এছিয়ান গেমছ ২০২৬ত অংশগ্ৰহণ কৰিবলৈ জাপানত উপস্থিত হোৱাৰ পাছতেই ভাৰতীয় ৰ’ৱিং আৰু শ্বুটিং দলটোৱে চৰম অব্যৱস্থা আৰু হাৰাশাস্তিৰ সন্মুখীন হ’বলগীয়া হৈছে। মঙলবাৰে নিশা নাগোয়া বিমান বন্দৰত উপস্থিত হোৱাৰ পাছতেই সাংগঠনিক দক্ষতাৰ বাবে পৰিচিত জাপানৰ ব্যৱস্থাপনাৰ ফোপোলা স্বৰূপ পোহৰলৈ আহে। ভাৰতীয় ৰ’ৱিং দলটোৰ সৰহসংখ্যক খেলুৱৈয়ে থকা ঠাই নোপোৱাত আবদ্ধ হৈ পৰাৰ লগতে একাংশ খেলুৱৈৰ নাম এক্ৰিডিটেচন ব্যৱস্থাতেই অন্তৰ্ভুক্ত নোহোৱাৰ অভিযোগ উত্থাপন হৈছে। ভাৰতীয় ৰ’ৱিং ফেডাৰেচনৰ (আৰএফআই) এগৰাকী বিষয়াই জানিবলৈ দিয়া মতে, ২২ জন পুৰুষ খেলুৱৈৰ ভিতৰত মাত্ৰ তিনিগৰাকীৰ নামতহে আৱাসৰ ব্যৱস্থা কৰা হৈছে। ইয়াৰ উপৰি, বৈধ এক্ৰিডিটেচন থকাৰ পাছতো পুনম, এলিনা এণ্টো আৰু অংশিকা ভাৰতী নামৰ পাঁচগৰাকীৰ ভিতৰত তিনিগৰাকী মহিলা খেলুৱৈৰ নাম আয়োজকৰ তালিকাত পঞ্জীয়ন হোৱা নাই।
ৰ’ৱিং দলটোৰ এই দুৰ্দশা বিমানত উঠাৰ পূৰ্বেই আৰম্ভ হৈছিল। মঙলবাৰে নিশা মুম্বাইৰ পৰা যাত্ৰা কৰা দলটোৰ এটা গোটক কেথে পেচিফিক বিমান কৰ্তৃপক্ষই তেওঁলোকৰ বঠাসমূহ (oars) লগত নিবলৈ অনুমতি দিয়া নাছিল। পাছত বঠাসমূহ দিল্লীলৈ নিয়া হয় আৰু বৃহস্পতিবাৰে পুৱা প্ৰথমটো আনুষ্ঠানিক অনুশীলনৰ ঠিক পূৰ্বেই সেইবোৰ নাগোয়াত উপস্থিত হ’ব বুলি আশা কৰা হৈছে। ইয়াৰ মাজতেই ভাৰতীয় ক্ৰীড়া প্ৰাধিকৰণে (ছাই) মহিলা দলৰ প্ৰশিক্ষক ৰতীশ কুমাৰ আৰু দলৰ মেনেজাৰ ৰামাকৃষ্ণন ৰামচন্দ্ৰনক নিজৰ থকাৰ ব্যৱস্থা নিজেই কৰিব লাগিব বুলি পলমকৈ অৱগত কৰাত খেলুৱৈসকলৰ মাজত তীব্ৰ অসন্তুষ্টিৰ সৃষ্টি হৈছে। আনহাতে, ভাৰতীয় শ্বুটিং দলটোৱেও মঙলবাৰে নিশা ৯ বজাত নাগোয়া বিমান বন্দৰত উপস্থিত হৈ প্ৰায় তিনি ঘণ্টা ধৰি বাছৰ বাবে অপেক্ষা কৰিবলগীয়া হয়। বিমান বন্দৰৰ সকলো দোকান-পোহাৰ বন্ধ থকাৰ লগতে ৱেলকাম চেণ্টাৰতো কোনো তথ্য নথকাত তেওঁলোকে খাদ্যৰ অভাৱত ৰাতিপুৱা ৪ বজাতহে গৈ হোটেলত উপস্থিত হ’ব পাৰে।
