ৰাজ্যত চলি থকা ছিণ্ডিকেইটক এটা “উদ্যোগ” আখ্যা দিছে প্ৰদেশ কংগ্ৰেছৰ জ্যেষ্ঠ মুখপাত্ৰ দুৰ্গাদাস বড়োৱে।
কয়লা ছিণ্ডিকেইট ৰোধত ৰাজ্যৰ বিজেপি নেতৃত্বাধীন চৰকাৰখন ব্যৰ্থ হোৱা আৰু মাৰ্ঘেৰিটাকে ধৰি ৰাজ্যত এতিয়াও কয়লা ছিণ্ডিকেইট চলি আছে বুলি কংগ্ৰেছ সাংসদ প্ৰদ্যুত বৰদলৈয়ে দাবী কৰাৰ পিছত শাসক দলটোৱে সাংসদজনহে ছিণ্ডিকেইটত জড়িত বুলি প্ৰতি অভিযোগ আনিছিল। ৩০ ছেপ্টেম্বরত বিজেপিৰ তিনিজন মুখপাত্রই সংবাদমেল দি এই অভিযোগ আনিছিল বিৰোধী দলটোৰ সাংসদজনৰ বিৰুদ্ধে।
তাৰ পিছতে আজি দলটোৰ এই ভাষ্যক প্ৰত্যাহ্বান জনাই ৰাজীৱ ভৱনত এখন সংবাদমেল দিয়ে দুৰ্গা দাস বড়োৱে।
বিজেপিৰ দিনত অবৈধ উদ্যোগ ছিণ্ডিকেইটৰ শ্ৰীবৃদ্ধি হৈছে। ছিণ্ডিকেট উদ্যোগৰ সমগ্ৰ ভাৰততে জয় জয় ময় ময় হৈছে বুলি তীব্ৰ কটাক্ষ কৰি বড়োৱে কয়, “চাপৰিলে মেঘ নাতৰে। ভিত্তিহীন অভিযোগেৰে সোণোৱাল চৰকাৰৰ ছিণ্ডিকেইটময় চিম্ফনি অৰ্কেষ্ট্ৰাৰ কৰ্কশতা ঢাক নাখায়। কয়লা ছিণ্ডিকেইটৰ প্ৰমাণ দিয়াৰ বাবে বিজেপিয়ে দিয়া প্ৰত্যাহ্বান আমি গ্ৰহণ কৰিছো। যদি পাৰে বিজেপিয়ে আমাৰ অভিযোগ নস্যাৎ কৰক”।
বড়োৰ প্ৰশ্ন, ১ আগষ্টত ক’ল ইণ্ডিয়া লিমিটেডে বাছ, ট্ৰাক বা কান্ধত ১ বস্তাও কয়লা কঢ়িয়াব নোৱাৰে বুলি নিৰ্দেশনা দিছিল। কিন্তু তাৰ পাছতো শ শ ট্ৰাকেৰে কেনেকৈ কয়লা অবৈধ্যভাৱে সৰবৰাহ হৈ আছে?
উচ্চ ন্যায়ালয়ে কিয় কয়লা ছিণ্ডিকেইটৰ বিৰুদ্ধে নিজা ববীয়াকৈ গোচৰ ল’বলৈ ক’ব লগীয়া হ’ল?
প্ৰদূষণ নিয়ন্ত্ৰণ ব’ৰ্ড, COAL INDIA LIMITED, DIRECTORATE OF GEOLOGY & MINNING-কে ধৰি বিভিন্ন বিভাগে মাৰ্ঘেৰিটা থানাত এজাহাৰ দিয়াৰ পাছতো কিয় আৰক্ষীয়ে কয়লা ছিণ্ডিকেটৰ বিৰুদ্ধে কোনো ব্যৱস্থা গ্ৰহণ কৰা নাই?
তেওঁ ৰাজ্য চৰকাৰখনক ২০০১ চনৰ পৰা এতিয়ালৈকে তিনিচুকীয়াৰ বৰ্ষাৰণ্য অঞ্চলৰ ছেটেলাইট ফটো প্ৰকাশ কৰিবলৈও দাবী জনায়।
তেওঁ প্ৰতিষ্ঠিত পৰিৱেশবিদ, অৰাজনৈতিক দলৰ মানুহ লগত লৈ গুৱাহাটীৰ সাংবাদিক, বন বিভাগৰ CCF পৰ্যায়ৰ বিশেষজ্ঞ লগত লৈ মাৰ্ঘেৰিটাৰ টিনকুপানী, ব’মগাৰা, চালেকি, তিৰাপ, বৰগোলাই, মাকোমপানীত চৰজমিন তদন্ত কৰিব পাৰিবনে বুলি প্ৰত্যাহ্বান আগ বঢ়ায় বিজেপি চৰকাৰখনক।
“বিজেপি দল আৰু চৰকাৰখনক আমাক আৰু সাংসদ প্ৰদ্যুত বৰদলৈক গালি পৰাতকৈ আমি কৰা প্ৰশ্নসমূহৰ সঠিক উত্তৰ দিবলৈ আহ্বান জনাইছো”, বড়োৰ মন্তব্য।
গৰুৰ চোৰাং সৰবৰাহ অব্যাহত থকা প্ৰসংগত কংগ্ৰেছৰ মুখপাত্ৰজনে কয়, গৰু ছিণ্ডিকেইট গৰুৱে চলোৱা নাই, মানুহে চলাইছে। চাৰে তিনিবছৰ শূন্য সহনশীলতাই একো কাম দিয়া নাই। দুৰ্নীতি বন্ধ কৰাৰ বাবে আমি বিজেপিক সুবিধা দিছো। চোৰৰ তালিকা দিয়া হৈছে। ১৯গৰাকীৰ তালিকা দিয়া হৈছে। মাৰ্ঘেৰিটাৰ বিজেপি বিধায়কৰ সোঁৱে-বাৱেঁ থকা বহু লোকৰ নাম মাইনিং বিভাগে চৰকাৰক দিছে। তাৰ পাছতো চৰকাৰে কিয় ব্যৱস্থা লোৱা নাই? কংগ্ৰেছ নেতাজনৰ প্ৰশ্ন।