তিনিচুকীয়া জিলাৰ ধলাত বঙালী সম্প্রদায়ৰ ৫ জন নিৰীহ লোকক গুলীয়াই হত্যা কৰাৰ প্ৰতিবাদত সদৌ অসম বঙালী যুৱ ছাত্ৰ ফেডাৰেশ্যনে আহ্বান জনোৱা ২৪ ঘণ্টীয়া অসম বন্ধৰ কোনো প্ৰভাৱ নপৰিল শিৱসাগৰত।
আজি পুৱাৰে পৰা শিৱসাগৰত স্বাভাৱিক জীৱন যাত্ৰা অব্যাহত থাকে। নগৰখনৰ সকলো দোকান পোহাৰ, চৰকাৰী-বেচৰকাৰী অনুষ্ঠান-প্ৰতিষ্ঠান, স্কুল কলেজৰ লগতে সকলো চৰকাৰী কাৰ্য্যালয় সম্পূৰ্ণ ৰূপে খোলা থাকে।
ইয়াৰ উপৰিও অসম ৰাজ্যিক পৰিবহণ নিগমৰ সকলো যানবাহনৰ চলাচল অব্যাহত থকাৰ লগতে চৰকাৰী বেচৰকাৰী আৰু ব্যক্তিগত যান বাহনসমূহো ৰাজপথত স্বাভাৱিক ৰূপত চলাচল কৰা দেখা গ’ল।
আনহাতে, বন্ধৰ সময়ছোৱাত শিৱসাগৰত বন্ধৰ সমৰ্থন কৰিবলৈ বঙালী যুৱ ছাত্ৰ ফেডাৰেশ্যনৰ কোনো এজন লোক ৰাজপথলৈ ওলাই অহা দেখা নগ’ল। তাৰ পৰিৱৰ্ত্তে বীৰ লাচিত সেনাৰ লগতে বহু কেইটা সংগঠনে পুৱাই বন্ধ পালন নকৰিবলৈ ৰাইজক আহ্বান জনাই ৰাজপথলৈ ওলাই আহে।
ইপিনে, সদৌ অসম বঙালী যুৱ ছাত্ৰ ফেডাৰেশ্যনে আহ্বান জনোৱা ২৪ ঘণ্টীয়া অসম বন্ধৰ প্ৰতি জনসাধাৰণৰ বিশেষ সঁহাৰি নোপোৱাৰ বাবে সংগঠনটোৱে ২৪ ঘন্টীয়া বন্ধটো ১২ ঘণ্টালৈ হ্ৰাস কৰে।