এন আৰ চিৰ পৰা প্ৰায় ৫৮ হাজাৰ কোচ ৰাজবংশী লোকৰ নাম বাদ পৰা বুলি অভিযোগ উত্থাপন কৰি সেইসকল লোকৰ নাম অন্তৰ্ভুক্তিৰ দাবীত আজি কোচ ৰাজবংশী ছাত্ৰ সন্থাই আহ্বান জনোৱা ১২ ঘণ্টীয়া অসম বন্ধৰ প্ৰভাৱ শিৱসাগৰ জিলাত মিশ্ৰিত ৰূপত পৰে।
বন্ধৰ সমৰ্থনকাৰী সকলে শিৱসাগৰৰ প্ৰগতি চাৰিআলি, ষ্টেশ্যন চাৰিআলি, দ’লমুখ চাৰিআলিকে আদি কৰি নগৰৰ বিভিন্ন স্থানত টায়াৰ জ্বলাই প্ৰতিবাদ সাব্যস্ত কৰাৰ লগতে বন্ধ সফল কৰিবলৈ চেষ্টা চলায়।
পুৱা ৫ বজাতে বন্ধৰ সমৰ্থক সকল পথলৈ ওলাই আহি যান-বাহন চলাচল বন্ধ কৰি দিয়াৰ লগতে ব্যৱসায়িক প্ৰতিষ্ঠান সমূহ বন্ধ কৰি দিয়ে। অৱশ্যে দুই এখন ব্যক্তিগত বাহন চলাচল কৰা পৰিলক্ষিত হয়।
ৰাতিপুৱা ৫ বজাৰ পৰা সন্ধিয়া ৫ বজালৈ আহ্বান জনোৱা এই বন্ধৰ ফলত শিৱসাগৰৰ চৰকাৰী তথা বেচৰকাৰী কাৰ্যালয় সমূহত কৰ্মচাৰীৰ উপস্থিতি কিছু পৰিমানে সেৰেঙা আছিল।