বিজেপিৰ শক্তিশালী স্তম্ভ তথা প্ৰথম মোদী চৰকাৰৰ অন্যতম কাণ্ডাৰী আছিল প্ৰয়াত প্ৰাক্তন বিত্ত মন্ত্ৰী অৰুণ জেটলী। তেওঁৰ মৃত্যুৰ পাছতে পৰিয়ালৰ কাষত গৈ থিয় হৈছিল প্ৰধান মন্ত্ৰী মোদী আৰু গৃহ মন্ত্ৰী অমিত শ্বাহ।
কিন্তু ক’ৰবাত যেন যতি পৰিছে সম্পৰ্কৰ। মোদী চৰকাৰৰ দ্বিতীয়টো কাৰ্যকালৰ আৰম্ভণিতে ইয়াৰ ইংগিতো পোৱা গৈছিল।
এইবাৰ মোদী চৰকাৰৰ পেন্সন গ্ৰহণ কৰিবলৈ অস্বীকাৰ কৰিছে জেটলীৰ পৰিয়ালে।
জানিব পৰা মতে, অৰুণ জেটলীৰ পৰিয়ালে ৰাজ্যসভাৰ অধ্যক্ষলৈ এখন পত্ৰ প্ৰেৰণ কৰি পেন্সন নোলোৱাৰ সিদ্ধান্তৰ কথা জনায় দিছে।
ৰাজ্যসভাৰ সদস্য থকাৰ বাবে তেওঁ চৰকাৰী নিয়ম অনুসৰি পেন্সন লাভ কৰিব লাগে। মৃত্যুৰ পাছতো তেওঁৰ পৰিয়ালে পেন্সন পাব লাগে। কিন্তু সেই পেন্সন ল’বলৈ অস্বীকাৰ কৰিছে পৰিয়ালৰ সদস্যসকলে।
ৰাজ্যসভাৰ অধ্যক্ষলৈ প্ৰেৰণ কৰা পত্ৰখনত জেটলীৰ পৰিয়ালে লিখিছে যে ৰাজ্যসভাত কৰ্মৰত বহু কৰ্মচাৰীৰ মাহিলি দৰমহা কম। তেওঁলোকে বিচাৰে যে তেওঁলোকৰ সেই পেন্সনৰ ধন সেই কম দৰমহা লাভ কৰা কৰ্মচাৰীসকলৰ মাজত ভগাই দিয়ক।
সাংসদ হৈ থকাৰ সময়ছোৱাত জেটলীয়ে মাহে প্ৰায় ৫০ হাজাৰ টকা পেন্সন পাইছিল। সেই হিচাপে মৃত্যুৰ পাছত তেওঁৰ পৰিয়ালে মাহে তাৰ আধা অৰ্থাৎ প্ৰায় ২৫ হাজাৰ টকা পাব লাগে।
উল্লেখ্য যে কিছুদিন ধৰি গুৰুতৰভাৱে অসুস্থ থকাৰ পাছত যোৱা ২৩ আগষ্টত প্ৰাক্তন বিত্ত মন্ত্ৰী জেটলীৰ ৬৬ বছ বয়সত পৰলোকপ্ৰাপ্তি ঘটিছিল।
উল্লেখ্য যে মোদী চৰকাৰৰ প্ৰথমটো কাৰ্যকালত গুৰুত্বপূৰ্ণ দপ্তৰ চম্ভালিছিল। কিন্তু অমিত শ্বাহৰ পদাৰ্পণৰ পাছতে গেৰুৱা শিৱিৰত তেওঁৰ গুৰুত্ব কমি আহে।
দলৰ একান্ত অনুগত থাকিয়েই তেওঁ কেতিয়াও দলৰ বিৰুদ্ধে মুকলিকৈ ক্ষোভ প্ৰকাশ কৰা নাছিল।
সাংসদসকলে শকত পৰিমানৰ দৰমহা লাভ কৰে যদিও আন কৰ্মচাৰীসকলৰ দৰমহা বহু কম। জেটলী পৰিয়ালে সেই দিশতো চৰকাৰৰ দৃষ্টি আকৰ্ষণ কৰিলে।
