দেশৰ কেন্দ্ৰীয় ট্ৰেড ইউনিয়নসমূহ, কৰ্মচাৰী ফেডাৰেছনসমূহ আৰু কৃষক সংগঠনসমূহে যৌথভাৱে ৯ জুলাইত আহ্বান কৰা সাধাৰণ ধৰ্মঘটে অসমৰো স্বাভাৱিক জীৱন যাত্ৰা স্তব্ধ কৰি তোলে। মটৰ শ্ৰমিকসকলৰ ধৰ্মঘটে যাতায়ত ব্যৱস্থা অভূতপূৰ্বভাৱে ব্যাহত কৰি তোলে। ফলত সাধাৰণ ধৰ্মঘটে ৰাজ্যখনত ‘অসম বন্ধ’ৰ ৰূপ ল’লে।
কেন্দ্ৰ আৰু ৰাজ্যৰ বিজেপি চৰকাৰৰ জনবিৰোধী কাম-কাজ বোৰত অসন্তুষ্ট হৈ এই ধৰ্মঘটলৈ অসমৰ জনগণে অভূতুৰ্ব সঁহাৰি জনালে। খবৰ পোৱ মতে অসমৰ চাৰিওটা শোধানাগাৰত উৎপাদন ব্যাহত হয়, কয়লাখননো বন্ধ হৈ পৰে।ইয়াৰোপৰি বিদ্যুৎ খণ্ড, বেংক-বীমা, বিএছএনএল আৰু পোষ্টেলৰ কৰ্মচাৰীসকলেও সম্পূৰ্ণৰূপে কৰ্মবিৰতি পালন কৰে। মুখ্য অভিযন্তাসহ সকলো অভিযন্তা আৰু সৰ্বস্তৰৰ বিদ্যুৎ কৰ্মচাৰীৰ অংশগ্ৰহণে গুৱাহাটীত থকা অসমৰ বিদ্যুৎ খণ্ডৰ মুখ্য কাৰ্যালয় বিজুলী ভৱনৰ সকলো কাম-কাজ স্তব্ধ কৰি তোলে। পাৱাৰ গ্ৰীড কৰ্পোৰেচনৰ কৰ্মচাৰীসকলে উত্তৰ-পূৱৰ ৭ খন ৰাজ্যৰ ২৩ টা উপ-শাখাত ধৰ্মঘট কাৰ্যসূচী পালন কৰে।
উল্লেখ্য যে ৯ জুলাইৰ এই ধৰ্মঘটৰ বিশেষ বৈশিষ্ট্য আছিল ব্যাক্তিগত খণ্ডৰ কল-কাৰখানাৰ শ্ৰমিকসকলৰ স্বতঃস্ফূট ধৰ্মঘট। পোৱা ৫ বজাৰ পৰা কাৰখানাবোৰৰ প্ৰৱেশ দ্বাৰত শ্ৰমিকসকলে অৱস্থান কৰি উৎপাদন কাৰ্য সম্পূৰ্ণৰূপে বন্ধ কৰি ৰাখে। দক্ষিণ কামৰূপৰ বকোৰ ওচৰৰ চাটাবাৰীৰ উদ্যোগী পাম, পলাশবাৰী আৰু ৰাণী অঞ্চলৰ উদ্যোগসমূহৰ উৎপাদনো ব্যাহত হৈ থাকে। উত্তৰ গুৱাহাটীৰ আমিনগাঁৱত থকা উদ্যোগী পামৰ সকলো কাৰখানাৰ হেজাৰ হেজাৰ শ্ৰমিকে প্ৰধান প্ৰৱেশ দ্বাৰত অৱস্থান কৰি ধৰ্মঘট সফল কৰি তোলে।
ইফালে উত্তৰ গুৱাহাটী, সৰপাৰা আৰু গোপেনাৰীসহ অসমৰ ৯ টাকৈ বটলিং প্লান্টত কাম-কাজো বন্ধ হৈ পৰে। ডিগবৈ, নুনমাটি, নুমলীগড় আৰু বঙাইগাঁও শোধানাগাৰত সাত হাজাৰৰো অধিক ঠিকা শ্ৰমিকে ধৰ্মঘট পালন কৰি এক নতুন নজিৰ সৃষ্টি কৰে।
গুৱাহাটীৰ বোন্দাত থকা অসম ৰুফিং কোম্পানী, অসম কাৰ্বন কোম্পানী, ইণ্ডিয়া কাৰ্বন কোম্পানী, বোকাজানৰ চিমেন্ট কাৰখানাৰ ধৰ্মঘট আছিল উল্লেখযোগ্য। নগাঁৱৰ টাউনত ধৰ্মঘটৰকাৰীসকলক আৰক্ষীয়ে বাধা প্ৰদান কৰে আৰু ৮০ গৰাকী ধৰ্মঘটকাৰীক গ্ৰেপ্তাৰ কৰে বুলি জানিব পৰা গৈছে।
