ৰাজ্যৰ চৌদিশে নাগৰিকত্ব (সংশোধন) আইনৰ বিৰুদ্ধে উত্তাল প্ৰতিবাদ সাব্যস্ত কৰি থকাৰ মাজতে বিজেপিয়ে আইনখনৰ সমৰ্থনত মিছড কল সেৱা মুকলি কৰে।
আজি ‘কা’ বিৰোধী আন্দোলনৰ বিৰুদ্ধে বিজেপিয়ে শক্তি প্ৰদৰ্শন কৰি ৬০ হাজাৰ লোকৰ সমাবেশেৰে খানাপাৰা পশু চিকিৎসা বিজ্ঞান মহাবিদ্যালয়ৰ খেলপথাৰত বুথ সভাপতি আৰু নিৰ্বাচিত জনপ্ৰতিনিধিসকলৰ সন্মিলন অনুষ্ঠিত কৰে।
এই সন্মিলনতে ৰাজ্যিক বিজেপিৰ সভাপতি ৰঞ্জিত দাসে ভাষণ প্ৰদান কৰি বিজেপিৰ আগন্তুক নিৰ্বাচনী প্ৰস্তুতি সম্পৰ্কে অৱগত কৰে।
‘‘২১ চনৰ নিৰ্বাচনৰ কথা আগত ৰাখি ২০২০ চনৰ কেলেণ্ডাৰ প্ৰস্তুত কৰা হৈছে,’’ দাসে কয়।
অহা ৭ জানুৱাৰিৰ পৰা বিজেপি কৰ্মীসকলে বুথে বুথে গৈ ‘কা’ৰ বাস্তৱ সত্য সম্পৰ্কে ৰাইজক অৱগত কৰি সম্পৰ্ক অভিযান আৰম্ভ কৰিব।
১২ জানুৱাৰিত বিজেপিৰ যুৱ মৰ্চাৰ কাৰ্য্যকৰ্তা সকলে যুৱ সম্পৰ্ক অভিযানৰ অংশস্বৰূপে সকলো ৰাজনৈতিক, অৰাজনৈতিক দলৰ যুৱকক সাক্ষাৎ কৰিব।
২০-২৫ জানুৱাৰীলৈ বুথ পৰ্যায়ত পৰ্যালোচনা সভা অনুষ্ঠিত কৰাৰ পাছত ২৭-২৮ জানুৱাৰীত আইদেউ বুলনি কাৰ্য্যসূচী অনুষ্ঠিত কৰা হ’ব বুলিও দাসে জনায়।
তদুপৰি, ৩০ জানুৱাৰীত মহাত্মা গান্ধীৰ মৃত্যু তিথি উপলক্ষে মণ্ডল ভিত্তিত বিজেপিয়ে কাৰ্যসূচী হাতত ল’ব।
‘‘কংগ্ৰেছৰ অস্তিত্ব জাগৰণ চল চাই কঠিয়া পৰাৰ দৰে। কংগ্ৰেছে এতিয়া কক বকাই আছে। ১৯৭১ চনৰ আগত অহা লাখ লাখ মানুহক নথি পত্ৰ নোহোৱাকৈ তেওঁলোকে স্বদেশী কৰিলে। কংগ্ৰেছক ধিক্কাৰ দিছোঁ, তেওঁলোক গণ শত্ৰু। যিসকল কংগ্ৰেছীয়ে চাবুৱাত বিধায়কৰ ঘৰ জ্বলাইছে, যি কংগ্ৰেছী কৰ্মীয়ে মহিলা বিজেপি কাৰ্যকৰ্তাক চুলিত ধৰি অত্যাচাৰ কৰিছিল সেই সকলে উপলব্ধি কৰি এই সভাত অংশগ্ৰহণ কৰিছে,’’ ৰঞ্জিত দাসে নিজৰ ভাষণত এইদৰে কয়।
আনহাতে, ৰঞ্জিত দাসে কেন্দ্ৰীয় চৰকাৰক CAB ৰ পৰা C(A)A কৰাৰ বাবে বিজেপিৰ ৰাজ্যিক সমিতিৰ ফালৰ পৰা অভিনন্দন জ্ঞাপন কৰে।
‘কা’ সমৰ্থনত ৮৮৬৬২৮৮৬৬২ নম্বৰত missedcall দিয়াৰ বাবে বিজেপিৰ কাৰ্য্যকৰ্তা সকলক বিজেপিৰ ৰাজ্যিক সভাপতি গৰাকীয়ে আহ্বান জনায়।
