তিনিচুকীয়া জিলাৰ সীমামূৰীয়া অৰুণাচল প্ৰদেশৰ ল’ৱাৰ ডিবাং ভেলী জিলাৰ ৰয়িঙত অৰুণাচল আৰক্ষীয়ে শনিবাৰে এন ডি এফ বিৰ দুজন প্ৰাক্তন সদস্যসহ সৰ্বমুঠ ৮ জন ডকাইতক গ্ৰেপ্তাৰ কৰিবলৈ সক্ষম হয়। অৰুণাচল আৰক্ষীৰ এক সূত্ৰই জনোৱা অনুসৰি বেংক ডকাইতি, এ টি এম লুট আৰু অপহৰণ কাণ্ড সংঘটিত কৰাৰ উদ্দেশ্যে এই দলটোৱে অৰুণাচলত প্ৰৱেশ কৰিছিল।
অৰুণাচল আৰক্ষীয়ে এই সম্পৰ্কে আগতীয়াকে লাভ কৰা তথ্যৰ ভিত্তিত দলটোৰ সন্ধানত কালি সন্ধিয়া আৰক্ষীয়ে ৰয়িঙৰ মেকা তিনিআলিত তালাচী অভিযান চলাইছিল আৰু তেতিয়াই উক্ত দলটোক কৰায়ত্ত কৰিবলৈ সক্ষম হয় ৷
সূত্ৰটোৱে জানিবলৈ দিয়া মতে ডকাইতৰ দলটোৱে আৰক্ষীলৈ লক্ষ্য কৰি কেইবাজাইও গুলীচালনা কৰিছিল। ইয়াৰ প্ৰত্যুত্তৰত আৰক্ষীয়েও গুলীচালনা কৰে বুলি জানিব পৰা গৈছে। অৱশ্যে এই সংঘৰ্ষত কোনো লোক হতাহতি হোৱা নাই ৷
উক্ত দলটোৰ পৰা তিনিটা চীনত নিৰ্মিত .৩২ পিষ্টল, ৯টা সজীৱ গুলী,তাঁৰ কটা যন্ত্ৰ, ৬টা ম’বাইল হেণ্ডছেটৰ লগতে আপত্তিজনক বহু নথিপত্ৰ উদ্ধাৰ কৰিবলৈ সক্ষম হয়। আৰক্ষীয়ে প্রকাশ কৰা অনুসৰি দলটোত এন ডি এফ বিৰ দুজন প্ৰাক্তন সদস্যও উক্ত দলটোত আছে।
অৰুণাচল আৰক্ষীয়ে ইতিমধ্যে নিজৰ জিম্মাত লৈ তদন্ত অব্যাহত ৰাখিছে বুলি জানিব পৰা গৈছে। অৰুণাচল আৰক্ষীয়ে এই ৮ জন ডকাইতক গ্ৰেপ্তাৰ কৰাৰ ফলত চুবুৰীয়া ৰাজ্যখনত ভয়ংকৰ অপহৰণ আৰু বেংক ডকাইতিৰ পৰা ৰক্ষা পৰে।
