বন্য হাতীৰ জাকৰ মুখত ছেলফি তুলি দঁতালৰ খোচত বেহুঁচ ডিগবৈৰ কিশোৰ
তিনিচুকীয়াৰ ডিগবৈত বনৰীয়া হাতীৰ জাকৰ সন্মুখত ছেল্ফি তোলাৰ চেষ্টাত দঁতালৰ খোচত গুৰুতৰভাৱে জখম হৈ বেহুঁচ হৈছে এজন কিশোৰ।
আহত অংকিত দে’ নামৰ ১৬ বছৰীয়া ল’ৰাজনক অৰ্ধচেতন অৱস্থাত ডিব্ৰুগড়ৰ অসম চিকিৎসা মহাবিদ্যালয় আৰু হস্পিটেলত ভৰ্তি কৰা হৈছে।
ডিগবৈৰ এ অ’ দি হস্পিটেলৰ চিকিৎসকে জনোৱা মতে কিশোৰজনৰ কেইবাডালো কামিহাঁড় ভাগি গৈছে আৰু তেওঁ মূৰ, বুকু আৰু পেটত আঘাত পাইছে।
অংকিতৰ ঘৰ ডিগবৈৰ মুলিয়াবাৰীত। তেওঁ ডিগবৈৰ লিটল ষ্টাৰ ছিনিয়ৰ ছেকেণ্ডেৰি স্কুলৰ দশম শ্ৰেণীৰ ছাত্ৰ।
প্ৰত্যক্ষদৰ্শীৰ ভাষ্য মতে দেওবাৰে আবেলি প্ৰায় ২:৩০ বজাত ডিগবৈৰ তৈলক্ষেত্ৰ এলেকাত প্ৰৱেশ কৰা হাতীৰ জাক এটাৰ সন্মুখৰ পৰা তেওঁ ছেল্ফি তোলাৰ চেষ্টা কৰিছিল।
“জাকৰ বনৰীয়া হাতী এটাৰ সৈতে অংকিতে ছেল্ফি তুলিবলৈ লৈছিল। ভয় খাই দঁতালটোৱে তাক খেদি আহে আৰু তাক খোচ মাৰি পেলাই দিয়ে,” অংকিতৰ বন্ধু সৌমিন দেৱনাথে নৰ্থ ইষ্ট নাওক জনায়।
ঘটনাৰ খবৰ পাই ল’ৰাকেইটাক সেই ঠাইত প্ৰৱেশৰ অনুমতি দিয়া নিৰাপত্তাৰক্ষীসকল দৌৰি আহে আৰু সিহঁতক উদ্ধাৰ কৰে।
চিকিৎসাৰ বাবে অংকিতক লগে লগে ডিগবৈৰ অসামৰিক চিকিৎসালয়লৈ আৰু তাৰ পিছত অসম অইল ডিভিজন হস্পিটেললৈ লৈ যোৱা হয়।
পিছত এ অ’ দি হস্পিটেলৰ চিকিৎসকে আহত কিশোৰজনক ডিব্ৰুগড়লৈ প্ৰেৰণ কৰে।
“তেওঁ অৰ্ধচেতন অৱস্থাত আছিল আৰু উন্নত চিকিৎসাৰ বাবে আমি এ এম চি এইচলৈ পঠাইছো,” এ অ’ দিৰ এজন চিকিৎসকে জনায়।