বিধানসভা নিৰ্বাচনৰ দ্বিতীয় পৰ্যায়ৰ ভোটগ্ৰহণ শেষ হোৱাৰ আগতেই পুনৰ মাওবাদীৰ আক্ৰমণত ৰক্তাক্ত হৈ পৰিছে ছত্তীশগড়।
শুকুৰবাৰে সন্ধিয়া মাওবাদীয়ে ছত্তীশগড়ৰ বিন্দ্ৰনাগড় অঞ্চলত ভোটগ্ৰহণ কৰ্মীক লক্ষ্য কৰি আই ই ডি বিস্ফোৰণ কৰে।
অৱশ্যে এই বিস্ফোৰণত ভোটগ্ৰহণ কৰ্মী সকলৰ প্ৰাণ কথমপি ৰক্ষা পৰে যদিও ১ জন সেনা-জোৱানৰ মৃত্যু হয়।
আজিৰ দিনটোতে ছত্তীশগড়ত দ্বিতীয় আৰু অন্তিম ৰাউণ্ডৰ ভোটগ্ৰহণ অনুষ্ঠিত হয়। সন্ধিয়া ভোটগ্ৰহণ শেষ হোৱাৰ পিছত বুথৰ পৰা ওলাই আহি ঘৰলৈ উভতি আহিছিল ভোটগ্ৰহণ কৰ্মীসকল। ভোটগ্ৰহণ কৰ্মীসকলৰ নিৰাপত্তাৰ বাবে তেওঁলোকৰ লগত সেনা জোৱান আছিল। মাওবাদীয়ে তেওঁলোকক লক্ষ্য কৰি আই ই ডি বিস্ফোৰণ কৰে।
বীন্দ্ৰানৱগড়ৰ এজন আৰক্ষী বিষয়াই জনোৱা মতে, ভোটগ্ৰহণৰ পিছত ভোটগ্ৰহণ কৰ্মী ওলাই আহে আৰু খল্লাৰি-গতাপুৰ পথত টহল দিবলৈ জোৱান ওলাই আহে। সেই সময়ত মাওবাদীয়ে আই ই ডি বিস্ফোৰণ কৰিছিল।
উল্লেখ্য যে যোৱা ৭ নৱেম্বৰত ছত্তীশগড়ত প্ৰথম পৰ্যায়ৰ ভোটগ্ৰহণ অনুষ্ঠিত হৈছিল। ইয়াৰ আগৰ নিশা ৬ নৱেম্বৰত ছত্তীশগড়ৰ কনক জালাত এটা আই ই ডি বিস্ফোৰণ ঘটিছিল। বিস্ফোৰণত বিএছএফৰ এজন জোৱানকে ধৰি দুজন ভোটগ্ৰহণ কৰ্মী আহত হৈছিল।
আজিৰ দিনটোত দ্বিতীয় পৰ্যায়ত ছত্তীশগড়ৰ ১৯খন জিলাৰ ৭০টা বিধানসভা সমষ্টিত ভোটগ্ৰহণ অনুষ্ঠিত হয়। মুঠ প্ৰাৰ্থীৰ সংখ্যা আছিল ৯৫৮ জন। ছত্তীশগড়ৰ সমান্তৰালকৈ আজিৰ দিনটোতে মধ্যপ্ৰদেশতো বিধানসভা নিৰ্বাচন অনুষ্ঠিত হয়। এই নিৰ্বাচনৰ ফলাফল অহা ৩ ডিচেম্বৰত প্ৰকাশ ।
