২০২৬ চনৰ অসম বিধানসভা নিৰ্বাচনৰ বাবে কংগ্ৰেছ দলে মঙলবাৰে প্ৰাৰ্থীৰ প্ৰথমখন তালিকা ঘোষণা কৰিছে। এই তালিকাত আটাইতকৈ গুৰুত্বপূৰ্ণ খবৰটো হ’ল দলৰ সভাপতি তথা লোকসভাৰ সাংসদ গৌৰৱ গগৈক যোৰহাট সমষ্টিৰ পৰা প্ৰাৰ্থিত্ব প্ৰদান কৰা হৈছে। কংগ্ৰেছৰ এই সিদ্ধান্তই উজনি অসমত এক নতুন ৰাজনৈতিক প্ৰেক্ষাপট সৃষ্টি কৰিছে বুলি চৰ্চা হৈছে। বিশেষকৈ ভাৰতীয় জনতা পাৰ্টিৰ শক্তিশালী দুৰ্গ হিচাপে পৰিচিত উজনি অসমত গৌৰৱ গগৈৰ দৰে এজন ৰাষ্ট্ৰীয় পৰ্যায়ৰ নেতাক প্ৰক্ষেপ কৰি কংগ্ৰেছে এক বৃহৎ প্ৰত্যাহ্বান জনোৱাৰ পৰিকল্পনা কৰিছে। দলটোৱে ইয়াৰ জৰিয়তে উজনি অসমৰ ভোটাৰৰ মাজত এক নতুন উছাহ সৃষ্টি কৰিব বিচাৰিছে।
মাজতে ৰাইজৰ দলৰ সৈতে মিত্ৰতা হোৱাৰ চৰ্চা চলিছিল যদিও বৰ্তমানলৈকে এই মিত্ৰতাৰ আনুষ্ঠানিক ঘোষণা হোৱা নাই। অৱশ্যে দলটোৱে অসম জাতীয় পৰিষদৰ সৈতে নিৰ্বাচনী বুজাবুজি কৰাৰ কথা নিশ্চিত কৰিছে। ৰাইজৰ দলৰ সৈতে আসন বুজাবুজি নোহোৱাৰ ফলত কোনো কোনো ঠাইত বিৰোধীৰ ভোট বিভাজন হোৱাৰ সম্ভাৱনা আছে বুলিও ৰাজনৈতিক বিশেষজ্ঞসকলে মত প্ৰকাশ কৰিছে। কংগ্ৰেছে এতিয়াও ৰাইজৰ দলৰ সৈতে আলোচনা চলাই থকা বুলি জানিব পৰা গৈছে।
এই তালিকাত দলৰ কেইবাগৰাকীও জ্যেষ্ঠ আৰু প্ৰভাৱশালী নেতাৰ নাম অন্তৰ্ভুক্ত কৰা হৈছে। দিছপুৰ সমষ্টিৰ পৰা মীৰা বৰঠাকুৰ গোস্বামীক প্ৰাৰ্থিত্ব দিয়াৰ বিপৰীতে বৰচলা সমষ্টিৰ পৰা প্ৰাক্তন সভাপতি ৰিপুণ বৰাই প্ৰতিদ্বন্দ্বিতা কৰিব। নাজিৰাৰ পৰা বৰ্তমানৰ বিৰোধী দলপতি দেৱব্ৰত শইকীয়া আৰু চামগুৰিৰ পৰা ৰকিবুল হুছেইনৰ পুত্ৰ তানজিল হুছেইনে নিৰ্বাচনত অৱতীৰ্ণ হ’ব। উল্লেখযোগ্য যে শেহতীয়াকৈ কংগ্ৰেছ এৰি বিজেপিত যোগদান কৰা ভূপেন বৰাৰ সমষ্টি বিহপুৰীয়াত এইবাৰ নাৰায়ণ ভূঞাক প্ৰাৰ্থিত্ব প্ৰদান কৰা হৈছে।
কংগ্ৰেছে ১২৬ খন আসনৰ ভিতৰত প্ৰথম পৰ্যায়ত ৪২ গৰাকী প্ৰাৰ্থীৰ নাম ঘোষণা কৰিছে। গুৱাহাটী অঞ্চলৰ কমলপুৰত সত্যব্ৰত কলিতা, নলবাৰীত অশোক কুমাৰ শৰ্মা আৰু টিহুত ৰাতুল পাটোৱাৰীক প্ৰক্ষেপ কৰা হৈছে। উজনি অসমৰ দুলীয়াজানত ধ্ৰুৱ গগৈ, চাবুৱা-লাহোৱালত প্ৰাঞ্জল ঘাটোৱাৰ আৰু ডুমডুমাত দুৰ্গা ভূমিজক দলে প্ৰাৰ্থিত্ব দিছে। মাজুলীত ইন্দ্ৰনীল পেগু আৰু জোনাইত ৰাজ কুমাৰ মেদকক প্ৰাৰ্থিত্ব দিয়া হৈছে। মাৰ্ঘেৰিটাত প্ৰতীক বৰদলৈ আৰু সোণাৰিত উৎপল গগৈয়ে নিৰ্বাচন খেলিব। বৰাক উপত্যকাৰ শিলচৰত অভিজিৎ পাল আৰু সোনাই সমষ্টিত আমিনুল হক লস্কৰৰ নাম ঘোষণা কৰা হৈছে। ইয়াৰ উপৰিও কৰিমগঞ্জ উত্তৰত জাকৰিয়া আহমেদ আৰু উদালবন্ধত অজিত সিঙক প্ৰাৰ্থিত্ব দিয়া হৈছে।
দলটোৱে জ্যেষ্ঠ নেতাৰ লগতে বহু নতুন মুখক এই তালিকাত স্থান দি এক ভাৰসাম্য ৰক্ষাৰ চেষ্টা কৰিছে। ইয়াৰ উপৰিও বোকাজানত ৰতন ইংতি, তেজপুৰত পল্লৱী শইকীয়া গগৈ আৰু যমুনামুখত স্বপন কৰৰ নামো তালিকাত আছে। গৌৰীপুৰত আব্দুছ ছোবহান আলী চৰকাৰ আৰু বঙাইগাঁৱত গিৰীশ বৰুৱাই নিৰ্বাচন খেলিব। হাজো-শুৱালকুছিত নন্দিতা দাস আৰু বৰপেটাত মহানন্দ চৰকাৰক প্ৰক্ষেপ কৰা হৈছে। এপ্ৰিল মাহত নিৰ্বাচন অনুষ্ঠিত হোৱাৰ সম্ভাৱনা থকাৰ মাজতে কংগ্ৰেছৰ এই আগতীয়া তৎপৰতাই অসমৰ ৰাজনৈতিক পৰিৱেশ অধিক গৰম কৰি তুলিছে।
