অৱশেষত যাৱজ্জীৱন কাৰাদণ্ডৰ শাস্তিৰে দণ্ডিত হ’ল স্বয়ম্ভু গডমেন আশাৰাম বাপু। এগৰাকী মহিলা শিষ্যক উপৰ্যুপৰি ধৰ্ষণ কৰাৰ অপৰাধত আজি আশাৰাম বাপুক গান্ধীনগৰৰ আদালতে যাৱজ্জীৱন কাৰাদণ্ডৰ শাস্তি প্ৰদান কৰে। চেচনছ আদালতৰ ন্যায়াধীশ ডি কে ছ’নীয়ে গোচৰৰ শুনানি গ্ৰহণ কৰি এই ৰায়দান কৰে।
গডমেন আশাৰামৰ ওচৰত দীক্ষা গ্ৰহণৰ উদ্দেশ্যে চুৰাটৰ পৰা অহা এগৰাকী মহিলা শিষ্যক ২০০১ চনৰ পৰা ২০০৬ চনলৈকে আহমেদাবাদৰ সমীপৰ মটেৰাত থকা তেওঁৰ আশ্ৰমত বাস কৰাৰ সময়ত কেইবাবাৰো ধৰ্ষণ কৰাৰ অভিযোগ তুলিছিল মহিলাগৰাকীয়ে।
স্বয়ম্ভু গডমেন গৰাকীৰ বিৰুদ্ধে ধৰ্ষণ, বলপূৰ্বক বন্দী কৰি ৰখা, অপৰাধমূলক ষড়যন্ত্ৰ, প্ৰমাণ ধ্বংস কৰাৰ চেষ্টা, বিকৃত যৌন কামনাকে ধৰি বিভিন্ন অভিযোগ উঠিছিল। ২০১৩ চনত মহিলাগৰাকীয়ে দাখিল কৰা অভিযোগৰ গোচৰত আশাৰামক সোমবাৰে আদালতে দোষী সাব্যস্ত কৰিছিল।
আজি আদালতে ভাৰতীয় দণ্ডবিধিৰ ধাৰা ৩৭৬ ২ (গ), ৩৭৭, ৩৪২, ৩৫৪, ৩৫৭ আৰু ৫০৬ ৰ অধীনত আশাৰামক দোষী সাব্যস্ত কৰে। এই গোচৰত আশাৰামৰ পত্নী আৰু পুত্ৰ-কন্যাৰ বিৰুদ্ধেও অভিযোগ উঠিছিল দোষমুক্ত কৰিছিল।
উল্লেখ্য যে, ২০১৩ চনত আশাৰামৰ বিৰুদ্ধে আশ্ৰমৰ সীমাৰ ভিতৰতে এগৰাকী নাবালিকাক ধৰ্ষণ কৰাৰ আন এক অভিযোগো উত্থাপিত হৈছিল। এই অভিযোগৰ পাছত তেওঁক ইন্দোৰৰ পৰা গ্ৰেপ্তাৰ কৰা হৈছিল। এই গোচৰত যোধপুৰ আদালতে দোষী সাব্যস্ত কৰিছিল আশাৰামক।
নাবালিকা ধৰ্ষণৰ এই গোচৰত যোধপুৰ আদালতে আশাৰামক দোষী সাব্যস্ত কৰি আজীৱন কাৰাদণ্ডৰে দণ্ডিত কৰিছি। তেতিয়াৰে পৰা এই ৮১ বৰ্ষীয় স্বয়ম্ভু গডমেন গৰাকী যোধপুৰ কেন্দ্ৰীয় কাৰাগাৰত বন্দী হৈ আছে।