“ৰাজ্যজুৰি তুলপাৰ লগোৱা এপিএছচি কেলেংকাৰীৰ তদন্তত এইবাৰ পুনৰ নতুন পাক! ২০১৩ চনৰ সংযুক্ত প্ৰতিযোগিতামূলক পৰীক্ষাৰ সংঘটিত হোৱা ব্যাপক অনিয়ম আৰু লুণ্ঠনৰ বিৰুদ্ধে যুঁজি থকা এক সংগঠনে এই বৃহৎ নগদ ধনৰ কেলেংকাৰীৰ তদন্ত অধিক সম্প্ৰসাৰণৰ বাবে বিশেষ তদন্তকাৰী দলক আবেদন জনাইছে।
বিশেষ তদন্তকাৰী দলৰ মুৰব্বী তথা অতিৰিক্ত আৰক্ষী অধীক্ষক (চিআইডি) মুন্না প্ৰসাদ গুপ্তালৈ প্ৰেৰণ কৰা এখন সবিশেষ পত্ৰত মানস প্ৰতিম বৰুৱাৰ নেতৃত্বত মঞ্চখনে গুৰুতৰ অভিযোগ উত্থাপন কৰিছে। এই সংগঠনৰ মতে, অৱসৰপ্ৰাপ্ত ন্যায়াধীশ বি.কে. শৰ্মা তদন্ত আয়োগৰ প্ৰতিবেদনত নাম থকা কেইবাজনো “হিতাধিকাৰী আৰু অপৰাধী” এতিয়াও তদন্তৰ পৰিসৰৰ বাহিৰত আছে আৰু তেওঁলোকে উচ্চপদস্থ প্ৰশাসনিক পদত অধিষ্ঠিত হৈ আছে।
আবেদনখনত উল্লেখ কৰা হৈছে যে বহু ব্যক্তিৰ বিৰুদ্ধে ইতিমধ্যে অভিযোগনামা দাখিল কৰা হৈছে যদিও “সন্দেহজনক” পটভূমিৰ কেইবাজনো বিষয়া এতিয়াও সেৱাত বাহাল আছে। মঞ্চখনে বিশেষভাৱে মিতালী লহকৰ (ACS) আৰু নয়নমণি বৰ্মনক (APS) “উত্তৰ বহি সন্ধানহীন হোৱা বিতৰ্ৰক” সৈতে জড়িত বুলি উল্লেখ কৰে।
তদন্তৰ আওতালৈ নহা আন কেইগৰাকীমান বিষয়া হ’ল— অভিজ্ঞান নাথ (সহকাৰী নিয়োগ বিষয়া), মুকুল চেতিয়া (আবকাৰী পৰিদৰ্শক), স্নেহা ডেকা (সমবায় সমিতিৰ সহকাৰী পঞ্জীয়ক), মিনাৰ্ভা দেৱী আৰামবাম (ACS), আৰু বীৰবল ব্ৰহ্ম (কৰ পৰিদৰ্শক) আদি।
এই সংগঠনে তেওঁলোকৰ অভিযোগত একেটা পৰীক্ষাতে নিৰ্বাচিত হোৱা কেইবাযোৰো ভাই-ভনী আৰু দম্পতীৰ নিযুক্তিৰ ওপৰতো আলোকপাত কৰিছে। তেওঁলোকে আঙুলিয়াই দিয়ে যে এনে বহু ক্ষেত্ৰত পৰিয়ালটোৰ এজন সদস্যক গ্ৰেপ্তাৰ বা নিলম্বন কৰা হৈছে যদিও আনজন সদস্যই এতিয়াও নিৰ্বিঘ্নে নিজৰ চাকৰি অব্যাহত ৰাখিছে।
এইসকলৰ ভিতৰত আছে— নবনীতা শৰ্মা আৰু প্ৰিয়ংকু জ্যোতি শৰ্মা, মিতালী লহকৰ আৰু দিপাংকৰ দত্ত লহকৰ, আসীমা কলিতা আৰু মুনমী কলিতা, অৰুণ কুমাৰ বৰা আৰু নিৰ্মালী বৰা, ৰাজ বৰুৱা আৰু বিৰাজ বৰুৱা, অনিতা হাজৰিকা আৰু মৃদুল হাজৰিকা, নিতুমণি দাস আৰু নিৰঞ্জনা চলিহা, হৃতুৰাজ গগৈ আৰু অনিতা কোঁৱৰ, আৰু ৰশ্মি ৰেখা দেৱী আৰু কংকন শৰ্মা। মঞ্চৰ মতে, নবনীতা শৰ্মা, দিপাংকৰ দত্ত লহকৰ, আসীমা কলিতা, মৃদুল হাজৰিকা, নিতুমণি দাস আৰু হৃতুৰাজ গগৈ ইতিমধ্যে অভিযুক্ত হৈছে যদিও তেওঁলোকৰ আত্মীয়সকলৰ বিৰুদ্ধে কোনো তদন্ত হোৱা নাই।
তদুপৰি তেতিয়াৰ পৰীক্ষাৰ প্ৰধান নিয়ন্ত্ৰক নন্দ বাবু সিংহৰ কন্যা মিনাৰ্ভা দেৱী আৰামবাম (ACS) আৰু সহকাৰী নিয়ন্ত্ৰক পবিত্ৰ কৈৱৰ্তৰ জোঁৱাই অজিত কলিতাৰ (ACS) বাছনি সন্দৰ্ভত গুৰুতৰ প্ৰশ্ন উত্থাপন হৈছে। অভিযোগ অনুসৰি, মিনাৰ্ভা দেৱী আৰামবামে তেওঁৰ ঘনিষ্ঠ সহযোগী সুষ্মিতা পেগুৰ জৰিয়তে পৰীক্ষাৰ পূৰ্বেই প্ৰশ্নকাকত লাভ কৰিছিল।
ইয়াৰ উপৰিও সংগঠনটোৱে এপিএছচিৰ প্ৰাক্তন অধ্যক্ষ ৰাকেশ কুমাৰ পলৰ বাসগৃহৰ পৰা জব্দ কৰা ৯খন “লুজ টেবুলেচন শ্বীট”ত (Loose Tabulation Sheets) নাম থকা প্ৰতিগৰাকী ব্যক্তিৰ বিৰুদ্ধে সম্পূৰ্ণ তদন্ত চলোৱাৰ দাবী জনাইছে।
