অসম নাট্য সন্মিলনৰ ৬০ সংখ্যক ৰাজ্যিক অধিৱেশন খন নগাঁৱত অনুষ্ঠিত কৰাৰ বাবে আজি আয়োজন কৰা এখন ৰাজহুৱা সভাত সিদ্ধান্ত গ্ৰহণ কৰা হয়।
নগাঁও আমোলাপট্টিৰ নাট্য মন্দিৰত নগাঁও জিলা নাট্য সন্মিলনৰ সভাপতি ইন্দ্ৰমোহন বৰুৱাৰ সভাপতিত্বত অনুষ্ঠিত অসম নাট্য সন্মিলনৰ ৰাজহুৱা সভাখন বটদ্ৰৱাৰ নৰোৱা সত্ৰৰ সত্ৰাধিকাৰ দেৱানন্দ দেৱগোস্বামীয়ে এগছি বন্তি প্ৰজ্বলন কৰি আনুষ্ঠানিকভাৱে মুকলি কৰে।
সভাত মুখ্য অতিথি হিচাপে অংশগ্ৰহণ কৰি নগাঁও সদৰ সমষ্টিৰ বিধায়ক ৰূপক শৰ্মাই নিজৰ ভাষণ প্ৰসংগত অসমৰ নাট্য আন্দোলনৰ অন্যতম গুৰি ধৰোঁতা অসম নাট্য সন্মিলনৰ ভুমিকা অপৰিসীম বুলি অভিহিত কৰে।
লগতে তেওঁ কয় নগাঁৱৰ নাট্য ক্ষেত্ৰখনৰ এক ঐতিহ্যপুৰ্ণ ইতিহাস আছে ৷ মঞ্চ নাটকত গৰিমাময় ইতিহাস আছে ৷
সাহিত্য সংস্কৃতিৰে চহকী নগাঁৱত অসম নাট্য সন্মিলনৰ অধিবেশন অনুষ্ঠিত কৰিবলৈ পায় আমি গৌৰৱাম্বিত ৷
অধিৱেশন খন সফল কৰি তুলিবলৈ বিধায়ক হিছাপেই নহয় এজন সাংস্কৃতিক কৰ্মী হিছাপেও সকলো ধৰনৰ সহযোগিতা কৰাৰ আশ্বাস প্ৰদান কৰে বিধায়ক ৰূপক শৰ্মাই ৷
সভাত বিশিষ্ট অভিনেতা উপকূল বৰদলৈ,নাট্যকাৰ অৰূপ বৰঠাকুৰ,অসম আৰক্ষীৰ অৱসৰপ্ৰাপ্ত শীৰ্ষ বিষয়া শ্যামল শইকীয়া,নাট্যকাৰ অজিত বৰঠাকুৰ,অসম নাট্য সন্মিলনৰ ৰাজ্যিক সমিতিৰ কাৰ্যকৰী সভাপতি দিলীপ বৰা,সাধাৰণ সম্পাদক গিৰিধৰ ৰায়,সন্মিলনৰ ভুপেন ডেকা,কল্যাণ দে,বসন্ত বৰ্মন, নগাঁৱৰ বিশিষ্ট ব্যক্তিক্ৰমে শিবানন্দ কাকতি,কামাখ্যা প্ৰসাদ শৰ্মা, সপোনতি বৰদলৈ,পুন্যদা বৰা,জিতেন বৰা আদিয়ে অংশগ্ৰহণ কৰে৷
উক্ত সভাতেই ৰূপক শৰ্মাক সভাপতি, ইন্দ্ৰমোহন বৰুৱাক কাৰ্যকৰী সভাপতি,ৰাজীৱ বৰাক মুখ্য সমন্বয়ক আৰু সন্তৰাম দাসক মুখ্য সম্পাদক হিছাপে লৈ এখন শক্তিশালী আদৰনী সমিতি গঠন কৰা হয় ৷
