যোৱা বছৰৰ ২২ এপ্ৰিলত জম্মু-কাশ্মীৰৰ পহালগামৰ ওচৰৰ বাইচাৰন উপত্যকাত সংঘটিত হোৱা ভয়ংকৰ সন্ত্ৰাসবাদী আক্ৰমণৰ আজি এবছৰ সম্পূৰ্ণ হ’ল। যোৱা দুটা দশকত সাধাৰণ নাগৰিকৰ ওপৰত হোৱা এইটোৱেই আছিল আটাইতকৈ ভয়াবহ আক্ৰমণ। সেইদিনা পাইন গছৰ অৰণ্যৰ পৰা ওলাই অহা তিনিজন সশস্ত্ৰ উগ্ৰপন্থীয়ে পৰ্যটকসকলৰ ধৰ্ম পৰিচয় সুধি হিন্দু পুৰুষসকলক পৃথক কৰি অতি ওচৰৰ পৰা গুলীয়াই হত্যা কৰিছিল।
এই মৰ্মান্তিক ঘটনাত ২৫ জন পৰ্যটক আৰু এজন স্থানীয় মুছলমান ঘোৰা চালকসহ মুঠ ২৬ জন লোকে প্ৰাণ হেৰুৱাইছিল। উগ্ৰপন্থী সংগঠন দ্য ৰেজিষ্টেন্স ফ্ৰণ্টে এই আক্ৰমণৰ দায়িত্ব স্বীকাৰ কৰিছিল আৰু তেওঁলোকে আনকি প্ৰধানমন্ত্ৰী নৰেন্দ্ৰ মোদীক এই ভয়াৱহতাৰ কথা জনাবলৈ কিছুমান মহিলাক জীৱন্তে এৰি দিছিল।
এই আক্ৰমণৰ এবছৰ পাছত বৰ্তমান সমগ্ৰ উপত্যকাত নিৰাপত্তা ব্যৱস্থা কটকটীয়া কৰা হৈছে যদিও কেন্দ্ৰীয় চৰকাৰৰ ভূমিকা এতিয়াও সমালোচনাৰ আৱৰ্তত আছে। ২০১৯ চনত ৩৭০ অনুচ্ছেদ বাতিল কৰাৰ পিছত বিজেপি চৰকাৰে কাশ্মীৰত সম্পূৰ্ণ শান্তি ঘূৰি অহা বুলি যি দাবী কৰিছিল, পহালগামৰ এই ঘটনাই সেই দাবীত এক ডাঙৰ প্ৰশ্নচিহ্ন লগাই দিলে। সেই সময়ত অঞ্চলটোত পৰ্যটকৰ ভিৰ থকাৰ পিছতো কেনেকৈ উগ্ৰপন্থীয়ে ইমান ডাঙৰ কাণ্ড সংঘটিত কৰি পলাই যাবলৈ সক্ষম হ’ল, তাক লৈ আজিও সাধাৰণ ৰাইজৰ মাজত ব্যাপক ক্ষোভ আছে।
ঘটনাৰ পিছতে চৰকাৰে পাকিস্তানক দোষাৰোপ কৰি সেনাৰ জৰিয়তে অপাৰেচন সিন্দুৰ আৰম্ভ কৰিছিল আৰু বহু লোকক আটক কৰিছিল। কিন্তু সমালোচকসকলৰ মতে কেৱল শক্তি প্ৰয়োগ বা সামৰিক অভিযানৰ জৰিয়তে এই সমস্যাৰ স্থায়ী সমাধান সম্ভৱ নহয়। আক্ৰমণৰ পিছত প্ৰায় ২৮০০ লোকক গ্ৰেপ্তাৰ কৰা হৈছিল, যাৰ বাবে ৰাষ্ট্ৰসংঘৰ বিশেষজ্ঞসকলেও উদ্বেগ প্ৰকাশ কৰিছিল। চৰকাৰে কাশ্মীৰী জনসাধাৰণৰ মন জয় কৰাৰ কথা ক’লেও তেনে ধৰণৰ গ্ৰেপ্তাৰে স্থানীয় লোকৰ মাজত পুনৰ ভয় আৰু অবিশ্বাসৰ সৃষ্টি কৰিছিল।
ইফালে কাশ্মীৰৰ তদানীন্তন ৰাজ্যপাল সত্যপাল মালিকে পিছত বিভিন্ন সাক্ষাৎকাৰত দাবী কৰিছিল যে যে চিআৰপিএফে তেওঁলোকৰ জোৱানসকলক নিবলৈ চৰকাৰৰ ওচৰত বিমান বিচাৰিছিল, কাৰণ পথছোৱা অতি সংবেদনশীল আছিল। কিন্তু কেন্দ্ৰীয় গৃহ মন্ত্ৰালয়ে সেই আবেদন নাকচ কৰিছিল।তেওঁ অভিযোগ কৰিছিল যে সেই সময়ত চোৰাংচোৱা সংস্থা চূড়ান্তভাবে ব্যৰ্থ হৈছিল। বিশেষকৈ ৩৫০ কিলোগ্ৰাম বিস্ফোৰক কঢ়িয়াই নিয়া গাড়ীখন কেইবাদিনো ধৰি সেই অঞ্চলত ঘূৰি আছিল। যিটো পথেৰে কনভয়টো গৈ আছিল, সেই পথৰ সংযোগস্থলসমূহ সঠিকভাৱে ছীল কৰা হোৱা নাছিল বুলিও তেওঁ উল্লেখ কৰিছিল।তেওঁৰ আটাইতকৈ চাঞ্চল্য্যকৰ অভিযোগটো আছিল যে যেতিয়া তেওঁ এই সুৰক্ষাৰ ত্ৰুটিসমূহৰ কথা প্ৰধানমন্ত্ৰী আৰু ৰাষ্ট্ৰীয় নিৰাপত্তা উপদেষ্টাৰ ওচৰত উত্থাপন কৰিছিল, তেতিয়া তেওঁক এই বিষয়েমৌনতা অবলম্বন কৰিবলৈ কোৱা হৈছিল।
বৰ্তমান কাশ্মীৰলৈ পুনৰ পৰ্যটক আহিবলৈ আৰম্ভ কৰিছে যদিও ৰাইজৰ মনৰ পৰা ভয় এতিয়াও সম্পূৰ্ণৰূপে আঁতৰা নাই। ইফালে, পেহেলগামৰ সেই ক’লা দিনটোৰ ভুক্তভোগী পৰিয়ালসমূহে আজিও চৰকাৰী সাহায্য আৰু ন্যায়ৰ বাবে অপেক্ষা কৰি আছে।
