বিশ্বৰ বিভিন্ন প্ৰান্তত ক’ৰ’না ভাইৰাছে আতংকৰ সৃষ্টি কৰাৰ সময়তে গোৱালপাৰাৰ মৰনৈৰ নেপালীখুঁটীত প্ৰাদুৰ্ভাৱ হৈছে এক অচিন ৰোগৰ।
যোৱা ৬ মাৰ্চৰ পৰা এতিয়ালৈকে ২৮ গৰাকী লোক এই ৰোগত আক্ৰান্ত হৈছে আৰু চিকিৎসালয়ত ভৰ্তি কৰোৱা হৈছে।
গাঁওবাসীয়ে জনোৱা মতে, যোৱা ৬ মাৰ্চৰ নিশা হঠাৎ এগৰাকী ১৮ বছৰীয়া যুৱক শ্বাস-প্ৰশ্বাস জনিত কাৰণত মৃত্যু মুখত পৰে। আৰু তাৰ ঠিক কেই ঘন্টামান পিছতেই ৭ মাৰ্চৰ সন্ধিয়াও একে কাৰণতে আন এগৰাকী মহিলাৰ মৃত্যু হয়।
গাঁওখনত দুগৰাকী লোকৰ মৃত্যু হোৱাৰ খবৰে অঞ্চলটোত চাঞ্চল্যৰ সৃষ্টি কৰাৰ লগতে ৮ মাৰ্চৰ দিনাখন এক হাহাকাৰময় পৰিৱেশৰ সৃষ্টি হয়। কাৰণ, এজন এজনকৈ পুৰুষ-মহিলা শ্বাস-প্ৰশ্বাসত কষ্ট পাবলৈ ধৰে, বুকুত বিষ অনুভৱ কৰে আৰু অচেতন হৈ পৰে।
লগে লগে মৰনৈ চিকিৎসালয়ত খবৰ দিয়া হয় আৰু চিকিৎসালয়ৰ এটা দল আহে গাঁওখনলৈ। দলটোৱে প্ৰাথমিক চিকিৎসা প্ৰদান কৰি সকলো ৰোগীকে গোৱালপাৰা অসামৰিক চিকিৎসালয়লৈ প্ৰেৰণ কৰে।
এই অচিন ৰোগত আক্ৰান্ত অধিকাংশই হৈছে যুৱতী আৰু মহিলা।
ৰোগী সকল কি ৰোগত আক্ৰান্ত হৈছে চিকিৎসকে সেয়া স্পষ্টকৈ কোৱা নাই যদিও এয়া একপ্ৰকাৰ মানসিক ৰোগ বুলিহে ৰোগীৰ পৰিয়ালক জানিবলৈ দিয়ে।
কিন্তু গাঁওবাসীয়ে সেয়া মানি ল’বলৈ টান পাইছে আৰু স্বাস্থ্য বিভাগক এই ৰোগটো প্ৰকৃতাৰ্থত কি ৰোগ সেয়া নিশ্চিত কৰিবলৈ আহ্বান জনাইছে।
আনহাতে চিকিৎসালয়ত ভৰ্তি হোৱা কেইগৰাকী মান মহিলাক ঘৰলৈ আহিবলৈ দিয়ে যদিও চিকিৎসালয়ত এতিয়াও চিকিৎসাধীন হৈ আছে ৯ গৰাকী লোক।
