মুখ্যমন্ত্ৰী হিমন্ত বিশ্ব শৰ্মাই ১৫ ফেব্ৰুৱাৰীৰ দিনা ৮৪০জন অসম লোকসেৱা আয়োগৰ পৰীক্ষাত উত্তীৰ্ণ প্ৰাৰ্থীক নিযুক্তি পত্ৰ প্ৰদান কৰি নিকা আৰু স্বচ্ছ নিযুক্তিৰ যিমানেই ঢাক-ঢোল নবজাওক কিয় সঁচা অৰ্থত যে অসম লোকসেৱা আয়োগত ৰাকেশ পালৰ আমোলৰ দৰেই দুৰ্নীতি আৰু অনিয়ম চলি আছে সেই কথা সংযুক্ত প্রতিযোগিতামূলক পৰীক্ষা ২০২২ৰ মাৰ্কশ্বীটেই প্রমাণিত কৰিছে।
এইবাৰ অসম লোকসেৱা আয়োগৰ মাৰ্কশ্বীটৰ অনিয়মেই পোহৰলৈ আনিছে বৃহৎ অনিয়ম আৰু কেলেংকাৰিৰ ছবি।।য’ত বাচনিভূক্ত এচামে সাধাৰণ অধ্যয়নৰ কাকতত অতি কম নম্বৰ (৩০%তকৈ তলত) পোৱা সত্বেও বিষয় ধৰ্মী ৰচনাৰ কাকতত ৯৫%-৯৮% পৰ্যন্ত এক অবিশ্বাস্য নম্বৰ লাভ কৰি বাচনিভূক্ত হৈছে।
উল্লেখ্য যে সেইসকল প্ৰাৰ্থীয়ে আকৌ মৌখিক পৰীক্ষাতো লাভ কৰিছে অতি উচ্চ নম্বৰ। ইয়াৰ বিপৰীতে বহু মেধাৱী প্ৰাৰ্থীৰ পৰীক্ষাত বহাৰ পিছতো এখন কাকতৰ নম্বৰ মার্কশ্বীটৰ পৰা অন্তৰ্যান।
বহুতে আকৌ সাধাৰণ অধ্যয়নত খুব ভাল নম্বৰ লাভ কৰাৰ পিছতো ৰচনাৰ কাকতত লাভ কৰিলে আশ্চৰ্যজনকভাৱে কম নম্বৰ।
উল্লেখ্য যে এই ধৰণৰ ঘটনা ৰাকেশ পালৰ আমোলত খুবেই সাধাৰণ আছিল আৰু এনে ধৰণৰ অদ্ভুত নম্বৰ লাভ কৰা বহু প্রাথী আনকি পৰবৰ্তীকালত গ্ৰেপ্তাৰো হৈছিল।
গতিকে আয়োগৰ বৰ্তমানৰ অধ্যক্ষ ভাৰত ভূষণ দেৱচৌধুৰী ৰাকেশ পালৰ অন্য এক সংস্কৰণ বুলি অভিযোগ আহিছে। তদুপৰি এই একেজন ভাৰত ভূষণ দেৱচৌধুৰী ৰাকেশ পালৰ আমোলৰ ২০১৪ বৰ্ষৰ সংযুক্ত প্ৰতিযোগিতামূলক পৰীক্ষাৰ সময়ত মুখ্য পৰীক্ষা নিয়ন্তক আছিল আৰু আনকি ন্যায়াধীশ বিপ্লৱ কুমাৰ শৰ্মা তদন্ত আয়োগে তেখেতক জাননীও জাৰি কৰিছিল।
উল্লেখ্য যে এই প্ৰতিবেদন ন্যায়িক আয়োগে বিগত নবেম্বৰ মাহতেই চৰকাৰক দাখিল কৰিলে যদিও আজিলৈ প্রতিবেদন ৰাজহুৱা কৰা নাই। আয়োগৰ বৰ্তমানৰ পৰীক্ষা নিয়ন্তকজনো আয়োগৰ আন এক দুৰ্নীতিগ্ৰস্ত অধ্যক্ষ তাৰাপ্রসাদ দাসৰ বাচনিভূক্ত বিষয়া বুবু-বাবা চলিছিল৷ ৰহস্যজনকভাৱে ১৭ জানুৱাৰীত ফলাফল দি আজিলৈকে এই সকল বিষয়ববীয়াই প্রকাশ নকৰিলে মূল পৰীক্ষাৰ কাট অফ নম্বৰ।
তদুপৰি তথ্য জনাৰ অধিকাৰ আইনক সম্পূৰ্ণ অংগুষ্ঠ প্ৰদৰ্শন কৰি প্ৰাৰ্থীসকলক নিজৰ উত্তৰবহীখনো প্ৰদান কৰা নাই এপিএছচিয়ে৷ বেংকৰ জালিয়াতি আৰু এপিএছচিত দালালিৰ অভিযোগ থকা প্রাৰ্থীও বাচনিভূক্ত হৈছে আয়োগৰ পৰীক্ষাৰ এচিএছৰ শীৰ্ষ স্থানত। আয়োগৰ ভিতৰচৰাৰ একাংশ দুৰ্নীতিগ্ৰস্ত কৰ্মচাৰীৰ নামো শেহতীয়াকৈ পোহৰলৈ আহিছে।
গতিকে অসম চৰকাৰক সংযুক্ত প্রতিযোগিতামূলক পৰীক্ষা ২০২২ৰ সকলো অনিয়ম আৰু কেলেংকাৰি সামৰি এক ন্যায়িক তদন্তৰ দাবী জনাইছে ডিৱাইএফআই-এ।
