‘ধলা-শদিয়া কাণ্ডৰ তদন্তৰ আওতালৈ অনা হওঁক ‘নিব্বাছ’ নামৰ সংগঠনটোক’- শনিবাৰে অসম সংগ্ৰামী মঞ্চৰ ৰাজ্যিক কাৰ্য্যালয়ত এখন সংবাদমেল অনুষ্ঠিত কৰি এই দাবী জনায় অসম সংগ্ৰামী মঞ্চৰ ৰাজ্যিক সাধাৰণ সম্পাদক সমৰজ্যোতি বেজবৰুৱাই।
তেওঁ লগতে কয়, ‘’ৰাজ্য কঁপাই যোৱা চিলাপথাৰ কাণ্ডৰ অন্যতম অভিযুক্তদ্বয় ক্ৰমে সুবোধ বিশ্বাস আৰু সুভাষ বিশ্বাসৰ বিৰুদ্ধে ৰুজু হোৱা অবৈধ মৰণাস্ত্ৰ ও মানৱ সৰবৰাহৰ গোচৰটোৱে প্ৰমাণ কৰিলে ৰাজ্যৰ বিভিন্ন জাতীয় দল-সংগঠনে দাবী কৰি অহা বিষয়টোৰ সত্যতা।‘’
বেজবৰুৱাই লগতে কয় যে কলকাতাত গ্ৰেপ্তাৰ হোৱা অনিল শ্বাহ নামৰ এজন অভিযুক্তৰ স্বীকাৰোক্তিৰ ভিত্তিত অসমত আহি উপস্থিত হোৱা কলকাতা আৰক্ষীয়ে কালি নিব্বাছৰ বিতৰ্কিত নেতা সুভাষ বিশ্বাসক আটক কৰা বিষয়টোৱে স্পষ্ট কৰি দিছে যে অসমত ঘটি থকা ঘটনাসমূহৰ আঁৰত পশ্চিমবংগ আৰু উত্তৰ-প্ৰদেশৰ দৰে ঠাইসমূহৰ ব্যক্তি আৰু সংগঠন জড়িত হৈ আছে।
তাৎপৰ্য্যপূৰ্ণভাৱে, বেজবৰুৱাই সন্দেহ কৰি কয় ‘যিহেতু মৰাণস্ত্ৰ সৰবৰাহ কৰাৰ বিষয়টো এইক্ষেত্ৰত জৰিত হৈ আছে,’ সেয়েহে সুবোধ বিশ্বাস নেতৃত্বাধীন ‘নিব্বাছ’ নামৰ সংগঠনটোৰ সকলো সদস্যকে তিনিচুকীয়া ধলা কাণ্ডৰ তদন্তৰ আওতালৈ আনিব লাগে।‘
তদুপৰি, অসম সংগ্ৰামী মঞ্চই আলোচনাপন্থী আলফা নেতা প্ৰবাল নেওগ আৰু বিভিন্ন জাতীয় দল-সংগঠনে বিতৰ্কিত বিধায়ক শিলাদিত্যকে ধৰি সুবোধ বিশ্বাস আৰু অন্য নেতাসকলৰ বিৰুদ্ধে ৰাজ্যৰ বিভিন্ন থানাত ৰুজু কৰা গোচৰসমূহৰ তদন্ত প্ৰক্ৰিয়া কিমান দূৰ আগবাঢ়িছে, সেই কথা গৃহ বিভাগে ৰাজহুৱা কৰিব লাগে বুলি দাবী জনায়।
