দুবছৰীয়া এগৰাকী শিশুকে ধৰি ৩৩ গৰাকী লোক অৰুণাচল প্ৰদেশত নতুনকৈ কোভিড-১৯ প’জিটিভ হিচাপে চিনাক্ত হৈছে।
অৰুণাচল প্ৰদেশৰ স্বাস্থ্য বিভাগৰ এগৰাকী বিষয়াই শনিবাৰে এই কথা উল্লেখ কৰে।
ৰাজ্যখনত নতুনকৈ ক’ৰ’না আক্ৰান্ত হোৱা ৩৩ গৰাকী লোকৰ ভিতৰত ২৮ গৰাকী লোক কেপিটেল কম্প্লেক্সৰ আনহাতে তিনিগৰাকী লোক চাংগাঙ জিলাৰ আৰু দুগৰাকী নামচাইৰ।
অৰুণাচলপ্ৰদেশৰ ৰাজ্যিক নিৰীক্ষণ বিষয়া ড০ এল জাম্মাই শনিবাৰে ৰাজ্যখনত এতিয়ালৈ দ্বিতীয় সৰ্বাধিক সংখ্যক লোক ক’ৰ’নাত আক্ৰান্ত হৈছে বুলি জানিবলৈ দিয়ে।
৩ জুলাইত ৰাজ্যখনত ৩৭ গৰাকী লোক কোভিড-১৯ প’জিটিভ হিচাপে চিনাক্ত হৈছিল।
নাহৰলগুণৰ ই-চেক্টৰ কম্প্লেক্স ৰ এটা অট্টালিকাৰ একেলগে ১৪ গৰাকী লোক ক’ৰ’না পজিটিভ হোৱাৰ বিপৰীতে এই লোক সকলৰ সংস্পৰ্শলৈ অহা অন্য এটা অট্টালিকাৰ ১১ গৰাকী লোক পৰৱৰ্তী সময়ত কোভিড প’জিটিভ হিচাপে চিনাক্ত কৰা হয়।
বৰ্তমান অৰুণাচল প্ৰদেশৰ বিভিন্ন চিকিৎসালয়ত মুঠ ২১৩ গৰাকী ক’ৰ’না আক্ৰান্ত লোক চিকিৎসাধীন হৈ থকাৰ বিপৰীতে ১২০ গৰাকী লোক এতিয়ালৈ চিকিৎসাৰ অন্তত সুস্থ হৈ উঠিছে।
আনহাতে, ৰাজ্যখনত ক’ৰ’নাৰ সংক্ৰমণত দুগৰাকী লোকৰ মৃত্যু ঘটিছে।