কন্ঠশিল্পী বাবুৰ কন্ঠ আৰু অভিনয়ৰে ‘মাজুলী গাভৰু’ শীৰ্ষক গীতটিক লৈ ছ’চিয়েল মেডিয়াত তুমুল বিতৰ্কৰ সূত্ৰপাত হৈছিল। মাজুলী সত্ৰৰ সত্ৰাধিকাৰ সকলে এই গীতটোৰ একেমুখে বিৰোধিতা কৰাৰ লগতে য়ুটিউবৰ পৰা গীতৰ ভিডিঅ’টো ডিলিট কৰিবলৈ কন্ঠশিল্পীগৰাকীক আহ্বান জনাইছিল।
১৯ নৱেম্বৰৰ নিশা বাবুৱে ফেইচবুকযোগে বাবুৱে ৰাজহুৱাভাৱে মাজুলীবাসীক আৰু অসমবাসীক ক্ষমা খুজিছিল। কিন্তু নাও ডুবিলেও টিঙৰ পৰা ননমা গীতটোৰ কৰিঅ’গ্ৰাফাৰ অসীম গগৈয়ে ক্ষমা খোজা বাদেই, এই সন্দৰ্ভত আগবঢ়াইছিল অদ্ভুট যুক্তি।
ইতিমধ্যে চ’ছিয়েল মেডিয়াত ভাইৰেল হৈ পৰা মাজুলীৰ যুৱকৰ সৈতে হোৱা টেলিফোনিক বাৰ্তালাপত অসীম গগৈৰ মুখত শুনা গৈছে কেতবোৰ অদ্ভুট যুক্তি।
মাজুলীৰ ননী গোপাল দত্ত নামৰ ফেইচবুক ব্যৱহাৰকাৰীয়ে নিজৰ একাউন্টৰ জৰিয়তে আপলোড কৰা অডিঅ’টোৰ কিয়দাংশ তলত দিয়া হ’ল
যুৱক : মাজুলী সত্ৰত মহিলাক প্ৰৱেশ কৰিব নোৱাৰা কিবা নিয়ম আছে নেকি?
অসীম গগৈ : সেইটো কনছেপ্টহে কৰিছো।
যুৱক মাজুলীক লৈ যিকেইটা বিতৰ্কিত চিন দেখুৱাইছে সেই চিন কেইটা আঁতৰাই দিব। শংকৰদেৱ মাধৱদেৱে প্ৰতিষ্ঠা কৰা সত্ৰ হিচাপে মাজুলী সত্ৰত মহিলাক প্ৰৱেশত বাধা দিয়া নাই।
অসীম গগৈ : গুৰুজনাই নিয়ম কেইবাটাও বনাইছিল নে এটাই বনাইছিল। মাজুলী সত্ৰত দিব পাৰে, কিন্তু বৰপেটা সত্ৰতটো নিদিয়ে। মই এখন সত্ৰক লৈ কৰি আছোতো।
যুৱক : আপুনি যদি বৰপেটা গাভৰু বুলি বনাই মোৰ ক’বলগীয়া একো নাই।
অসীম গগৈ : মাজুলী সত্ৰত নিষেধাজ্ঞা কৰা নাই, বৰপেটা সত্ৰত আউনীআটি সত্ৰত মহিলা প্ৰৱেশত নিশেধাজ্ঞা কৰিছে, এইটো শংকৰদেৱে লিখিছে নেকি? আপুনি মোক দেখুৱাব পাৰিব নেকি? মই গোটেইখিনি পঢ়ি শুনিয়েই কামটো কৰিছো। মইটোতো একো বেয়া দেখুওৱা নাই।
অডিঅ’ লিংক https://www.facebook.com/nonigopal.dutta/videos/2566999103421378/?t=233
