এন আৰ চিক লৈ উগ্ৰ হিন্দুত্ববাদী অংশটোৰ বাদে প্ৰায় সকলোৱেই সন্তুষ্টি প্ৰকাশ কৰাৰ বিপৰীতে ৰাজ্যিক বিজেপিয়ে তীব্ৰ অসন্তুষ্টি প্ৰকাশেৰে প্ৰতিক্ৰিয়া কৰিছে।
আনকি এখোপ আগলৈ গৈ ৰাজ্যিক বিজেপিৰ সভাপতি ৰঞ্জিত দাসে অসমত বসবাস কৰা ভাৰতীয়সকলৰ সুৰক্ষাক লৈ নিজৰ উদ্বেগ প্ৰকাশ কৰে।
“বিশ্বাস” উপাধিটো থকা বহু হিন্দু ভাৰতীয় লোকৰ নাম এন আৰ চিৰ পৰা বাদ পৰা বুলি অভিযোগ আনিছে সভাপতি দাসে।
অসম বিজেপিৰ কাৰ্যালয় সম্পাদক সুদীপ বিশ্বাসৰ মাকৰ নামো এন আৰ চিৰ চূড়ান্ত তালিকাত নাই। এই কথাও জনালে সভাপতিজনে।
“ৰিফিউজি চাৰ্টিফিকেইট গ্ৰহণ নকৰাৰ ফলত বহু ভাৰতীয়ৰ নাম নাই এন আৰ চিত। বিশ্বাস উপাধিৰ বহু লোকৰ নাম অহা নাই। বিশ্বাস উপাধি হোৱা বাবে আমাৰ কাৰ্যালয় সম্পাদক সুদীপ বিশ্বাসৰ মাতৃৰ নাম নাই। তেওঁ পশ্চিম বংগৰ পৰা আহিছিল”, দাসে কয়।
ৰঞ্জিত দাসৰ দাবী, এন আৰ চিত নাম নহা ভূমিপুত্ৰৰ সংখ্যা ২ লাখতকৈ কম নহ’ব। আনহাতে প্ৰায় ৪ লাখ ভাৰতীয়ই আৱেদন জনোৱা নাই।
“আগন্তুক দিনত এই এন আৰ চি বিশ্বাস নকৰি ৰাষ্ট্ৰীয় পৰ্যায়ৰ এখন এন আৰ চি বিচাৰিছো। এইখনৰ ওপৰত ভৰসা কৰিব নোৱাৰি, এইখনৰ ওপৰত ভীষণ অসন্তুষ্টি প্ৰকাশ কৰিছো। ৰাষ্ট্ৰীয় পৰ্যায়ত এন আৰ চি হ’লে ভাৰতৰ ভিন্ন প্ৰান্তৰ পৰা অসমলৈ যিকোনো সূত্ৰে আহি বসবাস কৰা লোকে তেওঁলোকৰ লিগেচি সহজে অন্য ৰাজ্যত বিচাৰি পাব”, আজি ৰাজ্যিক কাৰ্য্যালয়ত দিয়া সংবাদমেলত দাসে কয়।
“বিদেশী ন্যায়াধিকৰণৰ ৰায়লৈ আমি অপেক্ষা নকৰো। ১৯ লাখৰ ভিতৰত দুই-এজনক বিদেশী ন্যায়াধিকৰণলৈ পঠালেই ৰাজ্য চৰকাৰে এখন আইন বা বিধেয়ক আনি হ’লেও যিকোনো প্ৰকাৰে ভাৰতীয় মূলৰ মানুহক ৰক্ষা কৰিব লাগিব। জনগণৰ স্বাৰ্থত বিধানসভা বা ন্যায়পালিকাৰ জৰিয়তে আইন আনিবলৈ যিকোনো পদক্ষেপ ল’বলৈ বাধ্য হ’ম”, ভাৰতীয়ৰ চিন্তাত কাতৰ দাসে কয়।
কেৱল আইনী সাহায্যই নহয় ভাৰতীয় জনতা পাৰ্টীৰ ৪০ লাখ কৰ্মকৰ্তাক তন-মন-ধন সমৰ্পণ কৰি বিদেশী ন্যায়াধিকৰণৰ পৰা প্ৰকৃত ভাৰতীয়ক উলিয়াই আনিবৰ বাবে আহ্বান জনাইছো বুলি তেওঁ
আনহাতে, বহু সংখ্যক অবৈধ বাংলাদেশীৰ নাম এন আৰ চিত সোমোৱা বুলি অভিযোগ আনি দাসে কয়, “১৯৯১ চনতে প্ৰয়াত মুখ্য মন্ত্ৰী হিতেশ্বৰ শইকীয়াই ৰাজহুৱাকৈ ৩০ লাখ বিদেশী থকা বুলি কৈছিল। শ্ৰী প্ৰকাশ জয়ছোৱালে বাংলাদেশৰ পৰা ৫০ লাখ বিদেশী অসমত থিতাপি লোৱা বুলি ৰাজ্যসভাত কৈছিল। আমাৰ প্ৰশ্ন হৈছে ৯১ চনতে যদি ৩০ লাখ বাংলাদেশী আছিল তেন্তে আজিৰ ১৯ লাখক লৈ কেনেকৈ সন্তুষ্ট হ’ম?”
হিতেশ্বৰ শইকীয়া, শ্ৰী প্ৰকাশ জয়ছোৱালকে ধৰি আছুৰ নেতৃত্বৰ বক্তব্যক নস্যাত কৰিলে এইখন এন আৰ চিয়ে।
প্ৰতীক হাজেলাক সমালোচনা কৰি দাসৰ মন্তব্য, “প্ৰতীক হাজেলাই গোকাট মিছা কথা কৈ ২৭ শতাংশ পুনৰীক্ষণ হোৱা বুলি উচ্চতম ন্যায়ালয়ক ক’লে। তেওঁক প্ৰত্যাহ্বান জনাইছো ২৭ শতাংশ পুনৰীক্ষণ কৰিব বুলি দিয়া বিজ্ঞাপন আছে যদি দেখুওৱাক।”
“চৰকাৰৰ সদিচ্ছা থকা বাবে ৫৫ হাজাৰ কৰ্মচাৰীক নিয়োগ কৰিছিলো। তেওঁলোকৰ কষ্টৰ মূল্য প্ৰতীক হাজেলাই কামত লগাব নোৱাৰিলে। ৭ মাহ ধৰি বিনা পইচাৰে কাম কৰিলে এইসকল কৰ্মচাৰীয়ে”, দাসে কয়।