সোমবাৰে জম্মু-কাশ্মীৰৰ অনন্তনাগ জিলাত নিৰাপত্তাৰক্ষী আৰু সন্ত্ৰাসবাদীৰ মাজত সংঘটিত এক সংঘৰ্ষৰ সময়ত ভাৰতীয় সেনাৰ প্ৰশিক্ষণপ্ৰাপ্ত এটা কুকুৰ গুৰুতৰভাৱে আহত হয়। এই আহত কুকুৰটোৰ বীৰত্বৰ কাহিনীয়ে এতিয়া লাভ কৰিছে ব্যাপক চৰ্চা।
দেওবাৰে নিশা টাংপাৱা অঞ্চলত সন্ত্ৰাসবাদীৰ উপস্থিতিৰ বিষয়ে তথ্য লাভ কৰাৰ পিছত নিৰাপত্তাৰক্ষী বাহিনীয়ে তালাচী অভিযান আৰম্ভ কৰে। সোমবাৰে পুৱা সেনাই জুম নামৰ কুকুৰটোক সন্ত্ৰাসবাদী থকা ঘৰটোৰ ভিতৰলৈ প্ৰেৰণ কৰে।
সেনাৰ এগৰাকী বিষয়াই জানিবলৈ দিয়া মতে জুম এক উচ্চ প্ৰশিক্ষিত আৰু দক্ষ কেনাইন। সন্ত্ৰাসবাদীৰ সন্ধান উলিওৱাৰ বাবে বিশেষভাৱে প্ৰশিক্ষণ দিয়া জুম নামৰ এই কুকুৰটোৱে দক্ষিণ কাশ্মীৰত বহুকেইটা অভিযানৰ অংশ হিচাপে সেৱা আগবঢ়াইছে বুলি তেওঁলোকে কয়।
সোমবাৰে জুমক আন অভিযানৰ দৰেই সন্ত্ৰাসবাদী লুকাই থকা ঘৰটোত প্ৰাথমিক আক্ৰমণৰ দায়িত্ব দিয়া হৈছিল। দুৰ্ভাগ্যবশতঃ অভিযানৰ সময়ত জুমৰ শৰীৰত দুটাকৈ গুলী লাগে আৰু গুৰুতৰভাৱে আঘাতপ্ৰাপ্ত হয়।
অভিযানৰ তদাৰক কৰা এগৰাকী বিষয়াই জানিবলৈ দিয়া মতে গুৰুতৰ আঘাতৰ পাছতো জুমে বীৰত্বৰে যুঁজ দিয়ে আৰু জুমৰ এই সাহসিকতাৰ সহায়তে দুই সন্ত্ৰাসবাদী নিহত হয়।
অভিযানৰ মাজতে জুমক ততাতৈয়াকৈ সেনাৰ ভেট চিকিৎসালয়লৈ লৈ যোৱা হয়। বৰ্তমান জুম এই চিকিৎসালয়তে চিকিৎসাধীন হৈ আছে বুলি বিষয়াগৰাকীয়ে জানিবলৈ দিয়ে।
ইফালে এনকাউণ্টাৰটোত নিহত সন্ত্ৰাসবাদী দুগৰাকীক লস্কৰ-ই-তৈবাৰ সদস্য বুলি চিনাক্ত কৰা হৈছে। আনহাতে সংঘৰ্ষৰ সময়ত কেইগৰাকীমান সেনা জোৱানো আঘাতপ্ৰাপ্ত হয় বুলি সেনাৰ বিষয়াগৰাকীয়ে জানিবলৈ দিয়ে।
