‘গছত কঁঠাল ওঁঠত তেল’ বুলি অসমীয়া ভাষাত সোণসেৰীয়া এফাকি কথা আছে। এইফাকি এতিয়া প্ৰযোজ্য হৈছে ৰাজ্যৰ প্ৰধান শাসনত থকা প্ৰধান দলটোৰ ক্ষেত্ৰত।
ৰাজ্যত ৯ ডিচেম্বৰত সমাপ্ত হোৱা পঞ্চায়ত নিৰ্বাচনৰ ফলাফলক লৈ বহু আশাবাদী অসম বিজেপি এতিয়া পঞ্চায়ত নিৰ্বাচনৰ বিজয় উৎসৱ পাতিবলৈ উদগ্ৰীৱ হৈ পৰিছে। দলটো ইতিমধ্যেই সাজু হৈছে ‘বিজয় উৎসৱ’ পাতিবলৈ। সাজু হৈছেই যেতিয়া কথাষাৰনো নোকোৱাকৈ থাকে কেনেকৈ? সেয়ে, আজি হেঙেৰাবাৰীত এখন সংবাদমেলত দলৰ ৰাজ্যিক সভাপতি ৰঞ্জিত দাসে ঘোষণা কৰিয়েই দিলে বিজয় উৎসৱৰ স্থান-কালৰ কথা।
“১৪ ডিচেম্বৰত ডিব্ৰুগড়ৰ নাহৰকটীয়াত হ’ব বিজয় উৎসৱ। ডিব্ৰুগড় জিলা সমিতিয়ে ব্যৱস্থা কৰিছে”, ৰাজ্যিক সভাপতি ৰঞ্জিত দাসে ক’লে।
ৰঞ্জিত দাসৰ মতে প্ৰথম পৰ্যায়ৰ দৰে দ্বিতীয় পৰ্যায়ৰ পঞ্চায়ত নিৰ্বাচনতো সকলোতকৈ ভাল ফলাফল দেখুৱাব বিজেপিয়ে। তেওঁ আজিৰ সংবাদমেলত দ্বিতীয় পৰ্যায়ৰ নিৰ্বাচনত কোন জিলাত কিমান পঞ্চায়ত বিজেপিয়ে দখল কৰিব তাৰো আনুমানিক তথ্য দাঙি ধৰিলে।
তেওঁ প্ৰকাশ কৰা তথ্য অনুসৰি কাছাৰ জিলাত বিজেপিয়ে ৮৫খন, কংগ্ৰেছে ৫০ আৰু এ আই য়ু ডি এফে ৩০খন পঞ্চায়ত লাভ কৰিব। ইয়াৰ উপৰি, কৰিমগঞ্জত বিজেপিয়ে ৪০খন, কংগ্ৰেছে ৩০খন আৰু এ আই য়ু ডি এফে ২০-২৫খন পঞ্চায়ত লাভ কৰাৰ সমান্তৰালকৈ হাইলাকান্দিত বিজেপিয়ে ৩০খন, কংগ্ৰেছে ২২খন আৰু এ আই য়ু ডি এফে ১০খন পঞ্চায়ত নিজৰ দখললৈ আনিব।
কাছাৰ জিলাত যিহেতু কেইবাজনো বিজেপি বিধায়ক আছে তাত বিজেপিয়ে ভাল ফল লাভ কৰাটো স্বাভাৱিক বুলি উল্লেখ কৰি ৰঞ্জিত দাসে এইবাৰ সৰ্বাধিক ধৰ্মীয় সংখ্যালঘু অধ্যুষিত কৰিমগঞ্জ আৰু হাইলাকান্দিতো বিজেপিক সংখ্যালঘু ৰাইজে আদৰি লৈছে বুলি মন্তব্য কৰে।
ইপিনে ব্ৰহ্মপুত্ৰ উপত্যকাত ধুবুৰীত বিজেপিয়ে ২৬খন, কংগ্ৰেছে ১০খন এ আই য়ু ডি এফে ১০খন আৰু অগপই ২-৩খনত জয়লাভ কৰিব বুলি দাসে মন্তব্য কৰে। একেদৰে গোৱালপাৰাত বিজেপিয়ে অকলে ২৮খন আৰু ৰাভা যৌথ মঞ্চৰ লগ হৈ মুঠ ২৪খনত জয়ী হ’ব বুলি তেওঁ ভৱিষ্যতবাণী কৰে। ইয়াৰ বিপৰীতে জিলাখনত কংগ্ৰেছ আৰু কংগ্ৰেছে ১৭খন, এ আই য়ু ডি এফে ১০খন আৰু অগপই ৪-৫খন পঞ্চায়তত জয়লাভ কৰিব বুলি মন্তব্য কৰে।
দাসৰ মতে নলবাৰী জিলাত যিহেতু বিজেপিৰ ৩জন বিধায়ক (তাৰে এজন মন্ত্ৰী) আছে, গতিকে নলবাৰীত বিজেপিয়ে ভাল ফলাফল লাভ কৰিব। তেওঁৰ সমীক্ষা মতে জিলাখনত বিজেপিয়ে ৪৫-৫০খন পঞ্চায়তত জয়লাভ কৰিব।
দাসৰ সমীক্ষা মতে বঙাইগাঁৱত বিজেপি, অগপ আৰু কংগ্ৰেছে প্ৰায় সমান আসন পাব। জিলাখনত তিনিওটা দলে ১৫ খন মানকৈ পঞ্চায়তত জয়ী হ’ব। ইয়াৰ বিপৰীতে এ আই ইউ ডি এফে পাব ৮ খন।
বৰপেটাতো বিজেপিয়ে ৩৩ খন পঞ্চায়তত বিজয় সাব্যস্ত কৰিব বুলি তেওঁ উল্লেখ কৰে। একেদৰে হোজাই জিলাত বিজেপিয়ে ৩২ খনতকৈ অধিক পঞ্চায়তত জয়লাভ কৰিব।
ৰঞ্জিত দাসে দলৰ সফলতাৰ কৃতিত্ব আজিয়েই দলটোৰ তৃণমূলৰ কাৰ্যকৰ্তা সকলক দিয়া বুলি ঘোষণা কৰে। তেওঁ লগতে জিলা পৰিষদৰ সদস্যতকৈ গাঁও পঞ্চায়তৰ সভাপতি আৰু ৱাৰ্ড মেম্বাৰ জয়লাভ কৰাত অধিক গুৰুত্ব দিয়া বুলিও তেওঁ সংবাদমেলত প্ৰকাশ কৰে।
এই ফলাফল দাঙি বিজেপিৰ ৰাজ্যিক সভাপতিগৰাকীয়ে ‘বিজয় উৎসৱ’ৰ ঘোষণা কৰিলে যদিও ই কিমানখিনি ফলিয়াই সেয়া ১২ ডিচেম্বৰৰ পাছতহে দেখা যাব।