কোকৰাঝাৰ জিলাৰ চালেকাটিৰ এন টি পি চি (NTPC)ৰ ঠিকা শ্ৰমিকসকলে কৰ্মবিৰতি পালন কৰি এন টি পি চিৰ চাৰিওফালে সমদল উলিয়াই। অসমৰ চাহ বাগানসমূহতো দেশজোৰা ধৰ্মঘটে ব্যাপক প্ৰভাৱ বিস্তাৰ কৰে। লক্ষীমপুৰ, বিশ্বনাথ, শোণিতপুৰ, দৰং, ওদালগুৰী, বঙাইগাও-চিৰাং, কোকৰাঝাৰ, ধুবুৰী আৰু কাছাৰ, জিলাৰ চাহ বাগানসমূহত সম্পূৰ্ণ ধৰ্মঘট পালন কৰে। ডিব্ৰুগড়, তিনিচুকীয়া, শিৱসাগৰ, যোৰহাট, গোলাঘাট আৰু নগাঁও জিলাৰ বাগানে বাগানে ধৰ্মঘটৰ সমৰ্থনত বিক্ষোভ কাৰ্যসূচী পালন কৰে।
ইয়াৰোপৰি ধৰ্মঘট পালনৰ সময়ছোৱাত শ্ৰমিক কৰ্মচাৰীসকলে এইবাৰ ব্যাপক সংখ্যাত সভা-সমদলত যোগদান কৰে। ঠায়ে ঠায়ে পিকেটিং কৰিও ধৰ্মঘট সফল কৰাত সহায় কৰে। নিৰ্মণ খণ্ডৰ শ্ৰমিক, অঙ্গনৱাড়ী কৰ্মী আৰু সহায়িকাসকল, আশা কৰ্মী আৰু ৰন্ধন কৰ্মচাৰীসকলে ব্যাপক হাৰত ধৰ্মঘটত যোগদান কৰিছে।
চকা বন্ধ কাৰ্যসূচীৰ প্ৰতি সঁহাৰি জনাই অসমৰ বিভিন্ন ঠাইত মটৰ চালক সকলেও ৰাজপথত অৱস্থান গ্ৰহণ কৰে। সমগ্ৰ অসমতে মটৰ চালক সংগঠনসমূহে চকা বন্ধ কাৰ্যসূচীৰে ধৰ্মঘট পালন কৰে। গুৱাহাটীৰ ওচৰৰ খানাপাৰাৰ টাৰ্মিনাচত কেইবাশ মটৰ পৰিবহন শ্ৰমিকে পথত অৱস্থান কৰি চকাবন্ধ সফল কৰি তোলে। গুৱাহাটীত ভিন ভিন ঠাইত তিনিগৰাকী ধৰ্মঘটকাৰীক আৰক্ষীয়ে গ্ৰেপ্তাৰ কৰে।
একেদৰে গুৱাহাটীত আইএনটিইউচি, এআইটিইউচি, চিআইটিইউ, এআইইউটিইউচিসহ ট্ৰেড ইউনিয়ন, অসম ৰাজ্যিক কৃষক সভা আৰু কৰ্মচাৰী ফেডাৰেচনসমূহৰ নেতৃত্বত ধৰ্মঘটকাৰীসকলে গুৱাহাটী ক্লাৱৰ ৰ’টাৰীত বিক্ষোভ প্ৰদৰ্শন কৰে। বিক্ষোভকাৰী সকলে সমদল কৰিব বিচৰাত আৰক্ষীৰ সৈতে প্ৰচণ্ড হেচা ঠেলা হয়। সমদল উলিওৱাত বাধা সৃষ্টি কৰে।
শান্তিপূৰ্ণ ধৰ্মঘটকাৰীৰ ওপৰত আৰক্ষীৰ অহেতুক হস্তক্ষেপক সংগঠনসমূহৰ নেতৃবৃন্দই একেমূখে নিন্দা কৰে। বিক্ষোভকাৰীসকলক সম্বোধন কৰি বক্তব্য আগবঢ়ায় ৰমেন দাস, তপন শৰ্মা, বীৰেন শৰ্মা, এ ৰেজ্জাক আহমেদ, প্ৰমোদ ভাগৱতী আৰু পণ্ডিত এছ এন দাসে। এই কাৰ্যসূচীত এছ এফ আই, এ আই এছ এফ, ডি ৱাই এফ আই আৰু গণতান্ত্ৰিক মহিলা সমিতিৰ নেতৃবৃন্দইও যোগদান কৰে। বক্তাসকলে কয় যে বিজেপি চৰকাৰ খনে জনবিৰোধী আৰু জাতীয় স্বাৰ্থ কৰ্মকাণ্ডবোৰ বন্ধ নকৰিলে অহা দিনত ধাৰাবাহিক ধৰ্মঘটৰ নিচিনা চৰম কাৰ্যসূচী গ্ৰহণ কৰিব বুলি সকীয়নী দিয়ে। আৰু ট্ৰেড ইউনিয়নসমূহৰ যৌথ মঞ্চই অসমত ধৰ্মঘট সফল কৰি তোলাৰ বাবে অসমৰ সংগ্ৰামী জনগণলৈ অভিনন্দন জ্ঞাপন কৰে।
