ৰাজ্যৰ বৰ্তমানৰ আৰক্ষী সঞ্চালক প্ৰধান কুলধৰ শইকীয়াই অহা ৩১ আগষ্টত অৱসৰ গ্ৰহণ কৰিব।
অহা ১ ছেপ্টেম্বৰত ৰাজ্যখনত এগৰাকী নতুন আৰক্ষী সঞ্চালক প্ৰধানে দায়িত্বভাৰ গ্ৰহণ কৰিব।
চৰকাৰৰ ফালৰ পৰা ইতিমধ্যে এগৰাকী সুদক্ষ আৰক্ষী বিষয়া তপন ডেকাক পৰৱৰ্তী আৰক্ষী সঞ্চালক প্ৰধান হিচাপে নিযুক্তি দিয়াৰ বাবে প্ৰস্তুতি প্ৰায় সম্পূৰ্ণ কৰিছে।
আনুষ্ঠানিকভাৱে আৰক্ষী বিষয়াগৰাকীক এতিয়ালৈকে জনোৱা হোৱা নাই যদিও মঙলবাৰে এই সন্দৰ্ভত গোটেই বিষয়টো স্পষ্ট হোৱাৰ সম্ভাৱনা আছে।
১৯৮৮ বৰ্ষৰ ভাৰতীয় আৰক্ষী সেৱাৰ বিষয়া ডেকা বৰ্তমান আই বিৰ উত্তৰ-পূবৰ যুটীয়া সঞ্চালক হিচাপে কৰ্মৰত।
তেওঁ দেশৰ শীৰ্ষ চোৰাংচোৱা হিচাপে ৱাশ্বিংটনত থকাৰ উপৰি আই বিৰ আন্ত:ৰাষ্ট্ৰীয় তথা ৰাষ্ট্ৰীয় সন্ত্ৰাসবাদ বিৰোধী গোটৰ নেতৃত্বত আছিল।
অসম আন্দোলনকালীন সময়ছোৱাত এগৰাকী আছু নেতা হিচাপে পৰিচিত ডেকা এগৰাকী অত্যন্ত মেধাবী ছাত্ৰ আছিল।
নতুন দিল্লীত উচ্চ শিক্ষা সম্পূৰ্ণ কৰা তপন ডেকাই প্ৰথমবাৰতেই ভাৰতীয় লোকসেৱা আয়োগৰ পৰীক্ষাত কৃতকাৰ্যতা লাভ কৰে।
হিমাচল কেডাৰৰ আই পি এছ বিষয়া ডেকাই ১৯৯৩-২০০১লৈ আলফা জড়িত উগ্ৰপন্থী বিৰোধী অভিযানৰ তদাৰক কৰিছিল।
ৰাষ্ট্ৰীয় নিৰাপত্তা উপদেষ্টা অজিত ডোভালৰ প্ৰিয়পাত্ৰ ডেকাই ১৯৯৮ চনৰ পৰাই চোৰাংচোৱা সংস্থাত সেৱা আগবঢ়াই আহিছে।
বৰ্তমান চোৰাংচোৱা সংস্থাৰ অতিৰিক্ত সঞ্চালক হিচাপে পদোন্নতি পোৱা ডেকাই নতুন দিল্লীলৈ যোৱাৰ কথা আছিল।
তেজপুৰৰ বাসিন্দা তপন ডেকা বৰ্তমান গুৱাহাটীত পৰিয়ালসহ চৰকাৰী আৱাসত থাকে।
এগৰাকী সুদক্ষ আৰক্ষী বিষয়া তপন ডেকাক আৰক্ষী সঞ্চালক প্ৰধান হিচাপে নিযুক্তি লাভ কৰিলে বিগত দিনত চৰ্চা লাভ কৰি অহা আৰক্ষী বিষয়াসকলৰ সকলো জল্পনা-কল্পনাৰ অন্ত পৰিব।
উল্লেখযোগ্য যে ২০২৩ চনৰ অৱসৰ গ্ৰহণ কৰিবলগীয়া তপন ডেকাই দীৰ্ঘদিন ধৰি আৰক্ষী সঞ্চালক প্ৰধান হিচাপে ৰাজ্যখনক সেৱা আগবঢ়োৱাৰ সুযোগ লাভ কৰিব।