ৰাজ্যত এতিয়া ‘ডি ভোটাৰ’ৰ আতংক। প্ৰাক্তন সেনা বিষয়া ছানাউল্লাহৰ পিছতে এইবাৰ চি আই এছ এফৰ এগৰাকী জোৱানলৈ প্ৰেৰণ কৰিছে ‘ডি ভোটাৰ’ৰ জাননী। যি ঘটনাই অঞ্চলটোত চাঞ্চল্যৰ সৃষ্টি কৰিছে।
বিগত ২৫ বছৰ ধৰি চি আই এছ এফত চাকৰি কৰা কামৰূপ গ্ৰাম্যৰ নগৰবেৰাৰ ৰাজহ চক্ৰৰ অন্তৰ্গত দলাগাঁৱৰ মামুদ আলী নামৰ জোৱানজনলৈ প্ৰেৰণ কৰা হৈছে ‘ডি ভোটাৰ’ৰ জাননী।
‘ডি ভোটাৰ’ৰ জাননী পোৱাৰ লগে লগে কলিকতাত কৰ্মৰত জোৱানজন দেওবাৰে অৰ্থাৎ ৭ জুলাইত আহি নিজ বাসগৃহত উপস্থিত হৈ ঘটনা সন্দৰ্ভত ক্ষোভ প্ৰকাশ কৰে।
মামুদে কয় যে, ‘মই ২৫ বছৰে চি আই এছ এফত কাম কৰি আছো। মোৰ দেউতাৰ ১৯৪৭ চনৰ স্কুল চাৰ্টিফিকেট আছে। ১৯৬৬ আৰু ৭১ চনৰ ভোটাৰ লিষ্টত নাম আছে। মই দেশৰ হকে কাম কৰি আছো। মোৰ সকলো নথি-পত্ৰ থকাৰ পাছতো মোৰ এতিয়া আত্ম সন্মানত আঘাত পাইছো।’
ইফালে এগৰাকী স্বদেশী ব্যক্তিলৈ ‘ডি–ভোটাৰ’ জাননী প্ৰেৰণ কৰা ঘটনাই স্থানীয় অঞ্চলটোৰ লগতে সমগ্ৰ ৰাজ্যতে প্ৰতিক্ৰিয়াৰ সৃষ্টি কৰিছে।
