শিৱসাগৰ জিলাৰ জয়সাগৰ আৰক্ষী চকীৰ কনিষ্টবল পৰমানন্দ য়েইনৰ মৃত্যুৰ ঘটনাৰ দণ্ডাধীশ পৰ্য্যায়ৰ তদন্ত ঘোষণা কৰা হৈছে।
জিলা উপায়ুক্তই অতিৰিক্ত জিলা দণ্ডাধীশ দিলীপ তেৰাঙক বিষয়টো তদন্ত কৰি ১৫ দিনৰ ভিতৰত “বিস্তাৰিত প্ৰতিবেদন” দাখিল কৰিবলৈ বৃহস্পতিবাৰে নিৰ্দেশ দিছে।
ঘটনাটোৱে সৃষ্টি কৰা প্ৰতিক্ৰিয়াৰ বিষয়ে উপায়ুক্তৰ নিৰ্দেশ (NO.SVMJ/34/ENQUIRY/2019/6)টোত উল্লেখ কৰা হৈছে।
নিৰ্দেশটোত কোৱা হৈছে যে ঘটনাটো সন্দৰ্ভত সংবাদ মাধ্যমৰ বাতৰি উপায়ুক্তৰ দৃষ্টগোচৰ হৈছে।
মিছিং ছাত্ৰ সংস্থা টি এম পি কেৰ জিলা সমিতিয়ে দণ্ডাধীশৰ তদন্ত বিচাৰি দিয়া পত্ৰৰ উল্লেখেৰে উপায়ুক্তই দিয়া তদন্ত-নিৰ্দেশৰ প্ৰতিলিপি সংগঠনটোলৈয়ো প্ৰেৰণ কৰা হৈছে।
কনিষ্টবলজনৰ মৃত্যু হোৱা শিৱসাগৰ অসামৰিক চিকিৎসালয়ৰ অধীক্ষকক তদন্তত যাৱতীয় তথ্য যোগানৰ বাবে নিৰ্দেশ দিয়া হৈছে।
আৰক্ষী অধীক্ষক অমিতাভ সিনহাক তদন্তকাৰী দণ্ডাধীশৰ সৈতে সহযোগিতা কৰিবলৈ নিৰ্দেশ দিয়া হৈছে।
ইফালে, গুৱাহাটীত শুকুৰবাৰে আয়োজিত অসম আৰক্ষীৰ সঞ্চালকপ্ৰধানৰ সংবাদমেলতো কনিষ্টবলজনৰ মৃত্যুৰ প্ৰসংগ সাংবাদিকে উত্থাপন কৰে।
সঞ্চালকপ্ৰধান কুলধৰ শইকীয়াই এইক্ষেত্ৰত দণ্ডাধীশৰ তদন্তলৈ আঙুলিয়ায়।
বৃহস্পতিবাৰে দাখিল কৰা এজাহাৰত মৃতক পত্নী ফুলেশ্বৰী য়েইনে কনিষ্টবলজনৰ মৃত্যুৰ “মূল কাৰণ”ৰূপে শিৱসাগৰৰ আৰক্ষী অধীক্ষক অমিতাভ সিনহাৰ নাম লৈছিল।
৫০ বছৰীয়া অসুস্থ কনিষ্টবলজনক বিভাগীয় শাস্তিৰূপে এসপ্তাহ ধৰি পিঠিত গধূৰ বোজা বান্ধি প্ৰচণ্ড ৰ’দত দৌৰোৱাৰ ফলতে তেওঁৰ মৃত্যু হৈছে বুলি এজাহাৰত উল্লেখ কৰা হৈছিল।
লগতে পঢ়ক– কনিষ্টবল য়েইনৰ “মৃত্যুৰ মূল কাৰণ” এছ পি অমিতাভ সিনহা: এজাহাৰত মৃতক পত্নী
