এমাহৰ ভিতৰতে আমেৰিকা যুক্তৰাষ্ট্ৰৰ কেলিফৰ্ণিয়াত কমেও ষষ্ঠবাৰৰ বাবে বন্দুকধাৰীয়ে আক্ৰমণ চলালে। এই ঘটনাত চাৰিওফালে সাধাৰণ মানুহৰ মাজত আতংক বিয়পি পৰিছে।
শনিবাৰে আন এক বন্দুকধাৰীৰ নিৰ্বিচাৰ আক্ৰমণত তিনিজন লোক নিহত হয়। এই ঘটনাত চাৰিজন লোক গুৰুতৰভাৱে আহত হৈছে। আহতসকলক চিকিৎসালয়ত ভৰ্তি কৰা হৈছে। তেওঁলোক সকলোৰে অৱস্থা সংকটজনক বুলি কোৱা হৈছে।
আন্তৰ্জাতিক সংবাদ মাধ্যমৰ বাতৰি অনুসৰি, ঘটনাটো লছ এঞ্জেলছৰ বেভাৰ্লি ক্ৰেষ্টত সংঘটিত হৈছে। লছ এঞ্জেলছ আৰক্ষী বিভাগৰ চাৰ্জেন্ট ফ্ৰেংক প্ৰিচিয়াডোৱে কয় যে ঘটনাটো স্থানীয় সময় অনুসৰি পুৱা ২:৩০ বজাত সংঘটিত হৈছিল। গুলীবিদ্ধ হোৱা সাতজন লোকৰ তিনিজন এখন গাড়ীৰ ভিতৰত আছিল। বাকী চাৰিজন বাহিৰত থিয় হৈ আছিল। আহতসকলক এখন চিকিৎসালয়লৈ লৈ যোৱা হয়। তেওঁলোকৰ অৱস্থা সংকটজনক।
চাৰ্জেন্ট প্ৰিচিয়াডোৱে লগতে কয় যে কি কাৰণত গুলীচালনা হৈছিল সেয়া জনা নাযায়। তেওঁৰ ওচৰত এই বিষয়ে বিতং তথ্য নাই। আৰক্ষীয়ে এটা তদন্ত আৰম্ভ কৰিছে। আক্ৰমণকাৰীজনক গ্ৰেপ্তাৰ কৰা হৈছে নে নাই তেওঁ সেইটো স্পষ্ট কৰা নাই।
উল্লেখ্য যে লছ এঞ্জেলছৰ ডাউনটাউনৰ এটা নৃত্যগৃহত হোৱা গুলীচালনাত ১১ জন লোক নিহত আৰু আন ৯ জন আহত হোৱা ঘটনাৰ এসপ্তাহ পিছতে এই গুলীচালনাৰ ঘটনা সংঘটিত হৈছে।
ইয়াৰ পূৰ্বে সোমবাৰে ছান ফ্ৰাঞ্চিস্কোৰ দক্ষিণে থকা কাঠফুলাৰ ফাৰ্মত এজন বন্দুকধাৰীয়ে গুলীচালনা কৰাৰ ফলত ৭ জন লোক আহত হৈছিল।
