অৰুণাচল প্ৰদেশৰ চিম্পুত নতুনকৈ স্থাপন কৰা বিধায়ক কলনিক ৪০ খন বিচনাযুক্ত কোভিড-১৯ হাস্পাতাল লৈ ৰূপান্তৰ কৰাৰ বাবে অৰুণাচল প্ৰদেশ চৰকাৰে লোৱা সিদ্ধান্তই ৰাজ্যখনত বিতৰ্কৰ সৃষ্টি কৰিছে।
স্থানীয় লোকে ইয়াৰ বিৰুদ্ধে প্ৰতিবাদ সাব্যস্ত কৰি ইয়াৰ ফলত স্থানীয় নাগৰিকসকলৰ জীৱনলৈও প্ৰত্যাহ্বান আহিব বুলি উল্লেখ কৰে।
অৰুণাচল প্ৰদেশৰ নাহৰলগুনত থকা তামো ৰিবা ইষ্টিটিউট অফ হেল্থ এণ্ড মেডিকেল চায়েঞ্চখন সম্পুৰ্ণ ৰূপে ৰোগীৰে ভৰি পৰাৰ পাছতে অৰুণাচল প্ৰদেশ চৰকাৰে এই সিদ্ধান্ত গ্ৰহণ কৰে।
চিম্পুৰ নাগৰিক সকলে মঙলবাৰে পথত বাহ বান্ধি বিধায়ক কলনিক কোভিড-১৯ কেন্দ্ৰলৈ ৰূপান্তৰ কৰা সিদ্ধান্তৰ বিৰুদ্ধে প্ৰতিবাদ সাব্যস্ত কৰে।
আনহাতে, ইটানগৰ ৰাজধানী অঞ্চলৰ জিলা উপায়ুক্ত কোমকাৰ দুলোমে এই সম্পৰ্কত স্থানীয় নাগৰিক সকলৰ সৈতে আলোচনা কৰি বিষয়টো সমাধান কৰাৰ বাবে চেষ্টা চলায় থকা হৈছে বুলি কয়।
ইয়াৰ পূৰ্বে স্বাস্থ্য মন্ত্ৰী আলো লিবাং, মুখ্য স্বাস্থ্য সচিৱ পি পাৰ্থিৱানে চিম্পুত থকা বিধায়ক কলনি পৰিদৰ্শন কৰি পৰিস্থিতিৰ বুজ লৈ কোভিড কেন্দ্ৰ হিচাপে উন্নীত কৰিব বিচৰা আৱসিক অঞ্চল সমূহৰ পৰিদৰ্শন কৰে।
