কটন বিশ্ববিদ্যালয় প্ৰাঙ্গণত আজি উন্মোচিত হয় সঞ্জীৱ পল ডেকা সম্পাদিত অসম আন্দোলনৰ পটভূমিত ৰচিত ৪১ গৰাকী গল্পকাৰৰ ৫৩ টা গল্পৰ সংকলন “অসম আন্দোলনৰ গল্ল”। উন্মোচনী সভাত অপূৰ্ব শৰ্মা, ৰঞ্জিৎ কুমাৰ দেৱ গোস্বামী, মুনীন বায়ন, অৰূপা পটঙ্গীয়া কলিতা আদি ৰাজ্যৰ কেইবাগৰাকীও সাহিত্যিক-সমালোচকে বক্তব্য ৰাখে।
সভাখন উদ্বোধন কৰি কটন বিশ্ববিদ্যালয়ৰ উপাচাৰ্য অধ্যাপক ৰমেশ চন্দ্ৰ ডেকাই কয়, “স্বৰাজোত্তৰ অসমৰ গুৰুত্বপূৰ্ণ সংঘটনসমূহৰ ভিতৰত ছবছৰজোৰা অসম আন্দোলনৰ অতীৱ গুৰুত্ব আছে। প্ৰব্ৰজনে অসমীয়া জাতীয় জীৱনলৈ যি সংকট নমাই আনিছিল, কুৰি শতিকাৰ বিছ-ৱ্ৰিছ-চল্লিছৰ দশকত অম্বিকাগিৰী ৰায়চৌধুৰী, জ্ঞাননাথ বৰা, হৰেন্দ্ৰনাথ বৰুৱা আদিকে ধৰি অসমীয়া লেখক-বুদ্ধিজীৱীসকলে যি উদ্বেগ প্ৰকাশ কৰিছিল, সি নিশ্চয় ভিত্তিহীন নাছিল।”
“১৯৭৮-৭৯ ত আৰম্ভ হোৱা অসম আন্দোলনে সৰ্বস্তৰত যি সমৰ্থন লাভ কৰিছিল, সিয়ে বিদেশী সমস্যা সম্পৰ্কত অসমীয়া মানুহৰ মনত থকা দীৰ্ঘদিনীয়া শংকা-সংশয়কেই প্ৰতীয়মান কৰে। সাহিত্য যিহেতু সমাজৰ শুভ-অশুভৰ লগতে পধ্রুতিহাসিক ঘটনাৱলীৰো প্ৰতিফলক, অসম আন্দোলনকেন্দ্ৰিক সাহিত্যৰো সেয়ে অত্যন্ত গুৰুত্ব আছে।”— তেওঁ লগতে কয়।
নিৰ্দিষ্ট বক্তাৰ ভাষণ প্ৰদান কৰি সাংবাদিক-সমালোচক মুনীন বায়নে কয় যে পশ্চিমবংগৰ নক্সাল আন্দোলনৰ পটভূমিত ভালেমান কালোৱীৰ্ণ সাহিত্য সৃষ্টি হৈছে যদিও অসম আন্দোলনৰ পটভূমিত অন্ততঃ সমৰ্থকসকলৰ দ্বাৰা মনত ৰৈ যোৱা সাহিত্য সৃষ্টি হোৱা নাই। সকলো পক্ষৰে গল্প অন্তৰ্ভুক্ত হোৱা “অসম আন্দোলনৰ গল্প” সংকলনখনত কেইবাটাও উল্লেখযোগ্য গল্প সন্নিৱিষ্ট হৈছে আৰু আন্দোলনটোক নতুনকৈ চোৱাত এই গল্পসমূহে সহায় কৰিব বুলি তেওঁ আশা ব্যক্ত কৰে।
প্ৰথিতযশা গল্পকাৰ-চলচ্চিত্ৰ সমালোচক অপূৰ্ব শৰ্মাই সাহিত্য আৰু সমাজ সম্পৰ্কত ব্যাখ্যা আগবঢ়াই “অসম আন্দোলনৰ গল্প”ৰ দৰে সংকলনৰ প্ৰয়োজনীয়তা দোহাৰে। অধ্যাপক ৰঞ্জিৎ কুমাৰ দেৱ গোস্বামীয়ে কয় যে আৰম্ভণীৰে পৰা তেওঁ অসম আন্দোলনৰ বিৰোধী আছিল। দাৰ্শনিক হেগেলৰ উদ্ধৃতিৰে তেওঁ কয় যে যিহেতু আন্দোলনটো হৈ যাবলৈ ভালেমান বছৰ হৈ গ’ল, এনেধৰণৰ সংকলনৰ জৰিয়তে অসম আন্দোলনৰ বস্তুনিষ্ঠ মূল্যায়ন হোৱাত নিশ্চয় সহায়ক হ’ব।
গ্ৰন্থখনৰ সম্পাদক তথা তেজপুৰ বিশ্ববিদ্যালয়ৰ অসমীয়া বিভাগৰ অধ্যাপক সঞ্জীৱ পল ডেকাই সংকলনখনৰ প্ৰস্তুতিৰ অন্তৰালৰ কথা ব্যক্ত কৰে আৰু আশা কৰে যে অসম আন্দোলনৰ নানানটা দিশ উন্মোচিত হোৱাত এই সংকলনে সহায় কৰিব।
এই সংকলনৰ লেখকসকলৰ ভিতৰত সেই সময়ত আন্দোলন সমৰ্থন কৰোঁতা, বিৰোধিতা কৰোঁতা, আনকি নিৰ্যাতিত লোকৰো সাহিত্য অন্তৰ্ভুক্ত কৰা হৈছে বুলি ডেকাই জানিবলৈ দিয়ে।
বসন্ত ডেকা, দেৱব্ৰত দাস, শোণিত বিজয় দাস, ইৰশ্বাদ আলি, দিগন্ত ওজা, এম কামালুদ্দিন আহমেদ আদি ৰাজ্যৰ কেইবাগৰাকীও বিশিষ্ট লোকে অংশগ্ৰহণ কৰা সভাখনৰ আঁত ধৰে উপাসনা বৰাই। গ্ৰন্থখন প্ৰকাশ কৰিছে গুৱাহাটীৰ বনলতা প্ৰকাশনে।
