নিজৰ বিতৰ্কিত মন্তব্যৰ বাবে ৰাজহুৱাকৈ ক্ষমা খোজাৰ পাছতো জুবিন গাৰ্গৰ প্ৰতি নৰম হোৱা নাই অসমৰ ব্ৰাহ্মণ সমাজ।
এইবাৰ সদৌ অসম ব্ৰাহ্মণ সমাজে জুবিনৰ আহিবলগীয়া চিনেমা ‘কাঞ্চনজংঘা’ৰ বিৰুদ্ধে চেনচৰ ব’ৰ্ডৰ কাষ চপাৰ হুংকাৰ দিছে।
উক্ত ছবিখনত যদি ব্ৰাহ্মণ সম্প্ৰদায়ৰ ভাৱাদৰ্শক আঘাত কৰিব পৰা কিবা দৃশ্যাংশ আছে তেনেহলে তাক আতৰোৱাৰ বাবে সদৌ অসম ব্ৰাহ্মণ সমাজে চেনচৰ বৰ্ডলৈ চিঠি পঠাইছে বুলি গুৱাহাটী ব্ৰাহ্মণ সমাজৰ সম্পাদক পবিত্ৰ কুমাৰ শৰ্মাই জানিবলৈ দিয়ে।
এইক্ষেত্ৰত ‘প্ৰয়োজনত গুৱাহাটী ব্ৰাহ্মণ সমাজো চেনচৰ বৰ্ডৰ কাষ চাপিব’ বুলি উল্লেখ কৰি শৰ্মাই কয়, ‘জুবিনক প্ৰত্যেকবাৰে আমি ঘৰৰ লৰা বুলি ক্ষমা কৰি আহিছিলো, কিন্তু তেওঁ প্ৰত্যেকবাৰে ভুল কৰি আহিছে।’
‘এইবাৰ তেওঁ লিখিতভাৱে ক্ষমা নোখোজা পৰ্যন্ত আমি তেওঁৰ বিৰূদ্ধে দিয়া গোচৰ উঠাই নলও’- তেওঁ লগতে কয়।
উল্লেখযোগ্য যে যোৱা ২৬ জুলাইত গুৱাহাটীত এটা সংস্কৃতিক কাৰ্য্যসূচীৰ সময়ত জুবিনে ‘বামুণক মাৰিব লাগে’ বুলি এক বিতৰ্কিত মন্তব্য কৰিছিল।
