যোৱা ১০ নৱেম্বৰত ৰাজধানী দিল্লীত সংঘটিত হোৱা ভয়ংকৰ বোমা বিস্ফোৰণৰ ঘটনাৰ তদন্ত আগবঢ়াৰ লগে লগে কেইবাটাও চাঞ্চল্যকৰ তথ্য পোহৰলৈ আহিছে। এই সন্ত্ৰাসবাদী আক্ৰমণত ১৩ জন লোক নিহত আৰু কেইবাজনো আহত হৈছিল।
তদন্তকাৰী সংস্থাই এই কাণ্ডৰ সৈতে জড়িত থকাৰ অভিযোগত গ্ৰেপ্তাৰ কৰা ডাঃ মুজাম্মিলৰ ফোনত উদ্ধাৰ হৈছে প্ৰায় ২০০ টা ভিডিঅ’, য’ত আছে জৈছ-ই-মহম্মদ আৰু আইছিচৰ ঘৃণনীয় ভাষণ আৰু অপপ্ৰচাৰ।
ইয়াৰে প্ৰায় ৮০ টা ভিডিঅ’ত বোমা নিৰ্মাণৰ পদ্ধতি আৰু সন্ত্ৰাসবাদী প্ৰশিক্ষণৰ সৈতে জড়িত তথ্য আছে।
প্ৰাপ্ত তথ্য অনুসৰি, ডাঃ মুজাম্মিলে ২০২২ চনত তুৰ্কীত ছিৰিয়াৰ আইছিছৰ এজন কমাণ্ডাৰক সাক্ষাৎ কৰিছিল। এই বৈঠক জৈছৰ নিৰ্দেশত হৈছিল আৰু সেই সময়তে তেওঁলোকে বোমা নিৰ্মাণৰ প্ৰশিক্ষণ লাভ কৰিছিল।
মুজাম্মিলৰ ফোনৰ পৰা উত্তৰ প্ৰদেশ, মুম্বাই, দিল্লীকে ধৰি বিভিন্ন ঠাইৰ ধৰ্মীয়স্থল আৰু বজাৰৰ ভিডিঅ’ও উদ্ধাৰ কৰা হৈছে।
আৰক্ষীয়ে মুজাম্মিল, আদিল, শ্বাহীন, আৰু ইৰফানকে ধৰি গ্ৰেপ্তাৰ হোৱা চিকিৎসকসকলৰ ফোনৰ পৰা ডিলিট কৰা বহুতো গুৰুত্বপূৰ্ণ তথ্যও উদ্ধাৰ কৰিছে।
এই বিস্ফোৰণৰ কাণ্ডত এতিয়ালৈকে গ্ৰেপ্তাৰ হোৱা লোকসকলৰ অধিকাংশই হৈছে চিকিৎসক। বিস্ফোৰণ সংঘটিত কৰা ওমৰ নামৰ সন্ত্ৰাসবাদীজনো আছিল এজন চিকিৎসক। এই গ্ৰেপ্তাৰসমূহে এটি “শ্বেত-কলাৰ সন্ত্ৰাসবাদী নেটৱৰ্ক” (White-Collar Terror Network) উন্মোচন কৰিছে।
বৰ্তমান সমগ্ৰ ঘটনাৰ তদন্ত অব্যাহত আছে আৰু ইয়াৰ জৰিয়তে আৰু অধিক তথ্য পোহৰলৈ অহাৰ সম্ভাৱনা আছে।
