নতুন দিল্লীত অনুষ্ঠিত ৰাষ্ট্ৰীয় পৰ্য্যায়ৰ সমৰ কলা প্ৰতিযোগিতাত উজলিল অসমীয়া কিশোৰ সুশান্ত
নতুন দিল্লীৰ নেশ্যনেল বাল ভৱনত ২৫ আৰু ২৬ আগষ্টত অনুষ্ঠিত হোৱা ‘‘অল ইণ্ডিয়া কেচ প্ৰাইজ কোৰাছ চেম্পিয়নশ্বিপ-২০১৯-২০’’ত নগাঁৱৰ সুশান্ত ডিছিৰাই তৃতীয় স্থান দখল কৰি জিলাখনলৈ গৌৰৱ কঢ়িয়াই আনে।
চামগুৰিৰ লুংচুং-চামুং গাঁৱৰ সুশান্তই প্ৰতিযোগিতাখনৰ ৪৫ কিলোগ্ৰাম শাখাত প্ৰতিদ্বন্দ্বিতা আগবঢ়াইছিল।
ৰাষ্ট্ৰীয় পৰ্য্যায়ত অনুষ্ঠিত প্ৰতিযোগিতাখনত পদক বিজয়ী সুশান্ত সহ মুঠ ১১ গৰাকী খেলুৱৈয়ে অসমক প্ৰতিনিধিত্ব কৰিছিল।
অসমৰ দলটোৰ সৈতে প্ৰশিক্ষক হিচাপে গৈছিল ৱেলনু জী মমিন আৰু ক্লেবেণ্টিনা মিঞ্জে।
উল্লেখযোগ্য যে, কোৰাছ হৈছে কাৰাটে সদৃশ ৩,৫০০ বছৰ পুৰণি এবিধ সমৰ কলা।
শেহতীয়াকৈ খেলবিধক এছিয়ান গেইমছৰ লগতে দেশৰ বিশ্ববিদ্যালয়সমূহৰ ক্ৰীড়াসূচীতো অন্তৰ্ভূক্ত কৰা হৈছে বুলি জানিব পৰা গৈছে।
ভাৰত চৰকাৰৰ ক্ৰীড়া আৰু যুৱ কল্যাণ মন্ত্ৰালয়েও কোৰাছক উৎকৃষ্ট মানৰ খেল হিচাপে স্বীকৃতি প্ৰদান কৰিছে।
আনহাতে, সৰ্বভাৰতীয় পৰ্য্যায়ৰ প্ৰতিযোগিতাখনত সফলতা অৰ্জন কৰা অসম দলটো আজি ৰাতিপুৱা গৃহ ৰাজ্যত উপস্থিত হোৱাৰ সময়ত উষ্ম আদৰণি জনোৱা হয় বুলি মত প্ৰকাশ কৰে কোৰাছ এচোচিয়েশ্যন অব অসমৰ ৰাজ্যিক সম্পাদক মণি কুমাৰ শ্ৰেষ্ঠাই।