আগন্তুক ২০২৬ বৰ্ষৰ অসম বিধানসভা নিৰ্বাচনৰ বাবে বৃহস্পতিবাৰে ভাৰতীয় জনতা পাৰ্টীয়ে ৮৮ গৰাকী প্ৰাৰ্থীৰ নাম সম্বলিত প্ৰথমখন আনুষ্ঠানিক তালিকা প্ৰকাশ কৰিছে। দিল্লীত অনুষ্ঠিত দলৰ কেন্দ্ৰীয় নিৰ্বাচন সমিতিৰ বৈঠকৰ অন্তত প্ৰকাশ পোৱা এই তালিকাত ৰাজ্যৰ মুখ্যমন্ত্ৰী হিমন্ত বিশ্ব শৰ্মাই পুনৰবাৰ নিজৰ গৃহ সমষ্টি জালুকবাৰীৰ পৰা প্ৰতিদ্বন্দ্বিতা কৰিব বুলি স্পষ্ট কৰা হৈছে। ১২৬ খন আসন বিশিষ্ট অসম বিধানসভাৰ বাবে অহা ৯ এপ্ৰিলত অনুষ্ঠিত হ’বলগীয়া নিৰ্বাচনৰ প্ৰাকমুহূৰ্তত প্ৰকাশ পোৱা এই তালিকাই ৰাজ্যৰ ৰাজনৈতিক দৃশ্যপট অধিক সৰৱ কৰি তুলিছে।
প্ৰকাশিত তালিকাখনৰ অন্যতম আকৰ্ষণ হৈছে বুধবাৰে কংগ্ৰেছ ত্যাগ কৰি বিজেপিত যোগদান কৰা জ্যেষ্ঠ নেতা প্ৰদ্যুৎ বৰদলৈ। বিজেপিত আনুষ্ঠানিকভাৱে যোগদান কৰাৰ এদিন পিছতেই দলৰ শীৰ্ষ নেতৃত্বই তেওঁক গুৰুত্বপূৰ্ণ দিছপুৰ সমষ্টিৰ পৰা প্ৰাৰ্থিত্ব প্ৰদান কৰিছে। ইয়াৰ উপৰিও ৰাজ্য চৰকাৰৰ কেইবাগৰাকীও জ্যেষ্ঠ মন্ত্ৰীক তেওঁলোকৰ পূৰ্বৰ সমষ্টিৰ পৰাই টিকট দিয়া হৈছে। ৰাজ্যৰ বিত্ত মন্ত্ৰী অজন্তা নেওগে গোলাঘাট সমষ্টিৰ পৰা, ৰঞ্জিত কুমাৰ দাসে ভৱানীপুৰ-সৰভোগৰ পৰা, পীযুষ হাজৰীকাই জাগীৰোডৰ (অনুসূচিত জাতিৰ বাবে সংৰক্ষিত) পৰা, অশোক সিংহলে ঢেকীয়াজুলিৰ পৰা আৰু ৰণোজ পেগুৱে ধেমাজি (অনুসূচিত জনজাতিৰ বাবে সংৰক্ষিত) সমষ্টিৰ পৰা প্ৰতিদ্বন্দ্বিতা আগবঢ়াব।
আনহাতে, জ্যেষ্ঠ মন্ত্ৰী চন্দ্ৰমোহন পাটোৱাৰীক এইবাৰ টিহু সমষ্টিৰ পৰা প্ৰাৰ্থিত্ব দিয়া হৈছে। ঠিক একেদৰে, বিমল বৰাক টিংখাং আৰু সঞ্জয় কিষাণক মাকুম সমষ্টিৰ পৰা বিজেপিৰ টিকট প্ৰদান কৰা হৈছে। গুৱাহাটী মহানগৰীৰ আন দুখন গুৰুত্বপূৰ্ণ আসন ক্ৰমে নতুন গুৱাহাটী সমষ্টিত দিপ্লু ৰঞ্জন শৰ্মা আৰু গুৱাহাটী কেন্দ্ৰীয় সমষ্টিত বিজয় কুমাৰ গুপ্তাক অৱতীৰ্ণ কৰোৱা হৈছে। উজনি অসমৰ দলীয় দুৰ্গ হিচাপে পৰিচিত ডিব্ৰুগড়, তিনিচুকীয়া, ডিগবৈ, ডুমডুমা আৰু মাৰ্ঘেৰিটা আদি সমষ্টিৰ বাবেও প্ৰাৰ্থীৰ নাম এই তালিকাত সন্নিৱিষ্ট কৰা হৈছে।
দলৰ মহিলা সবলীকৰণৰ দিশটোৰ প্ৰতি লক্ষ্য ৰাখি এই প্ৰথমখন তালিকাত মুঠ ৬ গৰাকী মহিলা প্ৰাৰ্থীক স্থান দিয়া হৈছে। পৰৱৰ্তী পৰ্যায়ত বাকী থকা সমষ্টিসমূহৰ বাবেও দলটোৱে মিত্ৰজোঁটৰ সৈতে আলোচনা মৰ্মে অতি শীঘ্ৰেই প্ৰাৰ্থীৰ নাম ঘোষণা কৰিব বুলি আশা কৰা হৈছে। উল্লেখ্য যে সমগ্ৰ ৰাজ্যজুৰি এটা পৰ্যায়ত অনুষ্ঠিত হ‘বলগীয়া এই নিৰ্বাচনৰ ভোটগণনা অহা ৪ মে’ তাৰিখে সম্পন্ন হ’ব। নিৰ্বাচন আয়োগে দিন ঘোষণা কৰাৰ পাছতে আৰু শাসকীয় দলটোৱে বৃহৎসংখ্যক প্ৰাৰ্থীৰ তালিকা প্ৰকাশ কৰাৰ লগে লগে এতিয়া ৰাজ্যজুৰি নিৰ্বাচনী প্ৰচাৰ অভিযান অধিক তীব্ৰতৰ হৈ পৰিব বুলি ৰাজনৈতিক বিশ্লেষকসকলে মত প্ৰকাশ কৰিছে।
