মুখ্য মন্ত্ৰী সৰ্বানন্দ সোণোৱালে আজি মহানগৰীৰ গোপীনাথ নগৰত উত্তৰ-পূৰ্বাঞ্চল বধিৰ মহাবিদ্যালয়ৰ নতুন ভৱন নিৰ্মাণৰ আধাৰশিলা স্থাপন কৰে। সভাত অংশলৈ সোণোৱালে দিবাংগসকলৰ বাবে ডিব্ৰুগড় জিলাত এখন আই টি আই আৰু এখন বিশ্ববিদ্যালয় স্থাপন কৰা হ’ব বুলিও কয়।
অসম চৰকাৰৰ সমাজ কল্যাণ বিভাগ আৰু অসম বধিৰ সন্থাৰ সহযোগত আয়োজিত সভাত নতুন ভৱন নিৰ্মানৰ আধাৰশিলা স্থাপন কৰি সোণোৱালে ভবিষ্যত দিনত মহাবিদ্যালয়খনে ৰাজ্যৰ লগত উত্তৰ-পূৰ্বাঞ্চলৰ বধিৰ সকলৰ উচ্চশিক্ষাৰ সপোনক বাস্তৱ ৰূপ দিয়াত গুৰুত্বপূৰ্ণ ভূমিকা পালন কৰিব বুলি মন্তব্য কৰে। ৰাজ্য চৰাকে শিক্ষানুষ্ঠানখনক আগবঢ়াই নিয়াৰ ক্ষেত্ৰত সকলো ধৰণৰ বাস্তৱসন্মত পদক্ষেপ গ্ৰহণ কৰিব বুলি উল্লেখ কৰি সকলো শ্ৰেণীৰ জনসাধাৰণক মৰ্যদা সহকাৰে উন্নয়নৰ দিশত আগুৱাই নিব পাৰিলেহে সমাজ এখন শক্তিশালী হৈ পৰে বুলি কয়।
আনহাতে, প্ৰধানমন্ত্ৰীয়ে কেন্দ্ৰীয় কৰ্মসূচীৰ উপৰি ৰাজ্য চৰকাৰ সমূহকো দিবাংগসকলৰ সকলো প্ৰকাৰৰ উন্নয়নৰ বাবে পদক্ষেপ ল’বলৈ নিৰ্দেশ দিছিল বুলি সোণোৱালে কয়। সেই নিৰ্দেশমৰ্মে ৰাজ্য চৰকাৰে প্ৰথমখন বাজেটতে দিবাংগসকলৰ বাবে চিকিৎসা ব্যয় পাঁচ হাজাৰ টকা প্ৰদানৰ কথা ঘোষণা কৰি তাক বাস্তৱায়িত কৰিছে আৰু দিবংগসকলে যাতে সন্মান সহকাৰে জীয়াই থাকিব পাৰে তাৰ বাবে প্ৰতিমাহে এক হাজাৰ টকা প্ৰদানৰ কাৰ্য্যসূচীও গ্ৰহন কৰিছে বুলি মন্তব্য কৰে।
আজিৰ সভাত সাংসদ বিজয়া চক্ৰৱৰ্তী, সমাজ কল্যাণ বিভাগৰ মন্ত্ৰী ৰেখাৰাণী দাস বড়ো, শিক্ষা মন্ত্ৰী সিদ্ধাৰ্থ ভট্টাচাৰ্য, অসম বধিৰ সন্থাৰ সম্পাদক তপন শৰ্মাকে ধৰি ভালেকেইগৰাকী অতিথি উপস্থিত থাকে।
