প্ৰায় এটা দশক পূৰ্বে গুজৰাটত পাটিদাৰ সম্প্ৰদায়ৰ সংৰক্ষণৰ দাবীত কৰা আন্দোলনে জোকাৰি গৈছিল। ঠিক অনুৰূপধৰণে লোকসভা নিৰ্বাচনৰ পূৰ্বে প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ ৰাজ্যত ৰাজপুত-ক্ষত্ৰিয়ৰ প্ৰতিবাদ ক্ৰমাৎ বৃদ্ধি পাইছে। মঙলবাৰে ৰাজকোটৰ বিজেপি প্ৰাৰ্থী তথা কেন্দ্ৰীয় মন্ত্ৰী পুৰুষোত্তম ৰূপালাক বিশেষ জাতিৰ অপমান কৰাৰ অভিযোগ উত্থাপন কৰি ৰাজপুত সংগঠন কৰণী সেনাৰ সদস্যসকলে গান্ধীনগৰৰ ৰাজ্যিক বিজেপিৰ কাৰ্যালয়ৰ সন্মুখত সমদল উলিয়াই প্ৰতিবাদ সাব্যস্ত কৰিবলৈ চেষ্টা কৰে।
কৰণী সেনাৰ সৰ্বভাৰতীয় সভাপতি ৰাজ শ্বেখাৱটে গান্ধীনগৰৰ বিজেপিৰ মুখ্য কাৰ্যালয়ৰ সন্মুখত প্ৰতিবাদত অংশগ্ৰহণ কৰিবলৈ গৈছিল। কিন্তু আহমেদাবাদ বিমানবন্দৰ পোৱাৰ পাছতে তেওঁক আৰক্ষীয়ে গ্ৰেপ্তাৰ কৰে।
উল্লেখ্য যে, মোদী মুখ্যমন্ত্ৰী হৈ থকাৰ সময়ত ৰূপালা গুজৰাট বিজেপিৰ সভাপতি আছিল। মোদীয়ে প্ৰধানমন্ত্ৰী হোৱাৰ পাছত তেওঁক কেন্দ্ৰীয় মন্ত্ৰীও কৰে। অভিযোগ অনুসৰি শেহতীয়াকৈ ৰূপালাই নিজৰ সমষ্টিত দলিত সভাত কয়, ‘আমাৰ ওপৰত বিদেশী মোগলেও শাসন কৰিলে। ইংৰাজেও কৰিলে। কিন্তু ৰাজপুত মহাৰাজসকলে বিদেশী শাসকসকলক প্ৰণাম কৰি ‘ৰুটি আৰু বেটি’ৰ ব্যৱসায় কৰিছিল। আমাৰ ৰুখী (গুজৰাট দলিত) সম্প্ৰদায়ে অৱশ্যে ধৰ্ম সলনি কৰা নাছিল বা ইংৰাজৰ লগত জড়িত নাছিল।’
এই ঘটনাৰ বাবে, কেৱল গুজৰাটতে নহয়, ৰাজস্থান, হাৰিয়ানা, মধ্য প্ৰদেশ আৰু উত্তৰ প্ৰদেশতো ইতিমধ্যে বিভিন্ন ৰাজপুত-ক্ষত্ৰিয় সংগঠনে বিজেপি বিৰোধী আন্দোলন আৰম্ভ কৰিছে। দেওবাৰে উত্তৰ প্ৰদেশৰ চাহাৰানপুৰত ৰাজপুত আৰু ক্ষত্ৰিয় সম্প্ৰদায়ৰ জ্যেষ্ঠ সদস্যসকলে এখন মহাপঞ্চায়ত আহ্বান কৰে। ইয়াত ৰাজ্যৰ বিভিন্ন প্ৰান্তৰ হাজাৰ হাজাৰ লোকে অংশগ্ৰহণ কৰে। হাৰিয়ানা, ৰাজস্থান আৰু গুজৰাটৰ পৰাও ৰাজপুত-ক্ষত্ৰিয় প্ৰতিনিধি পঞ্চায়তলৈ আহে। তদুপৰি বিভিন্ন কৃষক সংগঠনৰ নেতা উপস্থিত থাকে। মহাপঞ্চায়তত কিষাণ মজদুৰ অৰ্গেনাইজেশ্যনৰ সভাপতি তথা ৰাজপুত সমাজৰ বিশিষ্ট নেতা ঠাকুৰ পূৰণ সিঙে বিজেপিক পৰাস্ত কৰিবলৈ শক্তিশালী বিৰোধী প্ৰাৰ্থীগৰাকীক সমৰ্থনৰ বাবে মুকলিকৈ আহ্বান জনায়।
