স্বাস্থ্য আৰু পৰিয়াল কল্যাণ মন্ত্ৰ্যালয়ে দেওবাৰে কয় যে ক’ভিড-১৯ক লৈ দেশবাসী আতংকিত হোৱাৰ কাৰণ নাই আৰু চৰকাৰৰ হাতত চিকিৎসাৰ বাবে পৰ্য্যাপ্ত সম্পদ আছে।
মন্ত্ৰ্যালয়ৰ যুটীয়া সচিব লাভ আগৰৱালে সদৰী কৰে যে আজিৰ তাৰিখত দেশত ৮৩৫৬ গৰাকী ক’ভিড-১৯ পজিটিভ ৰোগী আছে।
তেওঁ কয় তাৰে ১৬৭১ গৰাকী ৰোগীক অক্সিজেন আৰু ক্ৰিটিকেল কেয়াৰ চিকিৎসাৰ প্ৰয়োজন।
কিন্তু দেশত বৰ্তমান ৬০১খন কেৱল ক’ভিড-১৯ চিকিৎসালয় আৰু ১.০৫লাখ বিচনা সাজু হৈ আছে।
বিপৰীতে যোৱা ২৯ মাৰ্চত ভাৰতত আছিল ৯৭৯গৰাকী ৰোগী, কিন্তু বিচনাৰ সংখ্যা আছিল প্ৰায় ৪২,০০০ খন। তেতিয়া ১৯৬ গৰাকী ৰোগীক ক্ৰিটিকেল কেয়াৰৰ প্ৰয়োজন হৈছিল।
তেওঁ আশ্বাস দিয়ে যে উৎসৰ্গিত ক’ভিড চিকিৎসালয় আৰু আইছ’লেচন বেডৰ ক্ষমতা বঢ়োৱাৰ বাবে চৰকাৰে পৰ্য্যাপ্ত ব্যৱস্থা হাতত লৈছে।
যোৱা ২৪ ঘণ্টাত দেশত ৯০৯গৰাকী নতুন ক’ভিড-১৯ ৰোগী চিনাক্ত হৈছে, মৃত্যু হৈছে ৩৪ গৰাকীৰ।
কিন্তু ইয়াৰ বিপৰীতে যোৱা ২৪ ঘণ্টাত ৭৪ গৰাকী আৰু মুঠ ৭১৬ গৰাকী ৰোগী আৰোগ্য হৈছে।
