এনআৰচিৰ প্ৰাক্তন ৰাজ্যিক সমন্বয়ক প্ৰতীক হাজেলাৰ বিৰুদ্ধে আজি অৰ্থাৎ বৃহস্পতিবাৰে চিবিআইত গোচৰ দিয়ে অসম পাব্লিক ৱৰ্কচ চমুকৈ APW য়ে।
সংগঠনটোৰ হৈ ৰাজীৱ বৰাই এক লেখ আবেদনৰ জৰিয়তে মহানগৰীৰ বেতকুচিস্থিত চিবিআই অসম শাখাৰ মুখ্য কাৰ্য্যালয়ত গোচৰ দিয়ে।
লেখ আবেদনত বৰাই স্পষ্টকৈ উল্লেখ কৰিছে যে তথ্য অনুসৰি এনআৰচি প্ৰক্ৰিয়াটোত এক বিশাল দুৰ্নীতি হৈছিল।
‘এইটো উল্লেখ কৰা প্ৰয়োজনীয় যে উল্লেখিত বিষয়াজনে কেনেধৰণে এনআৰচিৰ কাম-কাজ কৰিছিল তাৰ কোনো ৰেকৰ্ড নাই বা কেগৰ দ্বাৰা নিৰীক্ষণ কৰা হোৱা নাই।‘ বৰাৰ লেখ আবেদনত উল্লেখ।
বৰাই আৰু লিখিছে ‘বিদ্যালয়ৰ বৃহৎ সংখ্যক শিক্ষকক প্ৰতীক হাজেলাৰ দ্বাৰা এনআৰচি উন্নীতকৰণ প্ৰক্ৰিয়াত নিয়োগ কৰা হৈছিল। কোনো এগৰাকী শিক্ষককে তেওঁলোকৰ পাৰিশ্ৰমিক দিয়া হোৱা নাই, কিন্তু বৃহৎ পৰিমাণৰ ধন শিক্ষকসকলক দিয়া বুলি দেখুওৱা হৈছে। এই প্ৰক্ৰিয়াত প্ৰতীক হাজেলাই মোটা অংকৰ অৰ্থ অপব্যৱহাৰ কৰিছে।‘
‘হাজেলাৰ দুৰ্নীতি’ৰ অন্য এক উদাহৰণ দি আবেদনত বৰাই লিখিছে ‘প্ৰতীক হাজেলাই ১০০০০ লেপটপ প্ৰতিটোৰ বাবদ ৪৪ হাজাৰ টকাকৈ ক্ৰয় কৰা দেখাইছে। কিন্তু সমীক্ষাৰ পৰা জানিব পৰা মতে এনেধৰণৰ একোটা লেপটপৰ মূল্য ২২,৫০০ টকা। এইটোও দুৰ্নীতিৰ এটা উদাহৰণ।‘
প্ৰায় ১১ হাজাৰ বৈদ্যুতিক জেনেৰেটৰ প্ৰকৃত মূল্যতকৈ দুগুণ মূল্যত হাজেলাই ক্ৰয় কৰিছিল বুলিও আবেদনত উল্লেখ আছে।
‘এইটো সৰ্বজনবিদিত সত্য যে পূৰ্বৰ এনআৰচিৰ ৰাজ্যিক সমন্বয়ক প্ৰতীক হাজেলাক উচ্চতম ন্যায়ালয়ে সুৰক্ষা নামত লৈ গ’ল। কোনোধৰণৰ সংবিধিবদ্ধ হিচাপ নিকাচ দিবলৈ প্ৰতীক হাজেলাক অনুমতি নিদিলে কিয়নো ইয়াত এক বৃহৎ আৰ্থিক অনিয়ম কৰা হৈছে। যদি অনুসন্ধান কৰা হয় তাৰ সত্যটো প্ৰকাশ পাব।‘ বৰাই লগতে লিখিছে।
বৰাই আবেদনত আৰু কয় ‘এনআৰচি উন্নীতকৰণ প্ৰক্ৰিয়াটো কেন্দ্ৰীয় বিষয় হিচাপে আইন মতে কেন্দ্ৰীয় চৰকাৰে প্ৰতিনিধিত্ব কৰিব লাগে। কিন্তু প্ৰতীক হাজেলাই নিজৰ খায়েল খুচি অনুসৰি এজন ব্যক্তিগত পৰামৰ্শদাতা নিযুক্তি দিছিল য’ত ভাৰতৰ মহাপঞ্জীয়কৰ কোনো অনুমোদন নাছিল।‘
গতিকে আবেদনৰ জৰিয়তে বৰাই সমগ্ৰ বিষয়টোৰ এক উচ্চস্তৰীয় তদন্ত দাবী কৰে।
