অসমৰ সাম্প্ৰতিক বান পৰিস্থিতিত অসম সাহিত্য সভাই দুৰ্গত ৰাইজৰ কাষত থিয় দিয়াৰ প্ৰয়াস কৰিছে। বানৰ কবলত পৰা বিভিন্ন অঞ্চলত যথাসাধ্য সাহায্য আগবঢ়োৱাৰ বাবে ততালিকে যাৱতীয় ব্যৱস্থা ল’বলৈ অসম সাহিত্য সভাৰ সভাপতি ড০ পৰমানন্দ ৰাজবংশীয়ে সংশ্লিষ্ট জিলা সাহিত্য সভা, শাখা সাহিত্য সভাসমূহক নিৰ্দেশ দিছে।
ইতিমধ্যে, অসম সাহিত্য সভাৰ বিভিন্ন পৰ্যায়ৰ সদস্যসকলেও ৰাজ্যখনৰ বিভিন্ন স্থানত দুৰ্গতক সহায় আগবঢ়াইছে ।
অসম সাহিত্য সভাৰ যোৰহাটৰ মুখ্য কাৰ্যালয়, গুৱাহাটী প্ৰশাসনীয় কাৰ্যালয় আৰু সংশ্লিষ্ট জিলাসমূহৰ আঞ্চলিক কাৰ্যালয়ৰ জৰিয়তে সদাশয় লোকে সাহায্য সামগ্ৰী দান কৰিব পাৰিব।
সভাৰ প্ৰধান সম্পাদক পদুম ৰাজখোৱাই সংশ্লিষ্ট জিলা সাহিত্য সভাসমূহৰ সম্পাদকক এইক্ষেত্ৰত যাৱতীয় উদ্যোগ লৈ তেওঁৰ নেতৃত্ব আৰু তদাৰকত এই সাহায্য আগবঢ়াবলৈ নিৰ্দেশ দিছে ।
তদুপৰি, অসম সাহিত্য সভাৰ দুৰ্যোগ প্ৰশমন তথা সাহায্য পুঁজিৰ নিৰ্দিষ্ট একাউণ্ট নম্বৰত যথাসাধ্য বৰঙণি আগবঢ়ালৈ ইচ্ছুক সদাশয় লোক তথা দল-সংগঠন, অনুষ্ঠান প্ৰতিষ্ঠানৰ প্ৰতি আহ্বান জনাইছে সভাপতি ড০পৰমানন্দ ৰাজবংশী আৰু প্ৰধান সম্পাদক পদুম ৰাজখোৱাই।
এপেক্স বেংক গুৱাহাটী শাখা (IFSC Code HDFCC0CACABL)ৰ 391042010030967 একাউণ্ট নম্বৰত ‘প্ৰধান সম্পাদক, অসম সাহিত্য সভা’ই পাব পৰাকৈ ধন জমা দিবলৈ অনুৰোধ কৰা হৈছে।
আনহাতে, অসমৰ এই বান পৰিস্থিতিৰ পৰিপ্ৰেক্ষিতত চৰকাৰীভাৱে আগবঢ়োৱা সাহায্য প্ৰকৃত দুৰ্গতজনে যাতে লাভ কৰে আৰু সাহায্য ধনৰাশিৰ উচিত ব্যৱহাৰ নিশ্চিত কৰিবলৈও অসম সাহিত্য সভাই ৰাজ্য চৰকাৰক আহ্বান জনাইছে।
বানপানী শুকোৱাৰ পাছত কোনো অঞ্চলত যাতে বেমাৰ-আজাৰে মহামাৰীৰ ৰূপ ল’ব নোৱাৰে তাৰ প্ৰতি সতৰ্কতামূলক ব্যৱস্থা নিশ্চিত কৰিবলৈ চৰকাৰক আহ্বান জনাইছে অসম সাহিত্য সভাই।
বিজ্ঞানসন্মতভাৱে অসমৰ বানপানী, গৰাখহনীয়াৰ দীৰ্ঘদিনীয়া সমস্যা সমাধানত ফলপ্ৰসু ব্যৱস্থা লোৱাত কেন্দ্ৰ আৰু ৰাজ্য চৰকাৰৰ ব্যৰ্থতাতো অসম সাহিত্য সভাই উদ্বিগ্নতা প্ৰকাশ কৰিছে।
অসমবাসীয়ে দাবী কৰি অহাৰ দৰে অসমৰ বানপানী সমস্যাক ৰাষ্ট্ৰীয় সমস্যা বুলি ঘোষণা কৰি খৰালিকালত যাৱতীয় ব্যৱস্থা নলৈ কেৱল বানপানীৰ সময়ত নিয়মমাফিক ঘোষণা বা সাহায্য প্ৰদানৰ গতানুগতিক প্ৰক্ৰিয়াতো অসম সাহিত্য সভাই উদ্বিগ্নতা প্ৰকাশ কৰে।
