনৰ পাছত আনজন নেতাৰ দল ত্যাগৰ পাছত কংগ্ৰেছক পুনৰ শক্তিশালী ৰূপত গঢ় দিয়াৰ উদ্দেশ্যই আজিৰ এই বৈঠক অনুষ্ঠিত হৈছিল বুলি তেওঁ জানিবলৈ দিয়ে।