দ্বিতীয় পৰ্যায়ত অনুষ্ঠিত হ’ব লগীয়া পঞ্চায়ত নিৰ্বাচনৰ দিন চমু চাপি অহাৰ লগে লগে বিভিন্ন ৰাজনৈতিক দলৰ লগতে একাংশ নিৰ্দ্দলীয় প্ৰাৰ্থীয়েও পঞ্চায়ত দখলৰ বাবে প্ৰচাৰ অভিযান তীব্ৰতৰ কৰি তোলাতো পৰিলক্ষিত হৈছে৷ গোৱালপাৰা জিলাৰ কৃষ্ণাই গাওঁ পঞ্চায়ত নিৰ্বাচনৰ প্ৰতিদ্বন্দ্বিতা কাৰী প্ৰত্যেক জন দলীয় প্ৰাৰ্থীয়ে তীব্ৰ গতিত প্ৰচাৰ চলাইছে ৷কংগ্ৰেছ দলৰ প্ৰাৰ্থী শ্বাহ আলম, বিজেপি দলৰ ছাহাবুল হক, অগপ প্ৰাৰ্থী আইনুল হুছেইন আৰু নিৰ্দ্দলীয় প্ৰাৰ্থী শ্যামল মিত্ৰই গাৱেঁ গাৱেঁ সভা সমিতি অনুষ্ঠিত কৰি ভোট বিচাৰি আছে৷
ইফালে, পঞ্চায়তখনৰ প্ৰতিটো ৱাৰ্ডত সভা অনুষ্ঠিত কৰি বিজেপি দলক জয়যুক্ত কৰাৰ আহ্বান জনাইছে বিজেপি দলৰ জিলা প্ৰভাৰী ডা° প্ৰদীপ ঠাকুৰীয়াই৷ পঞ্চায়তখনৰ টুলটুলিয়া পাৰাত অনুষ্ঠিত কৰা এখন সভাত প্ৰভাৰী ড০ প্ৰদীপ ঠাকুৰীয়াই নিৰ্বাচনত বিজেপিৰ প্ৰাৰ্থী ছাহাবুল হক জয়ী হ’লে এখন দুৰ্নীতিমুক্ত পঞ্চায়ত উপহাৰ দিয়াৰ লগতে দুৰ্নীতিগ্ৰস্ত লোকৰ বিৰুদ্ধে বিজেপি চৰকাৰে কঠোৰ পদক্ষেপ গ্ৰহণ কৰাৰ প্ৰতিশ্ৰুতি প্ৰদান কৰে।
আনহাতে নিৰ্দ্দলীয় প্ৰাৰ্থী শ্যামল মিত্ৰ, কংগ্ৰেছ দলৰ প্ৰাৰ্থী শ্বাহ আলম, অগপ প্ৰাৰ্থী আইনুদ্দিন আহমেদ আৰু আন এগৰাকী প্ৰাৰ্থী ৰমিজ ৰাজাইও ভোটাৰক আকৰ্ষণ কৰাৰ বাবে তীব্ৰ নিৰ্বাচনী অভিযান চলাইছে৷