ভিডিঅ’টোক লৈ এই তুমুল বিতৰ্কৰ মাজতে কালি অন্য এগৰাকী কৰিঅ’গ্ৰাফাৰ উদয় শংকৰে ফেইচবুক একাউন্টৰ জৰিয়তে ক্ষোভ উজৰাৰ লগতে অসীম গগৈক সমালোচনা কৰা দেখা গৈছে।
‘নিজৰ সংস্কৃতিৰ বিষয়ে নজনাটো যিমান লাজৰ বিষয় তাতকৈও দাঙৰ লজ্জাজনক বিষয় সোনসেৰীয়া সংস্কৃতিক বিশ্ব দৰবাৰত নিকৃষ্টতম পৰ্যায়ত উপষ্ঠাপন কৰাটো, মাজুলীৰ সত্ৰীয়া সংস্কৃতিৰ বিষয়ে অকল ভাৰত বৰ্ষতে নহয়,সমগ্ৰ বিশ্বতেই জনাজাত |
বিশ্বৰ প্ৰত্যেক প্ৰান্তৰ পৰা বিভিন্ন যুৱক যুৱতীয়ে গুণগৰিমাৰ বাবে বিখ্যাত মাজুলীলৈ আহি সত্ৰীয়া সংস্কৃতি আকোৱালি লৈ শিকি বুজি সাদৰেৰে গ্ৰহণ কৰি উভতি গৈ অসমৰ নাম বিশ্ব দৰবাৰত উজলাই তুলিছে ! বহুতো নিদৰ্শন এনেকুৱা আছে জাৰ্মানী, ৰছিয়া, লন্ডন, আমেৰিকা ইত্যাদিৰ পৰা ছোৱালী আহি , থাকি সত্ৰৰ পৰা নৃত্য শিকি তেওঁলোকে ইয়াৰ পৰা অসমীয়া সংস্কৃতি নিজৰ কৰি উভতি গৈছে ,তেনে পৰিস্হিতিত অসমীয়া সংস্কৃতিক কেনেকৈ ইমান বিকৃত ভাৱে উপস্হাপন কৰিলে বুজি নাপালো ! You Tube ত দিয়া অসমীয়া ভিডিঅটো দেখি অতি দুখ লাগিছে | বিভিন্নজনে ফোন SMS কৰি প্ৰশ্ন কৰিছে যে ইয়াৰ বিষয়ত মই কি কম???
মই এটাই কব বিচাৰিম যে যিজনে আমাৰ অসমীয়া সংস্কৃতিক ইমান নিকৃষ্ট ভাৱে উপস্হাপন কৰিছে তেওঁক ভগৱানে অতি সোনকালে সুমতি দিয়ক !
এয়া হৈছে সত্ৰীয়া সংস্কৃতিৰ ওপৰত নিৰ্মম অত্যাচাৰ’ উদয় শংকৰে ফেইচবুকত এইদৰে লিখিছে।
অৱশ্যে গীতটিৰ কৰিঅ’গ্ৰাফক লৈ ৰাজ্যত তুমুল বিতৰ্ক হোৱাৰ পাছত বা বিভিন্নজনৰ সমালোচনাৰ সন্মুখীন হোৱাৰ পাছত ফেইচবুকযোগে ক্ষমা বিচাৰিছে গগৈয়ে।
‘অনিচ্ছাকৃত ভুলবশতঃ মাজুলী তথা অসমবাসীৰ অন্তৰত মই যি আঘাত হানিলোঁ তাৰ বাবে মই ক্ষমাপ্ৰাৰ্থী । যদিয়ো মই ইতিমধ্যে ফেচবুকৰ যোগেদি ক্ষমা বিচাৰিছিলোঁ,পুনৰ সংবাদমাধ্যমৰ যোগেদি সকলোৰে ওচৰত ক্ষমা প্ৰাৰ্থনা জনাইছোঁ।‘ এটা সংবাদ মাধ্যমত প্ৰকাশিত এটা বাতৰিৰ ভিডিঅ’ৰ সৈতে এইদৰে লিখিছে অসীম গগৈয়ে।
