অসমত বিধানসভা সচিবালয়ৰ কৰ্মচাৰীসকলে এতিয়াৰ পৰা পালন কৰিব লাগিব বিশেষ ড্ৰেচ ক’ড। এই ড্ৰেচ ক’ডৰ আওতাৰ বাহিৰৰ পোছাক পৰিধান কৰিব নোৱাৰিব বিধানসভা সচিবালয়ৰ কৰ্মচাৰীসকলে। ৰাজ্যৰ শাসনাধিষ্ঠ বিজেপি চৰকাৰে এই নতুন ড্ৰেচক’ড শীঘ্ৰেই কাৰ্যকৰী কৰিব বুলি জানিবলৈ দিছে বিধানসভা সচিবালয়ৰ বিষয়াসকলে।
সেই অনুসৰি পুৰুষ আৰু মহিলা, উভয় কৰ্মচাৰীয়ে কৰ্তব্যৰত অৱস্থাত সাধাৰণ পোছাক পৰিহাৰ কৰিব লাগিব। জাৰি হোৱা এক চৰকাৰী আদেশ অনুসৰি সচিবালয়ৰ মহিলা কৰ্মচাৰীসকলক এতিয়াৰ পৰা শাৰী, ছালৱাৰ-কামিজ আৰু মেখেলা-চাদৰ পৰিধান কৰিবলৈ নিৰ্দেশ দিয়া হৈছে।
আনহাতে পুৰুষ কৰ্মচাৰীসকলক ফৰ্মেল চাৰ্ট আৰু ট্ৰাউজাৰ পৰিধান কৰিবলৈ নতুন নিৰ্দেশনা যোগে নিৰ্দেশ দিয়া হৈছে। এই নতুন ড্ৰেচ ক’ডৰ আধাৰত সচিবালয়ত কাম কৰা কৰ্মচাৰীসকলে জিন্স, টি-চাৰ্ট আৰু লেগিংছ পিন্ধাত বাধা আৰোপ কৰা হৈছে বুলি নিৰ্দেশনাটোত লগতে উল্লেখ কৰা হৈছে।
ইফালে প্ৰতি বুধবাৰে কৰ্মচাৰীসকলক পৰম্পৰাগত পোছাক পিন্ধিবলৈও নিৰ্দেশ দিয়া হৈছে। বিধানসভাৰ অধিৱেশনৰ সময়ত কৰ্মচাৰীসকলক এক ইউনিফৰ্ম প্ৰদান কৰা হ’ব বুলিও নিৰ্দেশনাটোত লগতে প্ৰকাশ কৰা হৈছে।
তদুপৰি বিধানসভাৰ কাৰ্যক্ৰমৰ প্ৰচাৰৰ বাবে উপস্থিত থকা সংবাদ মাধ্যমৰ লোকসকলেও এতিয়াৰ পৰা চৰকাৰী নিৰ্দেশনা অনুসৰি পোছাক পিন্ধিব লাগিব। বিধানসভাৰ অধ্যক্ষ বিশ্বজিৎ দৈমাৰীৰ নিৰ্দেশনা অনুসৰি এই নতুন ড্ৰেচ ক’ড নিৰ্দেশ প্ৰদান কৰা হৈছে।
এই নিৰ্দেশনা উলংঘন কৰিলে ৰাজ্যিক বিধানসভাৰ কৰ্মচাৰীৰ বিৰুদ্ধে ব্যৱস্থা গ্ৰহণ কৰা হ’ব বুলিও নতুন নিৰ্দেশনাত স্পষ্টকৈ উল্লেখ কৰা হৈছে।