খেলিমেলি ইমানতেই ক্ষান্ত নাছিল। ভাৰতীয় পিষ্টল শ্বুটিং দলৰ মুখ্য প্ৰশিক্ষক সমৰেশ জঙে তেওঁৰ এক্ৰিডিটেচন কাৰ্ডখনত খেলপথাৰ আৰু খেলুৱৈৰ এলেকাত প্ৰৱেশৰ অনুমতি নথকা দেখি হতভম্ব হৈ পৰে। ভাৰতীয় অলিম্পিক সংস্থাই (আইঅ’এ) প্ৰদান কৰা তালিকা অনুসৰিয়েই আয়োজকে এনেদৰে এক্ৰিডিটেচন প্ৰদান কৰা বুলি জানিব পৰা গৈছে। এই সন্দৰ্ভত নেচনেল ৰাইফল এছ’চিয়েচন অৱ ইণ্ডিয়াৰ সৈতে যোগাযোগ কৰাৰ পাছত বিষয়টো সমাধানৰ আশ্বাস দিয়া হৈছে আৰু জঙক নতুন এক্ৰিডিটেচন প্ৰদান কৰা হ’ব বুলি সূত্ৰই প্ৰকাশ কৰিছে। উল্লেখযোগ্য যে, সুৰুচি ফোগাট আৰু আকাশ ভৰদ্বাজৰ দৰে ১০ মিটাৰ এয়াৰ পিষ্টল শ্বুটাৰসকলে জঙৰ অধীনতেই প্ৰশিক্ষণ লৈ আছে, সেয়েহে তেওঁৰ অনুপস্থিতিয়ে ভাৰতৰ পদক জয়ৰ সম্ভাৱনাত প্ৰভাৱ পেলাব পাৰে।
ইয়াৰ সমান্তৰালভাৱে, জাপানত এছিয়ান গেমছৰ বাবে প্ৰস্তুতি চলাই থকা ভাৰতীয় ঘোঁৰাচালয় (ইকুৱেষ্ট্ৰিয়ান) দলটোৱেও চৰকাৰী পুঁজিৰ অভাৱৰ বাবে নিজৰ ঘোঁৰাৰ দানা আৰু থকা ঠাইৰ বাবে সংগ্ৰাম কৰিবলগীয়া হৈছে। ভাৰতীয় অলিম্পিক সংস্থাই নিযুক্তি দিয়া এড-হক সমিতিয়ে পুঁজিৰ নাটনিৰ কথা স্বীকাৰ কৰিছে। এড-হক পেনেলৰ প্ৰশাসনিক সদস্য তথা ঘোঁৰাচালয় দলৰ দলপতি লেফটেনেণ্ট কৰ্ণেল সন্দীপ দেৱানে প্ৰেৰণ কৰা এক ইমেইলত উল্লেখ কৰা মতে, ৰাষ্ট্ৰীয় ফেডাৰেচনক প্ৰদান কৰা পুঁজি পৰ্যাপ্ত নহয় আৰু ঘোঁৰাৰ ৰক্ষণাবেক্ষণৰ বাবে চৰকাৰে বৰ্তমানলৈ কোনো ধন মুকলি কৰি দিয়া নাই। সেয়েহে খেলুৱৈসকলক নিজৰ ধনেৰে ঘোঁৰাৰ খাদ্য ক্ৰয় কৰি পাছত তাৰ বিল জমা দিবলৈ কোৱা হৈছে। জাৰ্মানীত আৱশ্যকীয় কোৱাৰেণ্টাইনৰ সময়তো খেলুৱৈসকলে নিজৰ জেপৰ ধনেৰে খাদ্য, যাতায়াত আৰু আৱাসৰ ব্যয় বহন কৰিবলগীয়া হৈছিল আৰু ইয়াৰ ধন এতিয়াও ঘূৰাই পোৱা নাই। এছিয়ান গেমছৰ দৰে এক আন্তঃৰাষ্ট্ৰীয় ক্ৰীড়া সমাৰোহৰ পূৰ্বে ভাৰতীয় খেলুৱৈসকলে সন্মুখীন হোৱা এনে চৰম অব্যৱস্থাই এতিয়া ক্ৰীড়া প্ৰশাসনৰ ভূমিকাক লৈ গুৰুতৰ প্ৰশ্নৰ অৱতাৰণা কৰিছে।
