কালি ছিপাঝাৰত উচ্ছেদৰ সময়ত যি নিৰ্মমভাৱে তিনিজন লোকক হত্যা কৰা হ’ল, তাক অসম নাগৰিক সমাজে গৰিহণা দিছে।
অসম নাগৰিক সমাজ সভাপতি হৰেকৃষ্ণ ডেকা,কাৰ্যকৰী সভাপতি অজিত কুমাৰ ভূঞা,উপ সভাপতি প্ৰশান্ত ৰাজগুৰু আৰু সাধাৰণ সম্পাদক পৰেশ মালাকাৰে স্বাক্ষৰ কৰা বিবৃতিত এনেদৰে কোৱা হৈছে—’আমি শীঘ্ৰে এই ঘটনাৰ এক ন্যায়িক তদন্ত দাবী কৰোঁ৷ আইনৰ শাসনৰ নামত কালিৰ ঘটনাটো এক কলংক৷ গুলীবিদ্ধহৈ ঢলি পৰা মানুহ এজনৰ ওপৰত পাশৱিক উল্লাসেৰে জঁপিয়াই পৰাটো কি এক অমানুষিক বৰ্বৰতা! কেনে এক আচহুৱা অৱস্থা!
চৰকাৰে নিজেই যেন দিনে দিনে অসমক এক অগ্নিগৰ্ভা পৰিস্থিতিলৈ ঠেলি দিছে! নতুন চৰকাৰ গঠন হোৱাৰ প্ৰায় সমান্তৰালভাৱে যধে-মধে চৰকাৰী মাটি বেদখল মুক্ত কৰাৰ এক অভিযান চলিছে৷ এই অভিযানৰ লক্ষ্য কৰি লোৱা হৈছে মূলত: পূৰ্ববঙ্গীয় মূলৰ মুছলমান সম্প্ৰদায়টোক৷ চৰকাৰী মাটিৰ বেদখল সমৰ্থন কৰাৰ প্ৰশ্ন নুঠে৷
কিন্তু, য’ত য’ত বেদখল উচ্ছেদ কৰা হৈছে, ক’ৰপৰা কেনেকৈ সেই মানুহখিনি সেই ঠাই সমূহত আহি বহিলহি, সেইটো জানো আমি ভালদৰে অনুসন্ধান কৰি চাইছোঁ?তেওঁলোকক সন্দেহযুক্ত বাংলাদেশী বিদেশী নাগৰিক বুলি কোনে ছাপ মাৰি দিছে? আমি লক্ষ্য কৰিছোঁ শাসনাধিস্থ দল আৰু তেওঁলোকৰ সমৰ্থনত থকা প্ৰচাৰ মাধ্যমে অহৰহ এনে এটা প্ৰচাৰ চলাই আছে৷
বিদেশী নাগৰিকৰ বিষয়টো শাসকীয় দলবোৰে আজি কিমান দশক ধৰি ৰাজনৈতিক উদ্দেশ্যত ব্যৱহাৰ কৰি আহিছে৷ ই সম্প্ৰতি অসমীয়া সমাজক কেনেকৈ সাম্প্ৰদায়িকভাৱে বিভাজিত কৰিছে,সেইটো আমি সকলোৱে দেখিছোঁ৷ অথচ, বিদেশী নাগৰিক সমস্যাটোৰ স্থায়ী সমাধানৰ বাবে ৰাষ্ট্ৰীয় নাগৰিকপঞ্জী প্ৰস্তুত হোৱাৰ পিছতো, কেৱল ৰাজনৈতিক স্বাৰ্থতে তাক ওলমাই ৰখা হৈছে৷
প্ৰথম প্ৰশ্ন, যিসকলক উচ্ছেদ কৰা হৈছে, তেওঁলোক যদিহে ভাৰতীয় নাগৰিক, আৰু জীৱন-জীৱিকাৰ তাড়নাত ক’ৰবাৰ পৰা আহি তেওঁলোকে এনেদৰে চৰকাৰী মাটিত বহিছে, তাৰ দায়িত্ব চৰকাৰে ল’ব লাগিব৷ গতিকে উচ্ছেদ কৰাৰ আগেয়ে, তেওঁলোকৰ বাবে বিকল্প সংস্থাপনৰ ব্যৱস্থা কৰিব লাগিব৷
আনহাতে তেওঁলোকৰ নাগৰিকত্ব যদি সন্দেহযুক্ত, তাক আইনৰ দ্বাৰা প্ৰমাণ কৰিব লাগিব৷ কিন্তু তেওঁলোক ভাৰতীয় নাগৰিক নহ’লেও কোনো পৰিস্থিতিতেই তেওঁলোকৰ মানবাধিকাৰ খৰ্ব হ’ব নালাগিব৷ উচ্ছেদৰ সন্দৰ্ভত যাবতীয় যি নীতি- নিয়ম আছে তাক মানিহে উচ্ছেদ কৰিব লাগিব৷
আমাৰ সন্দেহ হৈছে যে যি ধৰণে এই উচ্ছেদ কাৰ্য চলোৱা হৈছে সেইটো সম্পূৰ্ণৰূপে ৰাজনৈতিকভাৱে উদ্দেশ্য প্ৰণোদিত৷ ই ভাৰতীয় জনতা পাৰ্টিৰ চৰকাৰৰ ৰাজনৈতিক কাৰ্যসূচীৰ এক সম্প্ৰসাৰণহে৷ উচ্ছেদৰ ফলত ক্ষতিগ্ৰস্ত হোৱা লোক সকলৰ দায়িত্ব চৰকাৰে ল’ব লাগিব৷ লগতে এই কথাও আমি ৰাইজক সকীয়াই দিব বিচাৰোঁ, এফালে বেদখল উচ্ছেদৰ নামত এনেদৰে দুখীয়া মানুহক হাৰাশাস্তি কৰা হৈছে আৰু আনফালে আমাৰ প্ৰাকৃতিক আৰু ৰাজহুৱা সম্পদ বাহিৰৰ বনিয়াক দলিচা পাৰি গতাই দিয়া হৈছে৷ সেই বিপজ্জনক বেদখলৰ সন্দৰ্ভত কিন্তু, শাসকীয় দল আৰু তেওঁলোকৰ সমৰ্থক সকল সম্পূৰ্ণ নিৰ্লিপ্ত, নিমাত’৷
দখল,বেদখল ধুঁৱলি-কুঁৱলি কৰি দি ৰাইজক নি:স্ব কৰাৰ প্ৰক্ৰিয়া এটাহে যেন আৰম্ভ হৈছে বুলি অসম নাগৰিক সমাজে প্ৰতিক্ৰিয়া ব্যক্ত কৰিছে।ই দেশ আৰু জাতিৰ সৰ্বনাশ কৰিব বুলিও অসম নাগৰিক সমাজে সকিয়াই দিছে।
