ভাষা-সাহিত্য, চলচ্চিত্ৰ-সংগীত, সুধাকণ্ঠ ড° ভূপেন হাজৰিকালৈ জন্ম শতবৰ্ষৰ শ্ৰদ্ধাঞ্জলি, সমাজ-ইতিহাস আদি বিভিন্ন বিষয়ৰ বৌদ্ধিক আলোচনা, কবিতা পাঠ, সাংস্কৃতিক প্ৰতিযোগিতাৰে বিগত ১০ দিন ধৰি উৎসৱমুখৰ হৈ থকা অসম গ্ৰন্থমেলাৰ সফল সমাপ্তি ঘটিল। এই সামৰণিৰ লগে লগে নিজম পৰিল শিলচৰৰ পুলিচ পেৰেড গ্ৰাউণ্ড৷ ৰাজ্য চৰকাৰে ঘোষণা কৰা ‘গ্ৰন্থ-বৰ্ষ’ৰে সংগতি ৰাখি অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাই যৌথভাৱে এই বৰ্ষৰ গ্ৰন্থমেলাৰ আয়োজন কৰিছিল।
এইবাৰৰ গ্ৰন্থমেলাত দেশৰ বিভিন্ন প্ৰান্তৰ পৰা মুঠ ৩১ গৰাকী প্ৰকাশক আৰু গ্ৰন্থ বিক্ৰেতাই অংশগ্ৰহণ কৰিছিল। গ্ৰন্থমেলাখনত কলকাতা, মুম্বাই, দিল্লী, হায়দৰাবাদ, আগৰতলা, গুৱাহাটী, শিলচৰৰ প্ৰকাশক-গ্ৰন্থ বিক্ৰেতাসকলকে ধৰি ২৫ খনকৈ বিপণী স্থাপন কৰা হৈছিল।
অসম প্রকাশন পৰিষদৰ সচিব প্ৰমোদ কলিতাই জানিবলৈ দিয়া মতে, বিগত বছৰৰ তুলনাত এইবাৰ মানুহৰ উপস্থিতি আৰু গ্ৰন্থৰ বিক্ৰীৰ সংখ্যা সামান্য পৰিমাণে কমিছে যদিও আশাব্যঞ্জক সঁহাৰি লাভ কৰা হৈছে।
তেওঁ কয়, ‘‘২০২৩ চনৰ গ্ৰন্থমেলাত পাঠক আৰু ক্ৰেতাৰ সঁহাৰি যিমান আছিল এইবাৰ তুলনামূলকভাৱে কমিছে। ইয়াৰ অন্যতম কাৰণ, এতিয়া স্কুল আৰু কলেজত চলি আছে বাৰ্ষিক পৰীক্ষা, গতিকে দিনটোত তুলনামূলকভাৱে ভিৰ কম আছিল যদিও সন্ধিয়া গ্ৰন্থপ্ৰেমীৰ আশাব্যঞ্জক ভিৰ পৰিলক্ষিত হয়।’’
বিক্ৰীৰ সংখ্যা সন্দৰ্ভত তেওঁ কয় যে, ‘‘২০২৩ চনত অভিলেখ সংখ্যক কিতাপ বিক্ৰী হৈছিল, অৱশ্যে সেই ধাৰা এই বছৰ অব্যাহত নাথাকিল। এইবাৰৰ গ্ৰন্থমেলাত প্ৰায় ২৫ৰ পৰা ৩০ লাখ টকাৰ কিতাপ বিক্ৰী হোৱাৰ বিপৰীতে যোৱাবাৰ বিক্ৰীৰ সংখ্যা আছিল প্ৰায় ৩৫ লাখ টকা। তথাপিও প্ৰকাশন আৰু বিক্ৰেতাসকলে লোকচানৰ সন্মুখীন হ‘বলগীয়া হোৱা নাই।’’
প্ৰমোদ কলিতাই উল্লেখ কৰে যে ৰাজ্য চৰকাৰে ২০২৫ চনক ‘গ্ৰন্থ বৰ্ষ’ হিচাপে ঘোষণা কৰি চৰকাৰী কৰ্মচাৰীক ১০০০ টকাকৈ কিতাপ কিনিবলৈ দিছিল। কিন্তু সেই পদক্ষেপেও আশা কৰা ধৰণৰ সঁহাৰি আনিব নোৱাৰিলে। তেওঁ লগতে কয় যে যোৱাবাৰ লটাৰী ব্যৱস্থাৰ বাবেই কিতাপ প্ৰেমীৰ ভিৰ লক্ষ্যণীয় হৈছিল, কিন্তু এইবাৰ উচ্চ ন্যায়ালয়ৰ নিষেধাজ্ঞাৰ বাবে লটাৰীৰ আয়োজন সম্ভৱ নহ‘ল।
প্ৰমোদ কলিতাই কয় যে অতি শৃংখলাবদ্ধভাৱে আৰু সফলতাৰে দ্বিতীয়খন গ্ৰন্থমেলা সম্পূৰ্ণ হৈছে। এই সফলতাই অহা বছৰো শিলচৰত গ্ৰন্থমেলাৰ আয়োজন কৰাৰ সম্ভাৱনা স্পষ্ট কৰি তুলিছে।
